Muaj: Shtator 2020

Farmacistët e klinikës tonë janë një hap më afër jush. Nëpërmjet konsultimit me anë të internetit si  një metodë e re komunikimi ndërmjet pacientit dhe farmacistit, ne sigurojmë për pacientët informacion cilësor në lidhje me terapinë e tyre të rregullt ose efektet anësore të cilat mund të shfaqen si pasojë e kombinimit të ilaçeve të reja me ato të mëparshme.

Nëse ndjeni ndonjë ndryshim – efekte anësore nga ilaçi që merrni (skuqje, kollë, diarre, ënjtje, dhimbje muskulore, dhimbje koke, gjakderdhje, nuk keni përmirësim të gjendjes, etj.), mos ngurroni të konsultoheni me farmacistët tanë.

Gjithashtu, ju mund ti kontaktoni ata nëse keni filluar me marrjen e ndonjë ilaçi të ri në terapinë tuaj. Shpesh ndodh që ilaçi i ri bie ndesh me terapinë ekzistuese, e cila rezulton në zvogëlimin ose rritjen e efektit të terapisë ose efekte të mundshme anësore. E gjithë kjo mund të parandalohet duke kontrolluar ndërveprimet e ilaçit të ri me ato ekzistues.

Ne jemi këtu për ju edhe nëse dëshironi të merrni suplemente, vitamina, ekstrakte bimore të cilat mund të ndikojnë në dhënien e efektit të duhur të terapisë kronike që merrni.

Ne gjithashtu mund t’ju japim këshilla dhe më tepër informacion në rast se keni paqartësi në lidhje me mënyrën e ruajtjes, marrjes dhe aplikimit të ilaçit në lidhje me ushqimin dhe terapinë tjetër.

Konsultohuni me ne nëse keni ftohje ose grip dhe keni nevojë për këshilla se si të përballeni me simptomat. Nëse jeni duke marrë një antibiotik dhe gjendja juaj nuk përmirësohet ose keni shfaqje të efekteve anësore, mund të na kontaktoni.

Në rast se është e nevojshme, ne gjithashtu bëjmë monitorimin e antibiotikut në gjak. Në konsultim me mjekun tuaj ne mund të kryejmë kontroll dhe të japim rekomandim për dozën e mëtejshme, në rast të marrjes së terapisë me Vancomycin dhe Gentamicin.

Theksojmë se vëmendje e veçantë duhet t’i kushtohet pacientëve mbi 65 vjeç që kanë nevojë për terapi me ilaçe të shumta në të njëjtën kohë. Tek këta pacientë është i nevojshëm kontrolli i terapisë së duhur dhe përshtatshmëria e saj sipas parametrave laboratorike dhe gjetjeve klinike.

Konsultimin tuaj me farmacistët tanë, mund ta rezervoni në linkun zmc.tiktak.mk si dhe nëpërmjet faqes tonë të internetit www.zmc.mk.

 

A i keni vënë re shiritat  me ngjyra të ndryshme që përdorin sportistët? Këto shirita gjithashtu ndihmojnë gjatë shtatzanisë në lehtësimin e vështirësive, mbështetjen e muskujve të barkut dhe lehtësimin e ngërçeve menstruale.

Kinesiotaping është një shirit elastik, vetëngjitës që është zhvilluar që në vitin 1979. Karakteristike tek këto shirita është fakti që nuk kanë lateks, është hipoalergjik dhe mund të përdoret për disa ditë. Përdorimi i tyre është i sigurt për të gjithë duke filluar nga foshnjat deri tek pacientët e rritur.

Shiriti është 100% i përbërë nga fije pambuku dhe ngjitës mjekësor akrilik. Është i papërshkueshëm nga uji dhe nuk  ndikon në kufizimin e lëvizjes. Elasticiteti i shiritit ndikon në relaksimin dhe stimulimin e muskujve. Vetë shiriti lehtëson procesin e shërimit natyral të trupit, siguron mbështetje dhe stabilitet për muskujt dhe nyjet, përmirëson qarkullimin e gjakut dhe atë limfatik, zvogëlon dhimbjen, zvogëlon ënjtjen dhe kontrollon inflamacionin.

Kur bëhet fjalë për shtatzëninë, shiriti kinesio është një mundësi e sigurt dhe efektive e trajtimit. Dhimbja e muskujve është e zakonshme tek gratë gjatë shtatëzanisë, veçanërisht në pjesën e shpinës dhe të pelvisit (legenit), si dhe dhimbja ligamenteve (veçanërisht në pjesën e poshtme të barkut ose në pjesën e bikinit).

Në këto kushte, shiriti kinesio është një metodë alternative e përdorimit të ilaçeve. Nëse aplikohet në mënyrën e duhur, atëherë është opsioni ideal për lehtësimin e dhimbjeve gjatë shtatëzanisë.

Aplikimi i shiritave kinesio në pjesën lumbare të shpinës ose në pjesën e poshtme të barkut ndihmon në balacimin e peshës dhe gjithashtu në reduktimin e lodhjes dhe dhimbjes që shfaqet.

Ekzistojnë disa lloje të shiritave kinesio që mund të ndikojnë për mbështetjen e barkut gjatë shtatzanisë, muskujve të barkut dhe shpinës.

“Brez” abdominal, shirita mbështetës vertikal, “brez” për foshnja, аplikim për mbështetje të plotë të barkut, aplikim i kombinuar për palcën lumbale dhe muskujt e barkut, aplikim për mbështetje të diafragmës, etj.

Me aplikimin e njërës prej këtyre teknikave (sipas nevojës) arrihen efekte të ndryshme: ngritja e barkut dhe lehtësimi apo çlirimi i presionit në pjesën e pelvisit, lehtësimi i dhimbjeve në pjesën e poshtme të barkut dhe shpinës, mbështetja dhe ngritja e pjesës së poshtme të barkut, ulja e pjesës së sipërme të barkut dhe çlirimi i diafragmës për të lehtësuar frymëmarrjen.

Këto aplikacione mund të kombinohen me aplikimin e duhur për muskujt e shpinës, veçanërisht në pjesën lumbale të shpinës.

Duhet theksuar se ekzistojnë teknika të përshtatshme që përdoren në trajtimin e “shenjave” nga lindja cezariane. Ato ndihmojnë në lehtësimin e muskujve të barkut në atë zonë, si dhe lirimin e fascisë.

Teknika e kinesiotaping mund të përdoret gjithashtu për lehtësimin e dhimbjeve të barkut gjatë ciklit menstrual dhe çlirimin e muskujve të barkut. Me anë të teknikave të përshtatshme siç është siç është përdorimi i EDF – kinesiotaping mund të ndihmojë në lehtësimin e ndjeshëm të dhimbjeve të muskujve gjatë kushteve të tilla.

Gjatë shtatëzënësisë, pas lindjes, madje edhe gjatë ditëve të ciklit menstrual, këshillohuni dhe kërkoni ndihmë nga fizioterapisti juaj.

Zbatimi i tendencave më të fundit në trajtimin dhe mjekimin e pacientëve pozitivë ndaj COVID-19

Në kushtet e pandemisë më të rëndë që i ndodhi njerëzimit pas Luftës së Dytë Botërore – COVID -19, qëllimi kryesor i klinikës sonë është të kontribuojë në ruajtjen e shëndetit duke ofruar kujdesin më të mirë mjekësor për çdo pacient nëpërmjet praktikës, edukimit dhe humumtimeve të integruara mjekësore.

Pacientët me COVID-19 janë një sfidë serioze përsa i përket trajtimit dhe mjekimit, pasi aktualisht nuk ka asnjë terapi mjekimi të synuar dhe trajtimi është kryesisht mbështetës. Tek pacientët që zhvillojnë formë të rëndë të dështimit të frymëmarrjes, zhvillohet një sindromë inflamatore e cila është tepër e rëndë dhe shoqërohet me lëshimin e të ashtuquajturve “mediatorëve inflamatorë” të cilët janë tepër të rezikshëm për jetën dhe çojnë në dështimin e shumë organeve duke rezultuar me vdekje.

Duke ndjekur trendet botërore në trajtimin e pacientëve më të sëmurë në njësitë e kujdesit intensiv, ne në Spitalin klinik Zhan Mitrev për shumë vite kemi përdorur me sukses metodën e hemofiltrimit të gjakut me anë të një filtri të veçantë shumë absorbues (Oxiris). Historitë tona të suksesit në lidhje me hemodiafiltrimin venoz me filtrin Oxiris janë prezantuar në disa konferenca mjekësore botërore të rangut më të lartë si dhe përmes botimeve në revista të njohura mjekësore. Dëshmi për ndjekjen e standardeve më të larta mjekësore ishte njohja zyrtare e filtrimit të Oxiris nga FDA në Prill 2020 si pjesë e trajtimit të pacientëve me COVID-19.

Me publikimin e njohurive tona mjekësore dhe ndjekjen e rekomandimeve më të fundit për trajtimin e pacientëve me COVID-19, ne kemi filluar një lloj tjetër të pastrimit të gjakut bazuar në metodën e hemoabsorbimit të citokinave dhe ndërmjetësuesve të tjerë inflamatorë me filtrin CytoSorb (aprovuar nga FDA për trajtimin e pacientëve të sëmurë në gjendje kritike për shkak të infeksionit COVID-19). Përvojat tona fillestare me përdorimin e të dy formave të pastrimit të gjakut janë të shkëlqyera dhe janë shtysë (iniciativë) dhe shpresë për shërimin e pacientëve të sëmurë rëndë që luftojnë jo vetëm me infeksion COVID-19, por edhe forma të tjera të sëmundjeve inflamatore të natyrës bakteriale dhe virale. Filtrimi është i ngadaltë, i sigurt dhe zakonisht zgjat ndërmjet 12 dhe 48 orë. Gjatë kësaj kohe, pacientët monitorohen me sistemin më të sofistikuar laboratorik elektronik për nivelin e shënuesve (marker) inflamatorë (IL 6, CRP, PCT, etj.) dhe në varësi të rezultateve, terapia vazhdon ose ndërpritet.

Faktori i vetëm kufizues në vendin tonë është se këto forma të trajtimit dhe mjekimit nuk njihen nga Fondi i Sigurimeve Shëndetësore të Republikës së Maqedonisë Veriore dhe përdorimi i tyre si dhe vazhdimi i terapisë në rastet kur shfaqet përmirësim tek pacienti është i kufizuar ose i pamundur për arsye financiare.

Bazuar në përvojat e shkëlqyera, të botuara dhe të njohura në botë, Spitali klinik Zhan Mitrev do të vazhdojë të përpiqet për standardet më të larta në kujdesin dhe trajtimin e pacientëve të sëmurë rëndë duke ndjekur moton e Emanuel Kant se njerëzit kanë dinjitet, por jo çmim! Jeta e njeriut nuk ka çmim!

Çfarë është porti?

Porti është një pajisje e cila vendoset nën lëkurë, zakonisht ndodhet nën kockën e djathtë të qafës. Kjo pajisje mundëson shpërndarje më pa dhimbje dhe të sigurt të ilaçeve të planifikuara.

Çdo port përbëhet nga dy pjesë:

1. Pjesa apo hapësira nën lëkurë – pjesa që lihet nën lëkurë dhe lejon shpimin pa dhimbje
2. Kateteri – tubi i gjatë që përfundon në venën subklaviane, përmes së cilës ilaçet futen në qarkullimin e gjakut të njeriut.

Porti zakonisht vendoset nën ndikimin e anestezisë lokale.

Porti është i parashikuar të vendoset tek ata pacientë që duhet të marrin ilaçe në mënyrë intravenoze dhe që zakonisht kanë dëmtime në murin e venës. Zakonisht përdoret tek pacientët me sëmundje malinje të cilët marrin ilaçe citostatike, si dhe tek pacientët me sëmundje autoimune.

AJO ÇFARË DUHET TË DIJË ÇDO PACIENT

• Është e detyrueshme të lani duart para çdo prekjeje të zonës ku ndodhet pajisja (porti) në mënyrë që të parandaloni infeksionin e mundshëm.
• Duhet të shmanget puna e rëndë fizike
• Porti duhet të pastrohet / shpëlahet rregullisht me Heparin çdo 20 (njëzet) ditë për të parandaluar bllokimin e portit nga mpiksja e gjakut.
• Duhet të mbahet higjena e rregullt e trupit
• Është e ndaluar veshja e rrobave të ngushta, të cilat shkaktojnë presion (shtypje) dhe mund të çojënë në ndërprerjen e qarkullimit në zonën në të cilën ndodhet porti.

Pacienti duhet të shkojë te mjeku MENJËHERË nëse:

• ka skuqje, dhimbje, nxehtësi dhe ënjtje të lëkurës ku ndodhet porti
• ka gjakderdhja
• ka temperature dhe ethe
• lënda e lëngshme del nga porti
• ka marramendje dhe gulçim
• shfaqet katetër nën lëkurë
• nuk mund të pastrohet/shpëlahet porti

Të gjithë pacientët që kanë sëmundje malinje dhe kanë nevojë për mjekim afatgjatë intravenoz, është e mundur që të pranohen në spital dhe të bëhet vendosja e portit.

Për ata pacientë që tashmë kanë të vendosur një port, mund të bëhet rregullisht shpëlarja e portit me heparinë në kushte të sigurta dhe sterile, por më parë me kontroll të detyrueshëm me ultratingull për pozicionimin e duhur të tij.

Nëse keni nevojë për konsultim dhe për kryerjen e kontrollit të portit, ju lutemi të na kontaktoni në numrin tonë të kontaktit: 00389 2 3091 484

Çrregullimet e traktit të poshtëm urinar siç janë inkontinenca urinare, veprimi i tepërt i fshikëz dhe sindroma e urinimit të shoqëruar me dhimbje, lidhen gjithashtu me mosfunksionim seksual. Intervenimet kirurgjike, veçanërisht vendosja e shiritit polipropilen pa tension (TVT-O) për mosmbajtjen e urinës nga stresi ndikon gjithashtu në përmirësimin e funksionit seksual. Në Zan Mitrev Clinic me përqindje të lartë suksesi, krahasuar me referencat botërore, Prof. Dr. Vasil Iliev, për 6 vjet me rradhë e zbaton vazhdimisht këtë metodë.

Çfarë duhet të dini në lidhje me këtë procedurë dhe cilat janë anët pozitive të saj?

Kjo është një ndërhyrje e cila kryhet tek gratë me problem të njohur si inkontinenca urinare.

Ajo çfarë është e rëndësishme është se përveç zgjidhjes së problemit kryesor – inkontinencës, ka edhe anë të tjera positive të cilat lidhen me përmirësimin e funksionit seksual tek gratë.

Dëshmi për këtë është numri i madh i studimeve që flasin për faktin se plastika vaginale dhe vendosja e shiritit polipropilen pa tension (TVT-O) përmirëson funksionin seksual tek gratë që kanë vuajtur më parë nga inkontinenca urinare.

Një nga studimet më të fundit për të mbuluar pacientë të tillë është ai i kryer nga Dr. Lan-Yu dhe ekipi i tij në  kolegjin mjekësor Union në Pekin.

Është analizuar një mostër përfaqësuese e 105 grave seksualisht aktive të cilat I përkasin moshës mesatarisht 51 vjeç, pothuajse gjysma e tyre ishin në menopauzë. Të gjitha u diagnostikuan me inkontinencë urinare dhe iu nënshtruan operacionit duke përdorur metodën TVT-O. Ata iu përgjigjën një pyetësori (PISQ-12) mbi prolapsin / inkontinencën urinare dhe një pyetësori seksual para operacionit dhe një vit pas operacionit.

Rezultatet sipas përgjigjeve të tyre janë si më poshtë:

Një vit pas operacionit TVT-O, funksioni seksual është përmirësuar tek 77.1% (81 pjesëmarrës), nuk është ndryshuar tek 18 (17.1%) dhe është përkeqësuar tek gjashtë pacientë (5.7%).

Autorët e kësaj analize gjithashtu vërejnë se rritja në domenin fizik ka shkaktuar një rritje në rezultatin e përgjithshëm të PISQ-12. Por, përkundër përmirësimeve të dukshme në domenin fizik të PISQ-12, pavarësisht nga suksesi ose dështimi, fusha emocionale lidhur me partnerët nuk kanë treguar ndryshime të rëndësishme.

Ajo që vlen të përmendet është se gjatë krahasimit të vlerave preoperative me ato postoperative dhe ato të një viti pas kryerjes të TVT-O, është gjetur një ndryshim i rëndësishëm, pra zvogëlimi i shkallës së dhimbjeve tek pacientët gjatë marrëdhënieve seksuale. Gjithashtu, gratë kanë treguar se tashmë ndienin shumë më pak frikë nga inkontinenca urinare gjatë marrëdhënieve seksuale dhe shumë më pak reagime negative emocionale gjatë marrëdhënieve seksuale pas TVT-O në krahasim se më parë.

Mbi 90% e grave të cilat bëjnë pjesë në grupin e suksesshëm, janë shprehur se nuk kanë përjetuar më asnjëherë inkontinencë gjatë marrëdhënieve seksuale, krahasuar me 50% të pjesës tjetër të grave të cilat bëjnë pjesë në grupin e dështimit.

Ky studim konfirmon edhe një herë numrin në rritje të provave që korrigjimi me mbështetje retropubike të kryer gjatë operacionit TVT-O përmirëson ndjeshëm funksionin seksual tek gratë të cilat janë seksualisht aktive por që vuajnë nga inkontinenca urinare.

Intervenimet konservatore, terapia fizikale e pelvisit dhe humbja e peshës tek pacientët me mbipeshë trupore mund të jenë gjithashtu shumë efektive në minimizimin e ashpërsisë së inkontinencës urinare e cila kontribuon në mosfunksionimin seksual.