Месец: м.г

Прошетка низ одделите во Специјализираната болница Жан Митрев, презентирање на стандардните услуги, но и кои се специјалностите на болницата, а секако, и средба со медицинскиот директор д-р Емил Стоицовски беа на агендата на групата на студенти од Факултетот за медицински науки и резонанца, отсек радиологија од Приштина. Речиси сите беа воодушевени од опремата, од изгледот на болницата, од организираноста, а пред се` од стручноста на персоналот. Добредојде на идните медицински лица им посака д-р Стоицовски кој изрази задовоство од вакви средби, а при тоа потенцираше дека болницата е отворена за понатамошна соработка и реализирање на други средби. Подетална презентација за  услугите имаа д-р Дашурие Незири и д-р Мимоза Османи, а одговораа и на дополнителни прашања на студентите.Тие се заблагодарија за организацијата и искажаа подготвеност за понатамошна соработка. Студентите имаа можност од дополнителни информации и за време на неформалното дружење на коктелот кој се служеше во ресторанот на болницата.

Д-р Жан Митрев, на 05 јули, 2017 ја реализираше иницијативата за средба со претставници од локалните и регионални телевизиски куќи од земјата, а во насока на подобра информираност на граѓаните за медицинските услуги во Специјализираната болница Жан Митрев. Добредојде на гостите им посака д-р Емил Стоицовски, медицинскиот директор кој преку презентација ги претстави сите услуги, но и новитети и специфики за институцијата. Се осврна на историјата на болницата која во март 2017 одбележа 17 години од постоење, потстети за првиот пациент, но и други пациенти кои ги слават нивните “втори“ родендени, се задржаа за новитетите на болницата во областа на генетиката и електрофизиологијата, педијатрија, ОРЛ и дерматологија.. За бројните успешни операции од кардиоваскуларната хирургија, но и од ортопедијата, гинекологија, урологија, абдоминална хирурија, како и за најсовремениот дијагностички центар зборуваше д-р Стоицовски. Во претставувањето стави акцент и на научната дејност, бројните трудови, патенти, како и награди и признанија.

Д-р Жан Митрев се приклучи во вториот дел од оваа тематска средба каде ја истакна иницијативата на оваа средба која ја отпочна со медиумите од внатрешноста на земјата. “Целта е да се информираат граѓаните за сето она што ние го правивме овде, а не е само кардиохирургија. Заеднички да ја смениме сликата кај граѓаните дека овде може да се лекуваат граѓани од повеќе болести, како и дека имаме соработка со Фондот за здравство за операции од областа на кардиоваскуларната хирургија. Нашата интенција е да имаме уште повеќе услуги кои ќе бидат покриени од Фондот за здравство, но и во соработка со осигурителните компании. Се надевам дека ова заеднички ќе го правиме“, беше акцентирано од д-р Митрев на средбата. Дека ова е добра иницијатива потврдија и гостите, претставници од повеќе медиуми кои имаа дополителни прашања за д-р Митрев. При тоа ја истакнаа и нивната подготвеност за понатамошна соработка и промени кои треба заеднички да се прват, а водат во насока на подобро здравје на граѓаните.

Како што информираше д-р Митрев, ваквите тематски средби ќе станат пракса во Специјализираната болница Жан Митрев.

Летниот период од годината е време кога семејствата одат на годишни одмори, излети, се одмoраат покрај базен, заминуваат на планина или на море. Иако тоа е период кога треба да се биде релаксиран, сепак многу често дечињата се разболуваат. Кое се најчестите заболувања кај децата во летниот период и како да реагирате и кои мерки да ги преземете, Ви прикажуваме подетално за секој од нив.

Вирусни инфекции

Секој период од годината се карактеризира со одреден вид на предоминатни вирусни инфекции. Во текот на летото најчести се Coxsackie вирусите (Hand, foot & mouth disease) кои предизвикуваат температура, ситен осип на дланките и табаните, како и болни мали афти во устата. Како и со другите вируси, не постои специфичен третман, освен за ублажување на болка и температурата кога се дава парацетамол или ибупрофен, како и давање на многу течности за да се спречи дехидратација.

Ентеровирусите и еховирусите може да предизвикаат широк спектар на симптоми, од многу благи до многу сериозни. Децата може да имаат висока температура, болки во грлото, повраќање, дијареа, главоболка, осип и/или коњуктивитис (црвенило на очите). Овие вируси може да предизвикаат менингитис ( обрнете внимание при јака  главоболка и вкочанет врат) и миокардитис(инфекција на срцевиот мускул).

Аденовирусот  е уште еден од летните вируси кои се манифестираат со висока температура, болки во грлото, конјунктивитис и симптоми на горните респираторни патишта. Овој вирус може да наликува на стрептококна инфекција на грлото, за што е добро да се направат брисеви од грлото, за соодветно да се лекува.

За да се спречи ширењето на овие и други вируси, треба редовно да се мијат рацете, особено по менување на пелена или по користење на тоалетот. Деца со температура или други знаци на болест треба да се изолираат од останатите здрави деца на неколку дена, додека се инфективни. За среќа, повеќето деца се опоравуваат многу брзо.

Труење со храна

Никој не сака, ниту помислува дека можеби ќе се затруе со храна за време на пикник, прошетка или прослава. За жал, труењето со храна е доста често, особено во летниот период, а ги погодува најмногу децата бидејќи тие се почувствителни на дехидрација. Типот на  бактерии  кои најчесто предизвикуваат  труење со храна се: Staphyloccoc;  E.coli, Salmonella и Shigella. Симптомите се слични на типичен “стомачен вирус” – треска, повраќање, дијареа и абдоминална болка. Јавете се на педијатар  доколку Вашето дете има знаци на дехидратација, крвава дијареа или многубројни течни столици. Превенцијата е клучна кога зборуваме за труење со храна, затоа следете ги соодветните процедури за подготовка на храна, готвење и складирање, особено во овие жешки летни денови.

Дехидратација

Дехидрација е најчестиот здравствен проблем кај децата во летниот период, главно бидејќи тие се толку зафатени во детските игри што едноставно заборавааат да пијат течности. Иако изгледа како тие да пијат повеќе течности од вообичаеното, веројатно е помалку од она што на нивните тела им е потребно во топлото време. Ризикот се зголемува доколку тие редовно играат на отворено кога и повеќе се потат. Знаци на дехидрација вклучуваат: жед, замор, сува кожа, сув јазик и многу малку мокрење. Во такви ситуации треба да се даде вода или орална рехидратација за надоместок на изгубените минерали и течности.

Сончаница и изгореници од сонце

Многу луѓе сакаат да се сончаат за да добијат убав темен тен, но при тоа многу лесно и да добијат сончаница и изгореници од сонцето. Ако изгорениците се посериозни се појавуваат пликови и црвенило. За да се спречи ова, треба да не се изожуваат на сонце во периодот од 11:00 до 17 часот попладне, кога сончевите зраци се на најјаки и најштетни. Се препорачува да се носат капи за заштита од сонцето, како  и да се користат креми со висок фактор за заштита при сончање. Сончаницата може да биде и животно-загрозувачка состојба, па затоа треба да се побара лекарска помош.

Алергии

Секоја сезона се карактеризира со посебна група на алергени кои предизвикуваат алегии. Најчестите алергии се слични на поленска треска при што предизвикуваат кивање, чешање на  носот и други иритации. Децата се претежно дома, не одат на училиште, често си играат надвор со што се зголемува нивната изложеност на алергени. Исто така, патувањата и одморот во земји со повисоки концентрации на полен, може да ги влоши симптомите. При патување земете антихистаминици и обидете се да го минимизирате контактот со алергени на коишто е преосетливо Вашето дете.

Убоди од инсекти

Многу инсекти сакаат топла и влажна клима, така што летото е идеално време за нив! Децата почесто играат на отворено во текот на летото, па следствено и фреквенцијата на каснувања од инсекти, исто така, се зголемува. Најчести убоди од инсекти во летниот период се од комарци, крлежи, пчели и оси. Иако не многу сериозни, секое каснување може да предизвика и сериозна алергиска реакција, во кој случај е потребна итна медицинска помош. За да се заштитите од убоди од инсекти користете заштитни средства, хипоалергени, кои се наменети за деца.

Воспаление на ушите и инфекција на очите

Лето значи дека децата одат на пливање и ова е совршено време за посета на базени. Поминување на премногу време во базенот, особено нуркање е лошо бидејќи се зголемуваат шансите за собирање вода во надворешното уво кое може да  доведе до бактериска инфекција. Ова е прилично болно и вообичаено започнува со чешање, а потоа и со послабо слушање од едната страна. При ваква состојба треба да се посети лекар кој може да Ви препише капки или други лекарства. Инфекцијата на ушите може да се избегне ако при пливање се користи капа, со која се покриваат ушите. Очите исто така може да се зацрвенат, да се инфицираат од базените, од хлорот, песокот на плажата. При појава на црвенило, препорачуваме посета на лекар. Очите може да ги заштитите доколку користите наочари пли пливање.

Дијареа

Во летниот период вообичаено се појавуваат и дијареите, стомачните вируси кои може да не се толку сериозни за постарите деца, но се  опасни по живот за малите бебиња. Треба многу да се внимава на хигиената на рацете, како и на миење на овошјето и зеленчукот со чиста вода. Доколку одите на одмор се препорачува да се пие флаширана вода, затоа што така се намалува веројатноста за инфекции со нечиста вода. Во случај на промена на конзистенцијата на столицата, дадете му на Вашето дете пробиотик, течности од електролитен тип и адсорбентска храна како што е компир, ориз, банана. При појава на профузна дијареа јавете се на лекар!!

Тим од Специјализирната болница Жан Митрев и годинава им беа поддршка на младите од  ракометниот камп  „Кирил Лазаров 7“, пред,  за време на тренинзите, но и кога се забавуваа. Најнапред, секој учесник, пред отпочнување со тренинзите помина на комплетен медицински систематски преглед во болницата кој вклучуваше педијатриски и кардиолошки преглед, коронарен стрес тест, а се направија и сите останати потребни медицински проверки. Потоа, за време на кампот, медицинскиот тим беше максимално посветен на децата преку 24-часовен здравствен мониторинг.  Тимот се состоеше од педијатар и физиотерапевт. Нашите искусни педијатри (д-р Соња Петровска, д-р Благица Манчева и д-р Наташа Никчевска), како и нашите врвни физиотерапевти (Олгица Димитров и Анета Манасиева) беа постојано во кампот.

Стационирани во една просторија каде имаше амбуланта, комплетно опремена со потребни лекарства и помагала, дневно беа згрижувани во просек 50-60 дечиња. “Третиравме спортски повреди, посекотини, дехидратации, сончаница, стомачни болки, астматични напади, ларингити, главоболки, гнојни ангини, алергиски манифестации. Најважно е дека децата беа успешно третирани, болките им ги намаливме и ги излекувавме, а со тоа и им ги вративме насмевките на нивните лица. Со медицинската помош од тимот на Жан Митрев децата беа сигурни и со вратена можност во целост да им се посветат на тренинзите“, објасни д-р Никчевска. Д-р Жан Митрев секогаш бил ентузијаст, пионер и поддржувач на најдоброто од Македонија. Во тој дух и оваа година го поддржа најдобриот македонски спортист и најдобар десен бек во светот на ракометот, Кирил Лазаров преку поддршка од медицинскиот тим за време на кампот кој се   оддржа во хотелот “Аквалина“ во Охрид, во две смени од 20-26 јуни и од 26 јуни-02 јули, 2017 година. Спонзори на  медицинска опрема и материјали беа ФИЛА-ФАРМ и Алкалоид.

Втората група на  средно медицински профил од Центарот за едукација- ZAN MITREV CLINIC ја започнаа тримесечната едукација. Во понеделникот, на  3 јули, 2017, точно во 7 часот чекаа пред Аудиториумот во Специјализираната болница ЖАН МИТРЕВ… Возбудени од новиот предизвик, групата од 9 избрани студенти од повеќе градови од Македонија се претставуваа…. Менторките кои се медицински сестри со долгогодишно работно искуство им посакаа добредојде и успешен старт на новата група со желби за успешно завршување на едукацијата. При тоа, како добар пример ги посочија нивните претходници кои со високи резултати ја заокружија интензивната тримесечна едукација. На првата средба со „идните“ колешки и единствениот колега ги информираа за текот на процесот, за користа од овој тип на едукација, а воедно им се заблагодарија за нивниот интерес за стекнување со нови знаења и искуства кои ќе ги добијат од сите оддели во болницата.

Дека кандидатите од средно медицински профил се жедни за нови искуства, за запознавање со новата работна средина и збогатување на знаењата се потврди од нивните искази…  „ Со задоволство се пријавивме на огласот за едукација кој беше објавен на ФБ профилот на болницата. Сакав да бидам дел од овој процес и сум благодарна што ме избравте“, рече една од нив. “Сметам дека ова е одлична можност да се стекнам со вредни знаења и искуства и дека за овој период ќе успееме да се подготвиме за новите работни предизвици“, се приклучи уште една студентка од групата на млади, скромни студенти. Од првиот ден, како впечаток го издвоија организираниот начин на работа во сите оддели, а ја потенцираа и  можноста да поразговараат и со д-р Емил Стоицовски, медицински директор и одговорен на одделот за интензивна нега. Ветија дека ќе се трудат да ги оправдат очекувањата од нив и да бидат дел од тимот на Специјализираната болница ЖАН МИТРЕВ.

Во центарот за едукација ZAN MITREV CLINIC, пред две недели заврши едукацијата за првата група од  деветмина студенти од средно медицински профил. По успешно поминатиот интензивен и специфичен процес на едукација, кој се состои од теоретски и практичен дел, тие се веќе интегрирани и вработени во Специјализираната болница ЖАН МИТРЕВ.