Месец: м.г

И слепото црево може да биде причина со смртни последици

Санчез Мевљида нашинка која 25 години работи и живее во Швајцарија засекогаш ке го помни Велигденските празници. Наместо дружење со пријателите и убави средби со фамилијата во Македонија, таа деновите од краткиот одмор ги поминува во борба за сопствениот живот. По барање на г-ѓа Санчез Ви ја пренесуваме нејзината голгота . Низ солзи и горчина ни раскажа за се она што и се случувало, не можејќи да поверува дека преживеа:„ Прво да се заблагодарам на оваа болница , на овие доктори кои ми го спасија животот. Мојата мака беше голема .Никогаш не сум имала посериозни проблеми со здравјето, некој тешки болести и слично. Но ова што го преживеав ќе го раскажувам секаде. За Велигден дојдов со мојот сопруг и керќичката во македонија бидејќи се насобраа неколку нерабтни денови и моите роднини беа послободни. На 4 април добив силни болки во пределот на стомакот. Не можев да ги поднесам и заминав во една болница. По направеното ЕХО и лабораторија лекарот не откри никаков проблем , ми посочи дека се работи за гасови кои ми создаваат грчеви. Ми препиша лекарства за полесно поднесување на болките. Но тие не ми поминуваа.

Седниот ден заминав во друга јавна здравствена установа. Болките во абдоменот тој доктор ми ги поврза со нарушен метаболизам заради промена на климата и патувањето од Швајцарија во Македонија. И тој ми препиша некој лекови.Од нив имав мачнини и повраќав. Ме упатија и на гинеколошки преглед сомневајќи се дека може да имам цисти кои исто така знаат да бидат болни. Му велам на докторот дека комплетен гинеколошки преглед имам направено пред 15 дена во Швајцарија со одлични резултати но тој ми вели дека цистите можеле да се формираат и за 24 часа. Со тоа ме убеди да заминам и на гинеколог. Како и што очекував се беше уредно. А, болките не ми се намалува, во меѓувреме ми се покачи телесната температура, а болките почнаа да ми се шират од стомакот кон градниот кош. Заминав во друга, овој пат приватна болница надевајќи се дека таму ќе ми посветат повеќе внимание. Но за жал погрешив и изгубив време. Добив една инфузија , ми ја пуштија за да ме освежат, седев на стол покриена со ќебе и се тресев од грозница, не можев да се стоплам,се чувствував премрзнато. Потоа заминав дома, болките максимално ме истоштија добив тахикардија која навистина ме исплаши. Сопругот ми предложи со хеликоптер да ме однесат за Швајцарија , бидејќи овде никој не ми помогна, но сето тоа не можеше да се организра така брзо. Пет дена поминав низ 4 здравствени установи, никој не можеше да открие која е вистинската причина за лошата состојба во која се наоѓаше мојот организам. Утрото на 9 април Велики Петок тахикардијата ми стана неподнослива и веднаш заминав во една приватна кардиолошка амбуланта во Бутел. По извршените прегледи доктот ме упати во Специјалната болница „Филип Втори“ . По приемот кај нас направени и се сите потребни испитувања, комплетна анализа на крвта , ЕХО и компјутерска томографија при што е дијагностицирано прснато слепо црево кое е загноено. Ненавремената операција довела до загнојување и на дел од дебелото црево. Пациентката веднаш е внесена во операциона сала .Исчистен е целиот зафатен дел, а отстрането е и парче од дебелото црево. Направени се специјални преврски со вакум за да се исчисти стомачната шуплина од гноевата содржина која се излила во стомакот со прскање на слепото црево. Абдоминалниот хирург д-р Бошко Ставревски кој ја изврши операцијата вели дека во неговата неколку децениска лекарска работа ова е трет случај на прснато слепо црево кое се наоѓа во таква атипична позиција, но и прв пациент кој со толку лоша слика и животно загрозен се уште стои на нозе. По 10 дневен престој во болницата пациентката е пуштена дома. На 22 април г-ѓа Санчез наполни 46 години додека ни раскажуваше , солзите беа посилни од неа, жали што не може да се врати дома со нејзините најмили , но во сета несреќа како што ни кажа, среќна е што е жива.

Петар: „Морав да се оперирам сега бидејќи сакам да бидам здрав за моето трето дете“

Зоран: „Ме лекуваа 4 месеци од астма, а јас сум имал расцепена аорта “

Едниот е Петар има 38 години родум од Прилеп, другиот е Зоран 35 години од Скопје. Двајца пациенти со убави години и лоша дијагноза, аневризма на аорта. Нив ги поврзува и болеста но и оперативната метода по која животите им беа спасени, т.н „Тајрон Дејвид“. Но, да тргнеме по ред. Петар за својот проблем знаел уште од пред 14 години, чекал вистинско време за да го реши. Аневризма е проширување на димензиите на аортата кое што обично настанува како резултат на генетска предиспозиција. Се работи за сврзното ткиво што се наоѓа на ѕидот на аортата, има промени и осетливо е на високиот притисок . Кога настанува висок притисок при испумпувањето на крвта доаѓа до проширување наречено дилатација на аортата. Место каде што најчесто настанува тоа проширување е аортниот корен, односно делот од каде што аортата излегува од срцето. Сите овие години на Петар внимателно , со редовни прегледи следени се димензиите на проширувањето на коренот. Бидејќи истите можат да се толерираат до одредена големина, а потоа операцијата е неминовна.

Тој вели : “ Во сета оваа несреќа можам да кажам дека имав и среќа со тоа што го открив проблемот на време и на времено почнав да бидам третиран, со цел да го намалам притисокот и срцевиот ритам . Четиринаесет години живеев со чувство дека еден ден ќе дојде моментот кога ќе треба да се направи таа тешка операција, но исто така и 14 години имав време да размислам каде и кој ќе ја прави операцијата, дали ке биде во Македонија или во странство. Во текот на тие години формирав семејство се родија близначиња момче и девојче, напредував на професионален план, се случија многу нешта кои се составен дел на животот кој го прават и убав и тежок. Бескрајна благодарност до д-р Борка Георгиева која беше со мене и мојот проблем , ме следеше сите овие години. Дојде долго очекуваниот момент како што тоа најчесто во животот и се случува , тогаш кога е најтешко. Не случајно одлучив операцијата да ја направам сега бидејќи за околу 2 месеци ќе станам татко по трети пат. Д-р Тања Анѓушева ме охрабри дека тоа треба да се случи пред да се роди детето, бидејќи нема ништо поубаво од чувството да го држам моето чедо во прегратка, и благодарам за секој збор . Специјалната болница „Филип Втори“ и д-р Жан Митрев беа мојата одлука, заради многу причини. Кога одев кон операцината сала само едно прашање ме мачеше – Дали ова морам сега да го направам или можев да го пролонгирам, бидејќи немав дисекција однсно расцепување на аортата. Операцијата траеше 5 часа и еве сум жив, сега и потполно здрав. Животот ми го продолжија овде, багодарам за се.“

Приказната на Зоран е поинаква. За разлика од Петар , тој имал симптоми кои лекарот од една друга институција го навеле да размислува дека се работи за астма. Со таа дијагноза е лекуван 4 месеци. Еве дел од раскажувањето на Зоран: „ Четири месеци ме лекуваа од погрешно поставена дијагноза. Немав никакви подобрувања, состојбата ми се влошуваше. Се доведов во ситуација да не можам да изодам 100 метри, од дома до мојот автомобил, заморот беше неподнослив. Тогаш ми направија рентген снимка на градите и најверојатно видоа дека нешто не е во ред со моето срце, не знам, не знам што точно се случуваше. Не верував дека имам таков проблем мислев дека астмата е виновна за моите маки. Ми беше кажано дека имам проширување на аортата со големина од 6 см во истата болница во која ме лекуваа од астма. Сакав уште една консултација, стручно мислење , дојдов во „Филип Втори“. По прегледот д-р Анѓушева ми објасни за мојот проблем, бев шокиран од информацијата. Јас кој живеам здраво спортувам, мене да ми се случи нешто толку сериозно. Морав под итно да влезам во операцина сала. Следуваше уште еден шок .Не само што имав проширување на аортата и тоа не со првичните димензии од 6 см туку од 8,8 см, јас имав и расцепување на аортата. Премногу сериозно, страшно звучеше сето тоа , но беше вистина ,моја вистина. Операцијата заврши добро, голема благодарност до тимот на д-р Митрев , но и на луѓето од МА ГАМИНГ ДООЕЛ“, вечно ќе им бид ам благодарен.

Според објаснувањето на д-р Анѓушева кај Зоран е дијагностицирана аневризма со дисекција односно расцепување , откинување , одлепување на внатрешниот слој кој се вика интима на аортата, од останантите слоеви, од мускулниот слој и сврзното ткиво. При што настанува крварење , ѕидот се истенчува, и постои опасност таа аорта да пукне. Кај Зоран е констатирано расцепување на ендотелот на интимата, одлепување кое што почнува од ниво на самите залистоци продолжува нагоре кон лакот на аортата, дури и во местата каде што се одвојуваат големите крвни садови за главата и горниот дел од телото.Тоа претставува животно загрозувачка состојба. Единствен начин на лекување на оваа состојба е оперативното лекување каде што во суштина се врши замена на проширениот односно, на раскинатиот дел на аортата со полиуретанска цевка . Но кога се однесува на аортната валвула постојат различни техники. Истата може да биде заменета со механичка протеза, може и со биолошка протеза, но ако залистоците на самата валвула се уредни тогаш се прави специјална техника која се нарекува Тајрон Дејвид според авторот што ја изумил . Се одвојуваат залистоци од местото каде се сместени од природниот аортен прстен, се скројуваат и потоа се врградуваат во протезата која ја заменува аортата. Следниот чекор е нивно зашивање на аортниот корен на излезиштето од левата комора каде што и природно излегува аортата.Предноста на овој метод е што немаме вештачко ткиво на валвулата, нема потреба од антикоагулантна терапија, нема појава на сили на триење од вештачкото ткиво и крвните елементи, црвените крвни зрнца и тромбоцитните клетки остануваат во нормална состојба и функција. Оваа операција и оваа техника е многу сложена, бара врвна стручност од хирургот кој ја изведува истата . Во светот постојат мал број на медицински центри кои се какрактеристични по тоа што реализираат голем волумен на ваков тип операциии . Во „Филип Втори“ направени се околу 340 операции според „Тајрон Дејвд“ во овие 15 години .И она што е најважно , со добар исход по пациентите после операција.

Влијание на „Слип апнеа“ синдром врз појава на дијабетес мелитус тип 2

Модерниот начин на живот во голема мера влијае на модифицирање на навиките за спиење. Времетраењето на периодот поминат во спиење со тек на децениите се скратувал од 8 на 6,5 часови во просек. Работењето во смени , патувањето во различни временски зони, недоволното време поминато во спиење се фактори кои водат кон пореметување на циркадијаниот ритам и дисинхронизираност на главната хипоталамично-хипофизна оска.

Слип апнеа означува престанок на дишење кое е со кратко времетраење во текот на сонот (10, 20 секунди). По што оној кој има проблем почнува да се бори во сонот за воздух. Тој циклус трае еден период но може и цела ноќ, а оној што го има проблемот не е свесен за тоа. Слип апнеа е синдром кој се јавува кај 4 – 15% од популацијата, поврзан не само со пореметување на спиењето, туку и со повторувачки падови на сатурацијата на хемоглобинот со кислород во тек на спиењето. Епидемиолошките студии го идентифицирале пореметеното спиење и како индивидуален ризик фактор за кардиоваскуларниот морбидитет и морталитет.

Пореметувањето на спиењето многу често е поврзано со пореметената гликорегулација ,поточно со метаболниот синдром и дијабет од типот 2. До овие сознанија е дојдено во тек на истражувањата правени со цел да се утврди поврзаноста помеѓу метаболните нарушувањеа и слип апна синдромот.Утврдена е поврзаност помеѓу неадекватниот квалитет на спиењето со гликозната интолеранција, инсулинската резистенција и дисфункција на Бета клетките во Лангерхансовите островца на панкреасот. Секако тука е земена в предвид и улогата на хипоталамично-хипофизарно-надбубрежна оска и нејзиното влијание на пореметување во метаболизмот на маснотиите, активацијата на симпатичкиот нервен систем и оксидативниот стрес на ткивата .Во тек на овие истражувања доједено е до заклучок дека постои адиционална поврзаност помеѓу слип апнеа синдром , интермитентната хипоксија, нарушувањето на спиењето и патогенезата на дијабет мелитус од типот 2.

Интервентно решавање на вентрикуларен септален дефект и стеноза на бискуспидна аортна валвула

Вентрикуларниот септален дефект (дефект во меѓукоморната преграда) е најчест вроден срцев дефект кој се јавува кај 50 % од новородените со срцева мана. Kај возрасните инциденцата на овој дефект е веднаш зад бикуспидната аортна валвула (аортен залисток со две наместо со три ливчиња).Третманот на ВСД кај децата зависи од симптоматологијата и неговата големина. При мал дефект најчесто не е потребен никаков третман, но кај среден и голем ВСД се оди на интервентно или оперативно решавање.
Прикажуваме случај на 5 годишен пациент Ф. О. , со комбинирана срцева вродена мана – вентрикуларен септален дефект од 4 мм и бикуспидна аортна валвула. Пациентот на 1,5 месечна возраст е за прв пат дојден на ехокардиографска кардиолошка проценка во нашата установа поради чести респираторни инфекции, со дијагностициран ВСД во друга институција. Заедно со постоењето на ВСД дијагнсотицирана е бискуспидна аортна валвула (аортен залисток со две наместо со три ливчиња), без одраз на циркулацијата. За избегнување на голем оперативен зафат на малото дете, беше препорачано интервентно затворање на ВСД и редовно следење на состојбата на бискуспидната аортна валвула. Во март 2013 година , на негова 4 годишна возраст, е направено интервенто затворање на ВСД 4мм (слика 1) со Asymetric septal occluder (Cera tm, Life Tech) 4 мм без резидуален шант по интервенцијата (слика 2).

Слика 1

Слика 2

Една година после интервенцијата е забележано зголемување на брзината на проток низ бикуспидната аортна валвула со зголемување на притисочниот градиент, што е и очекувана состојба по затварањето на вентрикуларниот септален дефект. По две години, добивме податок од родителите за замор и малаксаност на детето, а ехокардиографскиот наод покажа намалување на отворот на аортата (АВА) на 0.7 см2. Пациентот е разгледан конзилијарно, во договор со кардиохирург, при што беше донесена одлука за нов интервентен третман на аортната стеноза, од типот на балон дилатација на бикуспидната аортна валвула.На 31.03.2015 направена е балонвалвулопластика на аортната стеноза. Истата е реализирана со балон катетер Tyshak 10/30 мм. при што се доби намалување на градиентот низ бикуспидната аортна валвула од 118 мм/Хг пред интервнецијата до ПГ од 60 мм/Хг по интервенцијата и зголемување на АВА на 1.3 см2 (слика 3).

Слика 3

Овде сакаме да ја поентираме предноста во тимскиот пристап за навремено решавање на овие две различни вродени состојби, со засега интервентен начин, со кој истите дефинитивно се решаваат или се одложува нивно оперативно решавање, се до раст во возрасна доба. На тој начин се избегнуваат повеќекратни операции на отворено срце.
Цело е кога има се, а интердисциплинарниот пристап е атрибут на тимската работа

Фрактура (скршеница) на вратот на бутната коска

Бутната коста (фемур) е најдолгата коска во човековото тело. Вратот на бутната коска претставува структура која ги поврзуваува телото и главата на фемурот. Кај помладата популација фрактурите најчесто настануваат при директно дејство на сила со голем интензитет, во пределот на колкот. Кај повозрасните луѓе причините се поврзани со постоење на придружни болести на коските како што е остеопорозата. Кај овие лица скршениците во најголемиот број се последица на паѓање или сопнување.

ПРИКАЗ НА СЛУЧАЈ: Пациентка со фрактура на врат на бутната коска како резултат на пад од вртоглавица предизвикана од двојно кникување (т.н кингкинг извиткување) на двете каротидни артерии

Пациентка на 75 годишна возраст е примена во нашата болница со силни болки во пределот на десниот колк. Пред приемот пациентката имала вртоглавица со губиток на свеста, при што паднала. Направен е ортопедски преглед, дијагностицирана е акутна фрактура на вратот на бутната коска. Индициран е оперативен третман. Предоперативно направен е ЕХО Доплер преглед на каротидните артерии, при што е верифицирано кинкинг (извиткување) на двете каротидни артерии. Дијагнозата е потврдена и со 64-МСКТ каротидографија. Кинкингот на каротидните артерии е можна причина за вртоглавицата и губитокот на свеста.

Пациентката е итно оперирана, при што и е вградена тотална биполарна ендопротеза (вештачки колк) на десниот колк. Постоперативните контролни рентген слики се со уредно поставена тотална ендопротеза. Започната е рана физикална терапија уште од првиот постоперативен ден вклучена е антиагрегатна терапија(лекови кои оневозможуваат создавање на тромби). Пациентката застана на нозе веќе во вториот постоперативен ден, отпуштена е од болница 7 дена по операција

Последицата од падот кај пациентката успешно се излекува . Остана оперативно да се лечи и причината т.е извткувањето на каротидните артерии, кое довело до губиток на свест и настанување на скршеницата. Редовните контроли на здравјето се најбитни за навремената дијагноза. Ненавременото откривање на кинкингот не само што доведува до вакви последици туку води и до губиоток на мозочната маса, функциите на свесност и на моториката кај пациентите.

Спасувачка операција на мозок

Пациент на 69 годишна возраст примен во “Филип Втори” за хируршка реваскуларизација на миокардот. Во склоп на предоперативната подготовка ехографски верифицирана е сигнификантна стеноза на претходно имплантираниот стент на левата внатрешна каротидна артерија и потполна непроодност на десната внатрешна каротидна артерија која претходно е оперирана во друга установа. Симптоми: зуење во ушите, изразени вртоглавици, потешкотии во говорот, левострана пареза, градна болка. Ризик фактори: поранешен пушач, артериска хипертензија и хиперлипидемија.

Напраен е 64МСКТ со наод: Десна внатрешна артерија комплетно непроодна, лева внатрешна каротидна артерија 90 % стеснета во поставениот стент.

МСКТ СЛИКА ПРЕДОПЕРАТИВНО

Индицирана е итна, спасувачка операција на крвни садови кои го снабдуваат мозокот со крв ( лева внатрешна каротидна артерија).

Операција: Ресекција на левата заедничка и внатрешна каротидна артерија со лигатура на надворешната и премостување со VSM. Т-Т анастомоза со ACC и ACI лево.

Постоперативно пациентот е со подобрување на невролошките симптоми

Направена е контролна постоперативна 64МСКТ каротидографија со уреден постоперативен наод.

МСКТ СЛИКА ПОСТОПЕРАТИВНО

Првиот постоперативен ден пациентот е самостојно мобилизиран, вториот постоперативен ден е пуштен дома и се создадоа услови за извршување на хируршката реваскуларизација на миокардот со значително намален ризик од мозочен удар.Поради терминален стадиум на атеросклеротската болест на крвните садови на срцето ( pRCA 99%, rPDA 90%, pCIRC 99%, LM 95%, mRCA 80%). Седмиот ден после операцијата на левата каротидна артерија се направија три бајпаси на срцето. Постоперативно пациентот е без никакви кардиални компликациии со уреден постоперативне тек и без никакви невролошки компликации.

Специјалната болница „Филип Втори“ ќе стане медицински партнер на ракометниот камп „Кирил Лазаров 7“

Специјалната болница по хируршки болести „Филип Втори“ има особена чест да ја информира јавноста дека ќе биде медицински пријател и партнер на ракометниот камп „Кирил Лазаров 7“. Најдобриот стрелец на планетава, најдобриот голгетер во Европа, актуелен најдобар десен бек на светот има одлична идеја која ние како врвна болница ја поддржуваме.
Задоволството е обострано бидејќи се воспоставува конекција помеѓу НАЈДОБРИОТ со НАЈДОБРИОТ во името на здравиот дух и здравите животни навики кои ги пропагира нашиот капитен Кирил Лазаров како врвен професионалец и Академик д-р Жан Митрев врвен кардио-хирург кој 15 години од основањето на болницата „Филип Втори’’ постојано работи во тој правец, подигање на здравствената култура кај населението. Грижата за децата е најголемата обврска што ја има едно семејство, едно општество, а болницата „Филип Втори“ многупати досега ја потврдила на најхуман можен начин својата општествена одговорност кон децата но и кон многу други пациенти од различни генерации. Средбата помеѓу двајцата големи Македонци ракометарот на „Барселона“ Кирил Лазаров и Академик д-р Жан Митрев револционер во кардиохирургијата во Македонија, ќе се случи кон крајот на месецов, со што ќе се официјализира оваа соработка.

По иницијатива на Академик д-р Жан Митрев сите деца пред да заминат во Охрид , ќе имаат можност во Специјалната болница по хируршки болести „Филип Втори“ да добијат комплетен медицински систематски преглед. Истиот ќе вклучува контрола на целиот организам на децата, работа на виталните органи, со сите потребни проверки за да бидат максимално посветени на спортскиот предизвик во тие 7 дена, колку што ќе трае ракометниот камп. Бидејќи ќе има дечиња од цела Македонија, д-р Митрев ќе обезбеди превоз на сите деца без оглед на градовите од кои доаѓаат на претходно организираните систематски прегледи. Нашиот тим кој ќе замине на кампот ќе се состои од 2 лекари, 1 физеотерапевт и 1 психолог, кои ќе бидат максимално посветени на децата преку 24 часовен здравствен мониторинг.
Едукативниот дел од кампот кој ќе го оргазираме ние ќе содржи 3 интерактивни работилници на тема: „Во здраво тело здрав дух“ , „Здравјето и исхраната“ и „Спортот и здравјето“. Тие ќе бидат прилагодени на интересите и возраста на децата. Се надеваме на долгорочна плодна соработка со нашата ракометна легенда Кирил Лазаров.

Со почит
Специјална болница по хируршки болести „Филип Втори“