Ngjarje

15 Tetori – Dita globale e higjenës së duarve, është një ditë kushtuar ndërgjegjësimit dhe theksimit të rëndësisë së larjes së duarve me ujë dhe sapun si një mënyrë e thjeshtë, efektive dhe e pranueshme për parandalimin e shumë sëmundjeve duke shpëtuar në këtë mënyrë shumë jetë.

Mënyra më e zakonshme e transmetimit të mikroorganizmave janë duart e njerëzve. Ky hap i thjeshtë – larja e duarve – është një metodë efektive për të parandaluar transmetimin e sëmundjeve diarreale, të frymëmarrjes, infeksioneve të lëkurës, infeksioneve të syve, si dhe parazitëve në zorrë.

Këtë vit larja e duarve po merr vlerën reale për të gjithë ne. Pandemia e koronavirusit ka konfirmuar se masa e parë në parandalimin e transmetimit të sëmundjeve infektive është higjiena e duarve.

Statistikat tregojnë se:

• Çdo vit 4 milion fëmijë nën moshën 5 vdesin nga sëmundjet e zorrëve ose pneumonia në vendet në zhvillim, që do të thotë që çdo 15 sekonda një fëmijë vdes nga këto sëmundje
• Pneumonia është shkaku kryesor i vdekjes në atë moshë, dhe me larjen e duhur të duarve incidenca mund të ulet me 25%
• Sëmundjet diarreale janë shkaku i dytë kryesor i vdekjeve në atë moshë. Zbatimi i larjes adekuate dhe në kohë të duarve me sapun dhe ujë zvogëlon 50% të sëmundjeve diarreale

Problemi i praktikës së pamjaftueshme të larjes së duarve me ujë dhe sapun nuk është vetëm në vendet në zhvillim, por edhe në vendet shumë të zhvilluara. Kjo është arsyeja pse në të gjithë botën çdo vit më 15 Tetor, shënohet Global Hand Washing Day (Dita Globale e Larjes së Duarve) me një moto të re dhe në një mënyrë krijuese theksohet rëndësia e larjes së duarve me sapun dhe ujë. Qëllimi i këtyre fushatave është të promovojnë kulturën e larjes së duarve në nivel global dhe lokal dhe të paraqesin përfitimet e saj.

Të gjithë në mënyrë të barabartë jemi të rrezikuar nga infektimi me koronavirus dhe kjo është arsyeja pse motoja e fushatës së larjes së duarve të këtij viti është – “Higjiena e duarve për të gjithë”.
Larja e duarve është një rutinë e përditshme, një praktikë e vazhdueshme dhe duhet të bëhet siç duhet, në momentin e duhur dhe kohën e nevojshme. Kur është kjo veçanërisht e rëndësishme?

• Para, gjatë dhe pas përgatitjes së ushqimit
• Para ngrënies
• Pas përdorimit të tualetit
• Pas teshtitjes, kollitjes ose prekjes së hundës
• Pas kontaktit me kafshët ose jashtëqitjet e tyre
• Pas kontaktit me mbeturinat
• Pas ndërrimit të pelenave higjienike
• Para dhe pas kontaktit me një person të sëmurë ose të lënduar
• Para dhe pas vizitës në ndonjë ordinancë spitalore

Në kushte spitalore, megjithëse higjiena e duarve përfshin larjen e duarve me ujë dhe sapun dhe dezinfektimin e duarve, këto dy procedura nuk duhet të konsiderohen si të njejta. Infeksionet janë një problem serioz në objektet shëndetësore:

• çdo vit 2 milion pacientë marrin infeksion spitalor
• 90,000 prej tyre vdesin nga infeksioni spitalor

Ne e dimë saktësisht se kur duhet të përdorim ujë dhe sapun dhe kur të përdorim dezinfektuesme përmbajtje alkoolike. Higjiena e duarve me dezinfektues alkoolik praktikohet në mënyrë rutinore, por larja me sapun dhe ujë është e domosdoshme kur duart janë dukshëm të ndotura ose të kontaminuara. Larja e duarve është gjithashtu e domosdoshme kur merreni me pacientë që kanë baktere sporogjene si Clostridium difficile. Në situata të tjera, higjiena e duarve me dezinfektues alkoolik justifikohet nga efikasiteti, koha e kërkuar dhe disponueshmëria.