Месец: м.г

Како да го зачувате срцето на работното место

Во пресрет на меѓународниот ден на трудот 1 Мај , нашиот реномиран интервентен кардиолог д-р Шпенд Идризи Ви посочува неколку работи кои ќе бидат благодет за Вашето срце додека сте на Вашите работни места. И покрај извонредниот напредок на превентивната кардиологија сепак 17,3 милиони луѓе секоја година умираат од болести на срцето и крвните садови. Скоро половина од нив се во најпродуктивниот период од животот помеѓу 20 и 60 години старост. Поради тоа еден од главните акценти на Светската федерација за срце е заштита на срцето на работното место. Првенствено преку промоција на пораки за здраво срце на местото каде што секојдневно го поминуваме работниот ден.

Најголем број од нас поминуваат повеќе од половина од нашите активни часови на своите работни места. Работното место е идеално за охрабрување на однесување за здраво срце. Еве некои идеи што да направите за да имате Ваш придонес во создавањето на поздраво работно место:

Инсистирајте на околина без пушењеПобарајте ознака за забрането пушење – осигурајте го вашето работно место да биде 100% непушачка околина;Поддржете го прифаќањето на услуги за прекин на пушењето – охрабрете ги вашите вработени, колеги да им дадат помош на оние кои сакаат да престанат со пушењe

Вежбајте на работното местоВклучете физичка активност во вашиот дневен работен распоред – возете велосипед до работа ако е можно, користете скали, вежбајте или прошетајте за време на паузата и поттикнете ги и другите да го прават истото.Имајте редовни паузи за време на денот – пробајте да се истегнете или повежбате барем 5 минути, два пати дневно во текот на работното време.

Изберете здрави начини на исхранаПобарајте здрава храна во кантината на работа или побарајте здрава храна во околните ресторани. Најдете време за да ручате подалеку од работното место за да земете малку повеќе свеж воздух;

Изборете се за моменти без стрес Иако стресот не е докажан како директен ризик фактор за болести на срцето или мозочен удар, тој е поврзен со пушењето, пиењето на големи колочини алкохол и нездрава исхрана, кои што се ризик фактори за срцево заболување.

Формирајте „Здружение за здравје“ на местото каде што работите кое ќе се грижи за здрави иницијативи кои се прикладни за вашето работно место:-Воведете ден за „пешачење до работа“ или „возење велосипед до работа“-Ако на работа имате лифтови, направете кампања со наслов „Користи ги скалите“ – или охрабрете ги вработените да пешачат за време на паузите;

Во изминативе 10 години, многу бизнис компании ја препознаа важноста за здравјето на вработените и се обврзаа да ја вклучат здравствената промоција во нивната корпоративна агенда.

Сепак, не се само работодавачите оние кои треба да се мотивираат за да ги променат нивните однесувања и политики. Секој може да ја одигра својата улога во подобрување на здравјето на работното место. Здравата работна сила може да придонесе кон вкупното здравје на бизнисот на многу начин, дури и за време на економска криза.
Д-р Шпенд Идризи -интервентен кардиолог

Евоцирани потенцијали во дијагностицрањето на невролошките состојби

Развојот на софистицирана техника во неврологијата ни овозможува добивање на евоцирани потенцијали за тестирање на функцијата на сензорните системи во невролошката пракса. Евоцирани потенцијали, се предизвикани потенцијали, со чија помош се перципира надворешната дразба и одговорот на мозочните центри на тие дразби.

Во зависност од дразбата со која тие се предизвикани разликуваме неколку видови на евоцирани потенцијали, а најчесто користени во нашата пракса се:

Видни евоцирани потенцијали – ВЕПСлушни евоцирани потенцијали и потенцијали на мозочното стебло – БАЕП Соматосензорни евоцирани потенцијали-СЕП Евоцираните потенцијали се детектираат со помош на површински електроди поставени вдолж проекцијата на сензорниот пат од рецепторот до кората на мозокот

Видните евоцирани потенцијали – ВЕП во клиничката пракса се применуваат кај : Мултипла склероза, при што во 90% се откриваат дури и субклиничките демиелинизациони лезии и служат како важно дијагностичко средство во критериумите за дијагностицирање на мултипла склероза ;Лезии на видните патишта, пред се на ниво на хијазмата и ретрохирахијазматски лезии- Дијабетична ретинопатија- Ретробулбарен неврит- Кортикално слепило и сл.

Аудитивните евоцирани потенцијали и потенцијалите на мозочно стебло – БАЕП, претставуваат неврофизиолошки тест за испитување на функцијата на периферниот и централниот дел на акустичниот пат и неговите структури во мозочно стебло. БАЕП се користи во одредувањето на висината на оштетувањето на слухот поради оштетување на неговата кондуктивна спроводливост, поради тумори на мозочното стебло, васкуларни оштетувања на мозочното стебло и каротидна болест, демиелинизаторни заболувања, во дијагностицирање на вертигинозните синдроми од кое ниво настануваат, церебрални трауми, трауми на увото, церебрална смрт.

Соматосензорни евоцирани потенцијали – СЕП

Соматосензорните евоцирани потенцијали служат за испитување на функционалната состојба на соматосензорниот систем. Се добиваат со електрична стимулација со површински електроди на периферните нерви на рацете и нозете при што се регистрира одговор од одредени места на екстремитетот, рбетниот и големиот мозок. Оваа метода се применува во дијагностицирање на:- Висинската локализација на лезиите на соматосензорните патишта -Трауматско или компресивно оштетување на рбетниот мозок, невропатии, оштетување на нервните плексуси, мултипла склероза, цереброваскуларни заболувања и церебрална траума.

„Филип Втори“ стана медицински партнер на ракометниот камп „Кирил Лазаров7“

Академик д-р Жан Митрев и најдобриот ракометен стрелец на планетава Кирил Лазаров вчера ја официјализираа меѓусебната соработка. Потпишан е договор со кој Специјалната болница по хируршки болести „Филип Втори“ стана медицински партнер на првиот ракометен камп „Кирил Лазаров 7 “. Кампот го организира маркетинг агенцијата КМГ Спорт, чие заштитно лице e Лазаров.

Истиот ќе се организира од 22-28 јуни во Охрид. Идејата за кампот е на голгетерот и е со постар датум, но заради секојдневните обврски на нашиот капитен истата се реализира во оваа година. Чест и привилегија е да се работи со најдобрите и оваа соработка го верифицира токму тоа. Шампионите играаат додека не одиграат како треба ова важи во спортот, но и воопшто во животот секој од нас тежнее кон најдоброто. Поставувањето на одредени цели и нивно успешно реализирање отвара простор за нови. А успехот не е ништо друго туку невообичаено добро извршување на толку вообичаените работни обврски. Академик д-р Жан Митрев изрази задоволство што токму болницата „Филип Втори“ е дел од ова здраво дружење и едуцирање на децата во името на ракометот, со Македонецот во големата Барселона:

„Ние како институција сме почестени и горди што ќе дадеме мал придонес во овој камп од здравствена и психолошка гледна точка. Како болница имаме искуство во организирање на детски кампови, изминативе години заедно со Црвениот крст организиравме кампови за деца кои се оперирани кај нас. За нивно ресоцијализирање и за подобрување на социјалниот статус кај нивните родители. Така да сите наши ресурси ќе бидат ставени во тој поглед, за да тие деца бидат и здравствено безбедни. Ќе се обидеме со адаптирани предавања да ги едуцираме децата што значи здрава храна и здрав живот, сакаме да ги споиме здравиот дух со здравото тело. Моја лична гордост е што можам да имам некаков удел во иницијативата на Кире. Јас би додал и уште едно, а тоа е дека спортот за мене е еден вид на воспитување на младите луѓе. Сите ние сме се бавеле со некој спорт ако не сега тогаш во најмладите години и добро знаеме дека таму се стекнуваат и најдобрите другари, таму децата се социјализираат, се градат како личности независно дали потоа ќе станат врвни спортисти. Можат да станат врвни во некоја друга област. Меѓутоа принципот е ист и во спортот, сите сакаме да победуваме како и во животот меѓутоа знаеме дека добиваме и ниски удари некогаш го губиме натпреварот, но не ја губиме борбата и желбата. Спортот за мене претставува една многу важна работа бидејќи тука децата и сите индивидуи се соочуваат самите со себе, да бидат пред се самодисциплинирани за да можат да постигнат успех и за да можат врз база на тоа да се оформат и да го достигнат она што го сакаат. Уште еднаш го поздравувам Кире тој е голема гордост за Македонија“.

Знаењето за светот ни помага да успееме, а знаењето за себе да се развиваме. Акомулацијата на тоа светско како врвен планетарен спортист и лично знаење како изграден карактер, Лазаров ќе го пренесе на децата. Планирани се 120 деца учесници на кампот кои ќе бидат на возраст од 10-17 години. За соработката со д-р Митрев, најдобриот стрелец на светот изјави:
„Ќе се обидеме децата уште од мали нозе со нашиот ангажман да ги насочиме во правилно оформување на карактерот. Да им всадиме еден победнички дух и чекор по чекор да ги изградиме новите репрезентативци на Р.Македонија. Јас сум среќен и ми претставува огромна чест соработката со Академик д-р Жан Митрев и болницата „Филип Втори“ . Сигурен сум дека ќе дадат огромен придонес за развојот на овие деца со 24 часовен надзор во кампот. Оваа прилика ја користам воедно да ја честитам убавата годишнина, 15 години од постоењето на болницата „Филип Втори“, да им посакам уште многу успешни години и уште многу успешни битки со животите на луѓето“.

По потпишувањето на договорот, Лазаров на д-р Митрев му подари дрес со брјот 77 од неговиот матичен клуб, гигантот Барселона. А пак д-р Митрев нему му посвети книга чии автор е тој, во која се пренесени дел од годините кои д-р Митрев ги поминал во операциона сала со едноставно објаснување на многу компликувани случаи кои се решени, а луѓето спасени, насловена како „Кардиоваскуларни решенија“.

Во периодот кој што следи ќе се организираат систематски прегледи за децата од цела Македонија, кои ќе вклучуваат комплетен скрининг на здравствената состојба на организмот. Ова е само почеток на една плодна соработка во името на здравјето на децата.

Кардиолошка метода на дренажа на просторот околу срцето

Перикардот претставува обвивка околу срцето. Перикардиоцентеза претставува процедура при која се отстранува насобрана течност од перикардот. Најчеста причина поради која се прави перикардиоцентеза е состојба на срцева тампонада, при која доаѓа до брзо насобирање на течност во перикардот. Течноста притиска на срцевите шуплини, а перикардот има ограничена можност за растегнување. Кога перикардот нема да може да се растегне доволно за да навлезе крв во срцевите шуплини настанува т.н. хемодинамски колапс, кога срцето не може да прими а потоа и да испумпа крв. Тоа е живото-загрозувачка состојба. Тампонадата најчесто е предизвикана од излив на крв по повреда на срцевиот мускул или од воспалителен процес.

Пациентите со голем перикарден излив се жалат на глад за воздух, поспаност, низок крвен притисок, забрзана срцева работа, растегнување на југуларните вени на вратот. Кај сите пациенти со клиничка слика за акутно срцево засегање потребно е да се направи итна ехокардиографија. Кај хемодинамски нестабилен пациент при визуелизација на голем перикарден излив кој притиска на десната комора и преткомора потребно е да се изведе итна перикардиоцентеза. На перикардниот излив може да му се пристапи субксифоидно (преку просторот помеѓу processus xiphoideus и левиот ребрен лак) и парастернално (убодот е во 5-тиот лев интеркостален простор, до работ на стернумот).Потврда за успешност на процедурата претставува аспирирање на течност од перикардниот простор: некрвава течност или крв која не се згрутчува.

При неправилно изведување на перикардиоцентезата можат да настанат компликации, како што се: нема аспирација на течност, пнеумоторакс, повреда на миокардијален коронарен крвен сад, хемоперикард, воздушна емболија, аритмии, Cardiac arrest или смрт, повреда на хепар, инфекција. Компликациите се сретнуваат, но не толку чести и нивниот процент е занемарлив во споредба со живото-спасувачката процедура. Во раце на искусен тим перикардиоцентезата претставува безбедна, живото-спасувачка процедура.

Болницата „Филип Втори“ со свој еминентен кадар активен учесник на ова големо случување

Во организација на Здружението на Физиотерапевти на Република Македонија од 26 -29.03.2015 во МАНУ беше одржан првиот Конгрес на физиотерапевти на Р. Македонија. Масовен конгрес со учество на 130 медицински лица од 13 земји Бугарија, Турција, Албанија, од сите држави на поранешната СФРЈ , потоа Италија, Швајцарија и Велика Британија.

Во периодот од четири дена беа презентрани 34 предавања и 5 постер презентации со кои беа обработени теми од спортската, педијатриската, кардиоваскуларната, невролошката и посттрауматската рехабилитација и респираторната терапија.

Од Специјалната болница по хируршки болести „Филип Втори“ предавачи и активни учесници ,кои инзворедно ја презентираа стручноста и посебноста на нашите новини од оваа област беа:1. Проф. д-р Ѓорѓи Зафировски – „Предскажувачки фактори кои влијаат на брза рехабилитација после ортопедски оперативни процедури“2. Доц. д-р Милка Клинчева – „Кардиопулмонална рехабилитација во единиците за интензивна нега“

3. Дипл. физиотерапевт Олгица Димитров – „Физикална и респираторна терапија кај акутна невромускулна слабост стекната во единица за интензивно лекување кај пациенти на продолжена механичка вентилација по хируршка интервенција “. Димитров имаше и презентцаија на тема: „Позиционирање и мобилизации кај долголежечки пациенти во единица за интензивно лекување“4. Дипл. Физиотерапевт Блаже Арсов – „ Меѓутимската соработка на одделот за интензивна нега ,како предуслов за успешно закрепнување во Специјалната болница по хирурчки болести “Филип Втори”. Арсов имаше и постер презентација на тема „ Влијанието на интерминтентиниот CPAP третман во процесот на респираторна рехабилтација кај кардиохируршки пациенти “

Специјален гостин на настанот беше професор Силверио Ди Рока од Италија кој за прв пат во Македонија ја презентираше Миофункционалната Постурална рехабилитација .Неколку од работилниците на кнгресот беа спроведени од сертифицирани физиотерапевти за лимфна дренажа и менаџмент на лимфедемот, комбинирани мануелни техники , Mirror Therapy, функционална магнетна стимулација, и други нови популарни техники од светската физиотерапија.

Еден од Спонзорите на настанот беше Фила Фарм ДООЕЛ која дел од својата понуда ја претстави на присутните .Конгресот официјално беше отворен од Академик Поленаковиќ од Истражувачкиот центар за генетско инженерство и биотехнологија „Георги Ефремов“ .

Конгресот допринесе во информирањето и пренесувањето на новите светски достигнувања на Физикалната терапија и рехабилитација а воедно го презентираше и напредокот на македонските физиотерапевти. Во периодот додека траеше конгресот учесниците имаа можност да уживаат во изложбата “Гушни ја реткоста” која беше поставена по повод светскиот ден на ретки болести и за истата придонес дадоа популарни личности од јавниот живот кај нас и лица со ретки болести. Претставници од Националната алијанса за ретки болести беа присутни во текот на конгресот и имаа исклучителна можност на лице место да се консултираат со физиотерапевтите и да ги споделат своите потреби .Во соработка со платформата за активизам “Лице в Лице”колпортерите на истоимениот магазин беа присутни во текот на конгресот со што учесниците на конгресот можеа да го набават магазинот и директно да ги подржат социјално ранливите категории на луѓе од нашето општество.

Петар: „Морав да се оперирам сега бидејќи сакам да бидам здрав за моето трето дете“

Зоран: „Ме лекуваа 4 месеци од астма, а јас сум имал расцепена аорта “

Едниот е Петар има 38 години родум од Прилеп, другиот е Зоран 35 години од Скопје. Двајца пациенти со убави години и лоша дијагноза, аневризма на аорта. Нив ги поврзува и болеста но и оперативната метода по која животите им беа спасени, т.н „Тајрон Дејвид“. Но, да тргнеме по ред. Петар за својот проблем знаел уште од пред 14 години, чекал вистинско време за да го реши. Аневризма е проширување на димензиите на аортата кое што обично настанува како резултат на генетска предиспозиција. Се работи за сврзното ткиво што се наоѓа на ѕидот на аортата, има промени и осетливо е на високиот притисок . Кога настанува висок притисок при испумпувањето на крвта доаѓа до проширување наречено дилатација на аортата. Место каде што најчесто настанува тоа проширување е аортниот корен, односно делот од каде што аортата излегува од срцето. Сите овие години на Петар внимателно , со редовни прегледи следени се димензиите на проширувањето на коренот. Бидејќи истите можат да се толерираат до одредена големина, а потоа операцијата е неминовна.

Тој вели : “ Во сета оваа несреќа можам да кажам дека имав и среќа со тоа што го открив проблемот на време и на времено почнав да бидам третиран, со цел да го намалам притисокот и срцевиот ритам . Четиринаесет години живеев со чувство дека еден ден ќе дојде моментот кога ќе треба да се направи таа тешка операција, но исто така и 14 години имав време да размислам каде и кој ќе ја прави операцијата, дали ке биде во Македонија или во странство. Во текот на тие години формирав семејство се родија близначиња момче и девојче, напредував на професионален план, се случија многу нешта кои се составен дел на животот кој го прават и убав и тежок. Бескрајна благодарност до д-р Борка Георгиева која беше со мене и мојот проблем , ме следеше сите овие години. Дојде долго очекуваниот момент како што тоа најчесто во животот и се случува , тогаш кога е најтешко. Не случајно одлучив операцијата да ја направам сега бидејќи за околу 2 месеци ќе станам татко по трети пат. Д-р Тања Анѓушева ме охрабри дека тоа треба да се случи пред да се роди детето, бидејќи нема ништо поубаво од чувството да го држам моето чедо во прегратка, и благодарам за секој збор . Специјалната болница „Филип Втори“ и д-р Жан Митрев беа мојата одлука, заради многу причини. Кога одев кон операцината сала само едно прашање ме мачеше – Дали ова морам сега да го направам или можев да го пролонгирам, бидејќи немав дисекција однсно расцепување на аортата. Операцијата траеше 5 часа и еве сум жив, сега и потполно здрав. Животот ми го продолжија овде, багодарам за се.“

Приказната на Зоран е поинаква. За разлика од Петар , тој имал симптоми кои лекарот од една друга институција го навеле да размислува дека се работи за астма. Со таа дијагноза е лекуван 4 месеци. Еве дел од раскажувањето на Зоран: „ Четири месеци ме лекуваа од погрешно поставена дијагноза. Немав никакви подобрувања, состојбата ми се влошуваше. Се доведов во ситуација да не можам да изодам 100 метри, од дома до мојот автомобил, заморот беше неподнослив. Тогаш ми направија рентген снимка на градите и најверојатно видоа дека нешто не е во ред со моето срце, не знам, не знам што точно се случуваше. Не верував дека имам таков проблем мислев дека астмата е виновна за моите маки. Ми беше кажано дека имам проширување на аортата со големина од 6 см во истата болница во која ме лекуваа од астма. Сакав уште една консултација, стручно мислење , дојдов во „Филип Втори“. По прегледот д-р Анѓушева ми објасни за мојот проблем, бев шокиран од информацијата. Јас кој живеам здраво спортувам, мене да ми се случи нешто толку сериозно. Морав под итно да влезам во операцина сала. Следуваше уште еден шок .Не само што имав проширување на аортата и тоа не со првичните димензии од 6 см туку од 8,8 см, јас имав и расцепување на аортата. Премногу сериозно, страшно звучеше сето тоа , но беше вистина ,моја вистина. Операцијата заврши добро, голема благодарност до тимот на д-р Митрев , но и на луѓето од МА ГАМИНГ ДООЕЛ“, вечно ќе им бид ам благодарен.

Според објаснувањето на д-р Анѓушева кај Зоран е дијагностицирана аневризма со дисекција односно расцепување , откинување , одлепување на внатрешниот слој кој се вика интима на аортата, од останантите слоеви, од мускулниот слој и сврзното ткиво. При што настанува крварење , ѕидот се истенчува, и постои опасност таа аорта да пукне. Кај Зоран е констатирано расцепување на ендотелот на интимата, одлепување кое што почнува од ниво на самите залистоци продолжува нагоре кон лакот на аортата, дури и во местата каде што се одвојуваат големите крвни садови за главата и горниот дел од телото.Тоа претставува животно загрозувачка состојба. Единствен начин на лекување на оваа состојба е оперативното лекување каде што во суштина се врши замена на проширениот односно, на раскинатиот дел на аортата со полиуретанска цевка . Но кога се однесува на аортната валвула постојат различни техники. Истата може да биде заменета со механичка протеза, може и со биолошка протеза, но ако залистоците на самата валвула се уредни тогаш се прави специјална техника која се нарекува Тајрон Дејвид според авторот што ја изумил . Се одвојуваат залистоци од местото каде се сместени од природниот аортен прстен, се скројуваат и потоа се врградуваат во протезата која ја заменува аортата. Следниот чекор е нивно зашивање на аортниот корен на излезиштето од левата комора каде што и природно излегува аортата.Предноста на овој метод е што немаме вештачко ткиво на валвулата, нема потреба од антикоагулантна терапија, нема појава на сили на триење од вештачкото ткиво и крвните елементи, црвените крвни зрнца и тромбоцитните клетки остануваат во нормална состојба и функција. Оваа операција и оваа техника е многу сложена, бара врвна стручност од хирургот кој ја изведува истата . Во светот постојат мал број на медицински центри кои се какрактеристични по тоа што реализираат голем волумен на ваков тип операциии . Во „Филип Втори“ направени се околу 340 операции според „Тајрон Дејвд“ во овие 15 години .И она што е најважно , со добар исход по пациентите после операција.

Голем човек – силна жена, медицината е нејзиниот живот

Д-р Тања Анѓушева медицинскиот директор на Специјалната болница по хируршки болести “Филип Втори“ е избрана за жена менаџер за 2014 година. Маркетинг агенцијата „Марили“ е идеен творец на ова несекојдневно посветување на жените менаџери и нивно јавно признание за она што се нарекува изминат труд и резултати. Нејзиниот генерален менаџер г-ѓа Лидија Трипуноска традиционално 19 години ги прогласува најуспешните жени кои се на раководни позиции, првенствено во приватниот сектор. Секоја година во „Избор на жени менаџери од Р.Македонија и дијаспората“ се претставуваат 10 лауреатки. Чест за организаторот беше присуството на Академик д-р Жан Митрев кој сношти ја отвори манифестацијата. И не случајно тој, бидејќи е пример и поттик како со врвна едукација, посветеност, храброст и верба во себе може светот да дознае за една успешна македонска приказна, препознаена во болницата „Филип Втори“. При неговото обраќање ги потсети присутните за неколку вистини поврзани со борбата на жената низ историјата, за своето место под Сонцето. Посакувајќи им уште многу успеси на жените во сите полиња на нивното дејствување д-р Митрев за прв пат откри и еден момент за новата болница која наскоро треба да ја отвори. Истата ќе има ново име , име на жена.

Нашата д-р Тања Анѓушева е супспецијалист кардиолог , во болницата „Филип Втори“ е од нејзиното основање од 2000 година. Таа беше првиот и вистинскиот избор на лекар од страна на д-р Митрев. Потекнува од семејство во кое за хуманоста и борбата на здравјето се зборувало уште кога таа ги имала годините на дете. Нејзиниот татко исто така бил доктор и таа сакајќи да помага,тргнала по неговите стапки, ја одбира најхуманата професија за свој живот. Визијата на д-р Митрев за едукација на сопствениот кадар, во 2004 година и овозможува на д-р Анѓушева надградување на знаењето во престижниот Дојче Херц Центрум во Берлин.

За стручноста и посветеноста на д-р Анѓушева во неколку наврати признанија и оддава и светот . Меѓу многуте награди би ги истакнале : Награда за најдобра усна презентација и најдобра аудио и визуелна презентација на 6-от Интернационален Конгрес на Интернационалното здружение за минимално инвазивна кардиохирургија . Награда за најдобар case report на 10-тиот годишен состанок, CTT, Мајами, САД. Признание за професионализам како лекар од Министерство за Одбрана на Р. Словенија, Словенски корпус SICON 17 KFOR.

Таа е коавтор на повеќе стручни трудови со д-р Митрев, како и со други колеги врвни лекари од матичната болница но и од други држави. Член на голем број светски здравствени, кардиолошки здруженија и асоцијации.Како одговорна на одделот за интензивна нега секојдневно е на линијата помеѓу животот и смртта, пациентите во неа гледаат спасител, таа која ќе ги извлече, која ќе го најде вистинскиот начин тие да преживеат. Како што пишува во пораката на една пациентка: „ Д-р Анѓушева е мојот ангел чувар“. Прва во борбената линија, таа, но заедно со сите нејзини колеги . А , ако ги прашате нив каква колешка е д-р Анѓушева тие се едногласни во одговорот. Енергична, несебична која знае да донесе одлука, но знае да ги понесе и последниците од истата . Жена која е беспрекорен тимски работник , во која гледаат и пријател и претпоставен, искрена и упорна во остварување на работните обврски. Предност и чест да се работи со неа, голем другар, вистинска жена на вистинско место.

Манифетсацијата годинава се одржа под мотото „Зрдавјето и убавината во функција на современата жена“. Во рамки на тематскиот дел кој се случуваше ден порано свое предавање имаше д-р Милка Клинчева специјалист интернист од нашата болница. Таа аудиториумот го едуцираше за значењето на превенцијата на болестите и последиците од негрижата за сопственото здравје. Ставајќи акцент на здравјето на жената која е постојано на крстосницата помеѓу домот и работата.

Влијание на „Слип апнеа“ синдром врз појава на дијабетес мелитус тип 2

Модерниот начин на живот во голема мера влијае на модифицирање на навиките за спиење. Времетраењето на периодот поминат во спиење со тек на децениите се скратувал од 8 на 6,5 часови во просек. Работењето во смени , патувањето во различни временски зони, недоволното време поминато во спиење се фактори кои водат кон пореметување на циркадијаниот ритам и дисинхронизираност на главната хипоталамично-хипофизна оска.

Слип апнеа означува престанок на дишење кое е со кратко времетраење во текот на сонот (10, 20 секунди). По што оној кој има проблем почнува да се бори во сонот за воздух. Тој циклус трае еден период но може и цела ноќ, а оној што го има проблемот не е свесен за тоа. Слип апнеа е синдром кој се јавува кај 4 – 15% од популацијата, поврзан не само со пореметување на спиењето, туку и со повторувачки падови на сатурацијата на хемоглобинот со кислород во тек на спиењето. Епидемиолошките студии го идентифицирале пореметеното спиење и како индивидуален ризик фактор за кардиоваскуларниот морбидитет и морталитет.

Пореметувањето на спиењето многу често е поврзано со пореметената гликорегулација ,поточно со метаболниот синдром и дијабет од типот 2. До овие сознанија е дојдено во тек на истражувањата правени со цел да се утврди поврзаноста помеѓу метаболните нарушувањеа и слип апна синдромот.Утврдена е поврзаност помеѓу неадекватниот квалитет на спиењето со гликозната интолеранција, инсулинската резистенција и дисфункција на Бета клетките во Лангерхансовите островца на панкреасот. Секако тука е земена в предвид и улогата на хипоталамично-хипофизарно-надбубрежна оска и нејзиното влијание на пореметување во метаболизмот на маснотиите, активацијата на симпатичкиот нервен систем и оксидативниот стрес на ткивата .Во тек на овие истражувања доједено е до заклучок дека постои адиционална поврзаност помеѓу слип апнеа синдром , интермитентната хипоксија, нарушувањето на спиењето и патогенезата на дијабет мелитус од типот 2.