Месец: м.г

Игор Атанасов-Каспер, готвач во ресторанот „Пулс“ учествуваше на 2-иот Интернационален Гастрономски Фестивал во Струмица, каде од изострениот вкус на светската гастрономска елита успеа да им „собере“ 8 медали. Стево Карапанџа, Доменико Маги, Ѓорги Костиќ, Албен Велиу, Јовица Костиќ, Ѓоргио Дијана и останати познати светски имиња од гастрономијата присуствуваа и судеа за вкусовите на јадењата кои ги подготвуваа околу 300 натпреварувачи од 30 земји на гастрономскиот фестивал кој се одржа од 24-28 октомври, 2017 во Струмица, а во организација на ГАСТРОМАК. И овој фестивал беше „зачинет“ со готвените јадења од нашиот готвач Игор Атанасов-Каспер. „Чест ми беше да бидам во тоа друштво. Престиж е да се приготвува јадење со некој како што е Ѓоргио Дијана, а јас ја имав таа можност на овој фестивал. Ова е големо достигнување за мене, а медалите се само дополнителен поттик да продолжам и понатаму во освојување на нови вкусови“, објасни Игор.

Тој се врати со 8 медали: 1 златен за подготвување на риба, 4 сребрени за пица и 3 бронзени за национално, јагнешко и пилешко јадење. Добил и лента од Здружението на готвачи од Ниш за соработката, а од Шведската федерација на готвачи беше избран за почесен член. Инспирација за подготвување на одредено јадење добива во моментот. „Влегуваш во бокс и ти даваат одредени намирници од кои треба да приготвиш мени. Инспирацијата е од секојдневната работа, традицијата, националните јадења. И за 45 минути се добива ново, модерно, со примеси на традицијата јадење. Тоа е мојата тајна состојка“, додаде Игор, најнаградуваниот од 40-те македонски готвачи кои учествуваа на овој фестивал.

За вкусовите не се дискутира, освен кога оценува Стево Карапанџа!

Гулабите, колку и да ги поврзуваме со некои убави синоними, како симбол на слобода, љубов и сл., во реалноста тие се птици преку чиј измет пренесуваат многу опасни бактерии кои можат да предизвикаат сериозни болести кај луѓето. Од друга страна, преку содржината на изметот во кој има јаки киселини ги оштетуваат фасадите на зградите. Не случајно ги нарекуваат „летечки стаорци“. Овој проблем е присутен и евидентен во сите развиени земји. Во Европа, за решавање на проблемот користат многу агресивни и нехумани методи, како додавање на хемикалии во храната при што гулабите стануваат стерилни и не можат да се размножуваат. Во други држави пак, применуваат уште порадикални мерки како што е поставување на отрови со што не само што ги уништуваат гулабите, туку и многу други птици јадејќи од истата храна.

Проблемот со гулабите е евидентен и во Скопје, а со истиот се соочуваме и во ЖАН МИТРЕВ КЛИНИК. Со цел да се намали можно загадување и превенира оштетување на фасадата на објектот, како и спречување на ширење на болести кај луѓето, д-р Жан Митрев иницира проект за биолошка заштита од птиците натрапници во урбана средина. Во духот на хуманоста, грижата кон живиот свет и ненарушување на природните закони, за прв пат на овие простори, ќе се спроведува проект со користење на биолошки методи за истерување на гулабите од и околу објектот на ЖАН МИТРЕВ КЛИНИК. За реализација на оваа иницијатива, д-р Жан Митрев ќе добива поддршка од Огнен Поленак, професионален соколар, со 20 годишно искуство во дресура, размножување и работа со птиците грабливки.

„Со д-р Митрев направивме стратегија како да го решаваме проблемот, а при тоа да не ги уништуваме овие птици. Предлогот е биолошката контрола да биде секој втор ден во неделата, во времетраење од по еден час. Термините нема да бидат стриктни бидејќи времето на активностите е тешко предвидливо кога работите со птици грабливки, затоа би го оставиле времето да биде клизно во рамки на дневните часови. Од друга страна, подобро е посетите да се во различно време како не би иницирале шаблон на однесување кај птиците натрапници“, објасни Огнен. За време на овој тест период, Огнен ќе се движи во делот на кровот на објектот, а некои од сесиите со грабливките ќе ги спроведува надвор од кругот на болницата каде што има голем број на вакви птици.

„Птиците грабливки се природен непријател на гулабите. Штом почувствуваат присуство на грабливка, останатите птици реагираат на единствениот можен начин да се спасат, а тоа е напуштање на територијата каде има опасност по нивниот живот. Со често присуство на соколар со својата грабливка, на локациите каде има големи популации од птици, самите локации стануваат се понебезбедни за останатите птици и тие полека бараат нови места каде ќе бидат поспокојни. Во природата делуваме со природни средства! Без отрови, без отстрелување или загадување“, објасни Огнен додека беше во посета на болницата со неговиот јастреб. При тоа, во текот на активностите, се трудат да се избегне да грабливците уловат и утепаат некоја птица. „Доволно е само да ги бркаат, што подразбира дека нема убиства на гулабите“, дополни Огнен. Инаку, користењето на птици грабливки е дамнешна пракса на повеќето интернационални аеродроми (ја осигуруваат безбедноста на пистата за полетување и слетување на авионите), по лозови насади (штитејќи го грозјето), по депонии (растерувајќи ги птиците кои го разнесуваат сметот насекаде и ширејќи болести).

Димитар Ѓоргиев, трикратниот светски шампион и европски вицешампион во кикбокс и по четврти пат ќе се обиде да ја освои светската титула во оваа дисциплина. И како и сите светски професионални спортисти така и Димитар дојде во болницата ЖАН МИТРЕВ за да направи комплетен медицински преглед и да се утврди здравствената состојба пред овој тежок натпревар. „Во 7 категории, меѓу 1.300 натпреварувачи – сениори и јас ќе учествувам на Светското првенство во кикбоксинг, кое ќе се одржи од 4-12 ноември, годинава во Будимпешта, Унгарија. Ќе се обидам и по 4-ти пат да ја одбранам светската титула и доколку успеам во тоа ќе бидам 8 години по ред непоразен во мојата категорија на светско ниво“, објасни Димитар додека чекаше да се направи компјутерско снимање во радиодијагностичкиот центар во болницата. Светското првенство е организирано од WAKO – Светската асоцијација за кикбоксинг каде членува и Р. Македонија, а Димитар е до сега најдобриот натпреварувач од Македонија на овие првенства. До сега, тој ги има освоено светските титули во 2011, 2013 и 2015 година и доколку и на ова првенство се врати со победа ќе биде неприкосновен победник на светско ниво во неговата категорија кој успеал 8 години по ред да ја задржи водечката позиција.

По направените снимки и прегледите, стручната проценка од медицинскиот тим на д-р Жан Митрев е дека Димитар е во одлично здравје. Воедно му посакаа после 12 ноември да дојде со нов медал и да направат уште една фотографија која ќе сведочи за соработката на „најдобрите со најдобрите“!

Во периодот од 6 – 8 октомври 2017 година се одржа Вториот конгрес на Физиотерапевти на Црна Гора, на кој присуствуваа и нашите физиотерапевти Блаже Арсов и Никодин Велјановски, членови на Македонското физиотерапевтско здружение. Во присуство на околу 200 физиотерапевти од државите од регионот и пошироко тие презентираа два студии на случај кои ги применуваат во секојдневната работа во болницата ЖАН МИТРЕВ. Блаже Арсов претседател на Македонското физиотерапевтското здружение имаше презентација на тема „ВЛИЈАНИЕТО НА РАНАТА ФИЗИОТЕРАПИЈА КАЈ ПАЦИЕНТ ПО ОПЕРАЦИИ НА СРЦЕ И АБДОМЕН ВО „ZAN MITREV CLINIC“ – приказ на случај“, а потпретседателот Никодин Велјаноски зборуваше за ИНТЕНЗИВНА ФИЗИОТЕРАПИЈА ВО КОМБИНАЦИЈА СО ФУНКЦИОНАЛНА МАГНЕТНА СТИМУЛАЦИЈА (фмс) КАЈ ПАЦИЕНТ ПО ОПЕРАЦИЈА НА АКУТНА АОРТНА ДИСЕКЦИЈА ВО „ZAN MITREV CLINIC“ – приказ на случај.

Претседателот на Македонското физиотерапевтско здружение Блаже Арсов во рамки на своето присуство на конгресот оствари неколку средби и состаноци со претставниците на WCPT (Светската конференција за физиотерапија) Дејвид Гориа и Сара Базин каде и се договорија следните чекори кон решавање на пречките за регулација на професијата во Македонија. Исто така, ова беше добра можност и да се најави и поканат колегите за учество на Првиот семинар на Македонското здружението кој ќе се организира на 1 декември, 2017 во болницата Жан Митрев.

Конгресот се одржа под покровителство на Министерството на здравство на Црна Гора под мотото „Вредноста и значењето на Физиотерапијата“. На свеченото отворање на конгресот се обрати претседателката на европскиот регион на светската конфедерација за физиотерапија WCPT, Сара Базин и генералниот секретар на WCPT, Дејвид Гориа.

Д-р Родни Росалиа, менаџер за медицински истражувања од болницата ЖАН МИТРЕВ неодамна, на група средношколци од Интернационалното училиште НОВА им презентираше научен пример од болницата ЖАН МИТРЕВ. Имено, на покана на ова училиште, а во рамките на Програмата „Вовед во научните истражувања“ тој претстави дел од истражувачко-научната работа во болницата, конкретно за хируршкиот третман за аортна стеноза како една од неколкуте специфичните процедури за д-р Жан Митрев и неговиот тим. Пред средношколците Родни објасни за причините за појавување на оваа болест, која група најчесто е погодена и како хируршки се третира. Секако, акцентот беше ставен на успехот од оваа процедура која е специфика за хируршкиот кардиоваскуларен тим од болницата ЖАН МИТРЕВ. Учениците имаа можност да добијат конкретни одговори во врска со оваа процедура, а посебен интерес покажаа околу прогресот кој се прави преку овие научни истражувања во медицината во Македонија и пошироко. Родни потенцираше за научното влијание од овие истражувања за понатамошно унапредување и примена на овие кардиоваскуларни хируршки решенија на светско ниво.

Соработката во рамките на оваа програма ќе продолжи и понатаму. Следен гостин предавач е д-р Лидија Велјановска Кириџиевска, искусен и долгогодишен радиолог во ЖАН МИТРЕВ. Програмата „Вовед во научните истражувања“ е годишна програма наменета за средношколците од НОВА, со цел запознавање со основите на истражувачката работа преку практични примери, а крајната цел е развивање на научни проекти од страна на учесниците кои подоцна би ги „бранеле“ пред професорите.