Новости

Денеска екипа составена од доктор Тања Анѓушева, доктор Наташа Чучкова Никчевска и сестра Жанета Богоевска-Митева во училиштето „QSI International School of Skopje“ одржаа курс за прва помош наменет за наставниците и останатите вработени во училиштето. На курсот се разработија неколку сценарија за тоа како да се постапи при давење, при струен удар, при повреда на одредено ткиво, изгореница, скршеница, пад, топлотен удар, смрзнување и слично. Посебно внимание беше посветено за специфичностите кога повредениот е дете.

– Овој курс за прва помош во основа е курс за базично одржување во живот на настрадани лица. Целта на овој курс е да им се помогне на професорите да ги усовршат своите вештини во оваа област, да добијат самодоверба и да им помогнат на настраданите луѓе во ситуации каде што престанува работата на срцето или запира дишењето, сè додека дојде екипата на брзата помош – потенцираше доктор Анѓушева.

Основни принципи беа дадени и за педијатриската возраст за што свое излагање имаше доктор Наташа Чучкова Никчевска.

– Наставниците тука, во ова училиште, се релативно добро запознаени со овие состојби и имаат некои предзнаења за прва помош при незгода, но, имаше многу прашања и практични вежби со нашиот „фантом“ – кукла за вежбање, на кои сите заедно вежбавме. Тоа им помогна многу да ги пробаат практично презентираните случаи а со тоа и да ги зголемат своите спасувачки вештини. Ова е многу битно, и поради тоа во западните држави, еве на пример со САД секој граѓанин треба да помине низ курс за давање прва помош што е битно за целата заедница. Научно е докажано дека доколку на повреден не се даде веднаш прва помош од близок, шансата за преживување е многу помала, а кај децата таа е уште помала оти мозочната смрт настанува многу побрзо отколку кај возрасните. Поради тоа мислам дека сите што работат со деца треба да ги знаат барем основните постапки за одржување во живот и реанимација – изјави доктор Чучкова Никчевска.

Директорот на „QSI – Skopje“, г-нот Џошуа Герет, истакна дека предавањата биле многу полезни и возбудливи со оглед на можноста дека се однесуваат на состојби што можат да се случат во реалниот живот, а информациите биле пренесени на начин кој е многу применлив за нивните предавања.

– Мислам дека добивањето можност да се поставуваат прашања и да се добијат одговори им помогна на луѓето кои не се медицински образувани да разјаснат некои работи, па бидејќи добивме можност да се движиме напред-назад низ темата со докторите беше многу ефикасно за нас – истакна Герет.

Тој додаде дека е многу важно што освен теоретски има и практични вежби бидејќи практичните вежби со „фантом“ даваат неопходна самодоверба потребна кога треба да се соочат со вистинска ситуација.

– Преку ова практично искуство, кое е голема придобивка за нас, наставниците стекнуваат самодоверба да дејствуваат во итни ситуации – нагласи првиот човек на „QSI – Skopje“.

Тој смета дека и учениците би имале полза од добивање на вакви информации бидејќи би можеле да помогнат кога наставниците не се во близина или кога нешто слично би се случило надвор од училиштето, и би можеле да помогнат на некое загрозено лице.