Месец: м.г

Правилната постура-држење на телото е многу повеќе од само стоење исправено за да изгледате убаво. Постурата е важен дел од вашето целокупно здравје во текот на животот. Одржувањето на телото во правилна положба, без разлика дали се движите или стоите, може да ви помогне да избегнете болка, повреди и други здравствени проблеми.

Правилното држење на телото може да опфаќа две главни позиции. При седење или при движење.
Динамично држење – се однесува на тоа како се држите кога се движите, како на пример кога одите, трчате или се наведнувате за да земете нешто.
Статично држење – се однесува на тоа како се позиционирате кога не сте во движење, како на пример кога седите, стоите или спиете.

Важно е да се одржува правилна постура и во двата случаеви, а за тоа да се случи клучна е положбата на вашиот ‘рбет. Вашиот ‘рбет има три природни кривини: во вратот, во средината на грбот и во долниот дел на грбот. Правилното држење значи дека треба да бидат присутни овие облини, но не и да ги зголемува. Главата треба да се држи исправено на рамената, а рамената треба да бидат во линија со колковите.

Лошото држење на телото може да биде штетно за вашето здравје. Одењето наведнато може да доведе до:

• Погрешно усогласување на мускулно-скелетниот систем
• Трошење на вашиот ‘рбетен столб, правејќи го покревок и склон кон повреди
• Појава на болка во вратот, рамената и грбот
• Намалена флексибилност
• Неправилно движење на вашите зглобови
• Нарушување на вашата рамнотежа и зголемен ризикот од паѓање
• Несоодветно варење на храната
• Тешкотии и нарушено дишење

Како може да го подобрите целокупното држење на телото?

• Бидете свесни за држењето на вашето телото за време на секојдневните активности, како што се гледање телевизија, миење садови, одење или работење пред компјутер.
• Останете активни. Секаков вид на вежбање може да помогне да се подобри вашето држење на телото, но одредени типови на вежби може да бидат особено корисни. На пример, јога и други видови на вежби кои се фокусираат на свесноста за телото. Исто така, добро е да правите вежби кои ги зајакнуваат мускулите околу грбот, стомакот и карлицата.
• Одржувајте здрава тежина. Прекумерната тежина може да ги ослаби вашите стомачни мускули, да предизвика проблеми со карлицата и ‘рбетот и да придонесе за болка во долниот дел на грбот. Сето ова може да го наруши вашето правилно држење на телото.
• Носете удобни чевли со ниски потпетици. Високите потпетици можат да влијаат на вашата рамнотежа и да ве принудат да одите поинаку. Ова може да го зголеми притисокот врз вашите мускули и да го оштети правилното држење на телото.
• Погрижете се вашите работни површини да бидат на удобна висина за вас, без разлика дали седите пред компјутер, подготвувате вечера или јадете.

Како да го подобриме држењето на телото при седење?

• Многу луѓе поминуваат премногу време седејќи, без разлика дали се на работа, училиште или дома. Важно е правилно да седите и да правите чести паузи.
• Често менувајте ја седечката положба.
• Направете кратки прошетки низ вашата канцеларија или дома.
• Нежно истегнете ги вашите мускули од време на време за да помогнете во ублажување на мускулната тензија.
• Доколку вашите стапала не го допираат подот, користете потпирач за нозе
• Опуштете ги рамената. Тие не треба да се наведнуваат или да се повлекуваат назад
• Држете ги лактите блиску до телото. Тие треба да бидат свиткани помеѓу 90 и 120 степени
• Погрижете се грбот да ви е добро потпрен. Користете перница или друга потпора ако вашиот стол нема потпора за кривината на долниот дел на грбот.
• Проверете дали бутовите и колковите се добро поддржани. Треба да имате добро обложено седиште, а бутовите и колковите да бидат паралелни со подот.

Уште еден новитет во центарот за естетска дерматологија

Иако вообичаено мај е месецот кога зборувавме за подигање на свеста за ракот на кожата, сепак би сакале да потсетиме дека редовните прегледи кај дерматолог се неопходни за вашето здравје. Особено поради фактот дека меланомот-ракот на кожа се развива подмолно, без речиси никакви симптоми, а неговото навремено откривање може да спаси живот.
Свесни дека иднината е во комплетното мапирање на кожата на целото тело, а со цел да го подигнеме нивото и да обезбедиме уште поквалитни дерматолошки прегледи, од сега на располагање е технолошки напредниот апарат за комплетно мапирање на кожата на целото тело познат како ФотоФајндер (FotoFinder).

ФотоФајндер обезбедува врвна технологија која вклучува вештачка интелигенција со помош на која веднаш се детектираат нови, изменети и сомнителни бенки. При тоа прегледот се изведува на хигиенско растојание од повеќе од 1,6 метри, што е особено важно во време на Covid-19.
Благодарение на модуларниот дизајн, функционалноста на FotoFinder може да се прилагоди на поширок опсег на услуги во секое време, без разлика дали се работи за дермоскопија, фотографирање на целото тело, консултација за коса (трихоскопија), капилароскопија или естетика. Неговите иновации ќе ги воодушеват пациентите!

Како работи ФотоФајндер (FotoFinder)?

Во време на КОРОНА секој миг е важен
Со ултра брзиот процес на скенирање и интегрираната технологија на вештачка интелигенција, заштедува време, а контролите на кожата ги подига на сосема ново ниво на квалитет. Самиот преглед е безбеден бидејќи се случува на оддалеченост од пациентот на повеќе од 1,6м.

Мозаикот наречен бенки

Мајсторот за скенирање на тело (Bodyscan Мaster) ги идентификува лезиите во сите направени слики на телото и интелигентно ги распоредува според нивната важност на еден екран. Софтверот ги категоризира како: нови, променети и непроменети невуси. Овој таканаречен ,,мозаик приказ,, помага да се идентификуваат сомнителните лезии уште веднаш. Со тоа, видео-дермоскопскиот преглед се фокусира само на неколку атипични лезии за кои е потребна дополнителна проценка. Ова заштедува многу време и го намалува блискиот контакт на минимум.

Tехнологија на вештачка интелигенција AI за комплетно мапирање на кожата

Комплетното дермоскопско мапирање на кожата како процес, комбинира извонреден квалитет на слики, со нови софтверски функции и вештачка интелигенција (AI).
Токму Фотофајндерот со вештачка интелигенција овозможува исклучителни рeзултати на овој комбиниран систем. Од една страна тоа значи оптимизација на резултатите од скенирањето на телото (Bodyscan) и комплетното дермоскопско мапирање (Total Body Dermoscopy), а од друга страна ги поддржува анализите на поединечни лезии со анализаторот на бемки Moleanalyzer Prо кој дозволува пред-проценка на меланоцитски и немеланоцитски лезии користејќи алгоритам базиран на,,длабоко учење,, тестиран при клинички испитувања.

Дермоскопија со максимална хигиена

Во случај лезијата да бара дополнително испитување, можете да ја искористите видео дермоскопијата со зумирање во најдлабоките структури на невусот со големо оптичко зголемување и моментално зумирање на областа. FotoFinder medicam доаѓа со заменливи предни капачиња кои може да се менуваат за дезинфекција после секој пациент.

Особено во услови на Корона пандемија која трае подолго време, сигурни сме дека не сте направиле редовна контола и затоа би сакале да ве потсетиме дека особено во случај на малигнен меланом, раното откривање може да спаси живот!

За да закажете кај нашите дерматолози јавете се на 02/3104-910

• 

Нерационалната употреба на антибиотиците не е нова појава, но во време на КОВИД пандемијата се започна со масовна злоупотреба на овие лекови што со енормна брзина не носат во т.н постантибиотска ера, вели во разговор за „Локално“, д-р Катерина Игневска микробиолог од Жан Митрев Клиник.

Микробиологот објаснува дека многу брзо ќе се соочиме со инфекции предизвикани од микроорганизми на кои достапните антибиотици воопшто нема да делуваат.

-Полека но сигурно чекориме кон пандемија во која бактериските инфекции кои не беа сериозна закана затоа што ги имавме антибиотиците како силно оружје, сега веќе ги губиме, а со тоа и битката со бактериските инфекции, објаснува Игневска.

Докторката нагласува дека со превентивното пиење на антибиотиците се создава катастрофална ситуација која со себе носи огромна отпорност и нивно неделување.

-Има протоколи кога и кај кои пациенти се дава антибиотик превентивно. Тоа се специфични процедури кои се изведуваат во болница. При ваков случај се знае точно кој антибиотик, кога, во која доза и колку долго треба да се прима за да го сметаме за превентива. За жал, со ова што се случува денес, достапноста и превентивното пиењето антибиотик во домашни услови, а особено антибиотици од широкоспектарен тип кои вообичаено се даваат само во болниците, се креира една иреверзибилна катастрофална ситуација која со себе носи огромна отпорност и неделување на постоечкиот арсенал антибиотици, вели микробиологот, додавајќи дека антибиотик се дава кога имаме потврдена бактериска инфекција.

-Исклучиво, повторувам исклучиво бактериските инфекции се лекуваат со антибиотик. Но ова како да се заборави, па иако согласно етиологијата на КОВИД пневмонијата – каде причинителот е вирус, прв лек кој се пишува како третман е токму антибиотик. Во однос на пробиотиците, доколку имаме краткотраен курс на антибиотска терапија и не е неопходно да се зема пробиотик, истото може да се постигне и со природните пробиотици кои ги има во секојдневната исхрана на пример јогурт. Но, доколку станува збор за подолготрајна антибиотска терапија со антибиотик со широк спектар на дејство, тогаш земањето пробиотик е оправдано, подвелкува Игневска.

Таа вели дека во случаевите кога антибиотиците често се даваат треба да се измери користа наспроти штетата, бидејќи како што објаснува “секој лек во исто време е и отров“.

-Покрај корист, кога се дадени соодветно-тогаш кога е неопходно, антибиотиците имаат и бројни несакани ефекти. Тие може да предизвикаат токсични реакции, реакции на преосетливост, една од позначајните во моментов – механизми на резистенција и креирање на мултирезистентни бактериски соеви, и секако многу значаен постантибиотскиот колит – кој може да доведе до многу сериозна здравствена состојба, смета микробиологот.

Во однос на тоа дали граѓаните треба да бараат од своите лекари да им препишат антибиотик „за секој случај“ или да си ги купуваат на своја рака, Игневска децидно вели дека пациентот кој ја доверил грижата за здравјето на лекарот каде се прегледува, треба да го испочитува и неговото знаење.

-За пациентите добар лекар е тој што ќе им даде антибиотик. Но, всушност умешноста на лекарот се состои во тоа да му објасни на пациентот кога му е потребно антибиотик и да го предупреди пациентот кои се позитивните и негативните страни, односно штетата од непотребното земање на антибиотици. Улогите на доктор-пациент се јасно поделени. Не се пациентите тие кои треба да,,бараат,, терапија, туку напротив тие доаѓаат за совет и објаснување кај својот лекар. Доколку пациентот ја доверил грижата за здравјето кај тој лекар, треба да го испочитува неговото знаење, искуство и совети, секако за негово добро, објаснува таа.

Докторката објаснува дека дeцата кога примаат антибиотици во комбинација со кортико-препарати потребно е да внесуваат витаминска исхрана.

-Како и секогаш кај децата исхраната е многу важна. Секако треба да се земат в предвид како калорискиот внес така и витаминскиот. Препорачливо е внесот на витамини да биде преку храна – кога е тоа возможно и достапно, на здрав начин без непотребно додавање на сирупи – витамини и суплементи. Многу е важна постојаната нега на децата, вниманието кое им го посветуваме и љубовта со која се грижиме за да бидат тоа здрави деца, објаснува микробиологот.

За тоа како може да ги разликуваме сезонските настинки и грипот од ковидот, Игневска посочува дека секогаш кога ќе се појават симптоми на горно респираторно заболување треба да бидеме внимателни.

-Со оглед на тоа дека сите тие почнуваат неспецифично, а и сведоци сме на модификации на клиничката слика, секогаш кога ќе се појават симптоми на горно респираторно заболување треба да сме многу внимателни бидејќи се уверивме сите дека правило нема. Предизвикувачот на КОВИД инфекцијата е високо контагиозен (заразен) вирус и наша одговорност при сомнение за инфекција е да останеме дома и да ја потврдиме или исклучиме истата со тест како би спречиле понатамошно пренесување на лица во околината. Но, не треба целиот фокус да биде насочен само кон КОВИД, бидејќи секогаш постоеле и ќе постојат и други вирусни и бактериски инфекции кои не се за потценување, вели микробиологот.

Извор – Lokalno.mk

Шири свесност, спречи отпорност (Spread awareness, stop resistance) е слоганот под кој се одвива овогодинешната недела за подигање на свеста за рационалната употреба на антибиотиците.

Оваа глобална кампања се одржува секоја година од 18 до 24 ноември и има за цел да ја зголеми свеста за антимикробната резистенција (AMR); и промовирање на најдобрите практики меѓу јавноста, здравствените работници, ветеринарите и сите кои работат со животни, здравствените работници во земјоделството како и креаторите на политиките за употреба на антибиотици се со цел да се спречи појавата и ширењето на инфекции отпорни на микроби.

Антимикробните средства – вклучувајќи антибиотици, антивирусни, антигабични и антипаразити – се лекови кои се користат за спречување и лекување на инфекции кај луѓето, животните и растенијата. Низ целиот свет, бактериите, вирусите, габите и паразитите се менуваат, прилагодувајќи се и повеќе не реагираат на лековите што се користат за лекување на инфекциите што ги предизвикуваат. Оваа антимикробна отпорност го отежнува лекувањето на инфекциите, што го зголемува ризикот од ширење на болеста, тешка болест и смрт.
Одговорно користете ги овие лекови за да се зачува нивната делотворност и за следните генарции!

Сигурно барем еднаш во животот сте го слушнале терминот сколиоза и веројатно ве потсетува на деновите кога како деца/тинејџери сте оделе на систематски преглед. Но, да се потсетиме. Сколиозата претставува искривување на ‘рбетниот столб. Здрав ‘рбет гледан од напред или одзади е прав. При појава на сколиоза се забележува странично искривување на ‘рбетот на десно или на лево.
Освен визуелно т.е со голо око, конечната дијагноза се поставува со помош на направена РТГ снимка во консултација со лекар ортопед или физијатар.
Тој ќе го измери искривувањето на ‘рбетот во степени, како да е агол, познат како „аголот на Коб“.
За искривување – сколиоза се сметаат сите отстапувања кои се поголеми од 10 степени.

Какви видови на сколиоза постојат?

Адолесцентна идиопатска сколиоза:
Сколиозата може да се појави на која било возраст, но најчестиот тип, адолесцентната идиопатска сколиоза, се појавува по 10 годишна возраст, на тинејџерска возраст. Причините можат да бидат најразлични, но во најголем број случаи е од неправилно седење или држење на телото во нездрава позиција.

Детска сколиоза:
Инфантилната сколиоза се јавува кај деца под 3 годишна возраст. Таа може да биде резултат на пршлени со абнормална форма која е вродена, разни синдроми, невролошки нарушувања или непознати причини (идиопатска).
Јувенилната сколиоза е поредог вид и се јавува кај деца помеѓу 3 и 10 години.

Која е причината?

Во повеќето случаи на сколиоза, точната причина (идиопатска) не е позната. Сепак, сколиозата може да се појави кај луѓе во исто семејство. Кога тоа ќе се случи, веројатно постои генетска компонента како причина.

Кои се знаците и симптомите на сколиозата?

Сколиозата понекогаш е лесно да се забележи, бидејќи искривувањето на ‘рбетот може да предизвика телото на една индивидуа да се навали на десно или на лево. Кај некои деца со сколиоза едното рамо е повисоко од другото и едната плешка (рамената лопатка) е испакната повеќе од другата.

Како се дијагностицира сколиозата?

Прво, лекарот зема детална медицинска историја, вклучувајќи прашања за неодамнешниот раст на детето. Дополнително, може да се направи рендген, кој ќе ја потврди дијагнозата и ќе ја открие сериозноста на искривувањето на ‘рбетот.

Вашиот лекар ќе ве прегледа и може да ве упати кај ортопедски хирург кој е експерт за лекување на коски и мускули.

Рангирање на степенот на искривување

• Искривувањето се смета дека е мало кога е под 20 степени.
• Искривувањето е умерено кога е помеѓу 25 и 40 степени.
• Искривувањето е сериозно кога надминува 50 степени. Овој тип на искривување може да ги оштети белите дробови. Затоа ортопедските хирурзи и трауматолози често преземаат хируршки мерки пред ова да се случи, така што искривувањето не ја достигнува оваа последна точка.

Како се лекува сколиозата?

На повеќето деца со блага сколиоза не им е потребен третман, се препорачуваат корективни вежби и редовни прегледи за да се уверат дека деформацијата не прогресира.
Кога лекарот смета дека кривата од умерена преминува во тешка и дека може да се влоши или да предизвика проблеми, се препорачува употреба на ортопедски корсет додека детето не престане да расте.
Корсетот не се користи за корекција на претходно постоечка крива, но може да спречи таа крива да се влоши.
Децата со тешка сколиоза најверојатно ќе мора да бидат подложени на операција.

Доколку мислите дека вашето дете може да има сколиоза, закажете консултација со лекар ортопед за навремено откривање и третирање.

Бубрезите се едни од клучните органи во вашето тело. Тие прават многу за вас секој ден, почнувајќи од филтрирање на токсините, одржување на хемиската рамнотежа на крвта, се до производство на хормони.
Грижата за нив не е тешка, ниту компликувана. Она што треба да направите е да ги спроведете советите кои ќе ги најдете подолу. Тоа ќе ви помогне да ги одржите здрави вашите бубрези.

Кои се ризик факторите за појава на бубрежна болест?

• Хипертензија
• Дијабетес
• Семејна историја на бубрежна болест
• Дебелина
• Пушење
• Возраст над 50 години

Доколку имате еден или повеќе од овие ризик фактори, можноста за развој на бубрежна болест е поголема. За да ја намалите оваа можност, препорачуваме да воведете здрав начин на живот

Еве неколку совети како да се грижите за своите бубрези со цел да избегнете можна бубрежна болест:

Не пушете

Пушењето ја намалува циркулацијата на крвта и тоа може да резултира со недоволно снабдување на бубрезите со крв. Ако овие органи не добиваат доволно крв, тие не можат да функционираат правилно. Пушењето исто така ги зголемува шансите за развој на рак на бубрезите.
Вежбајте, практикувајте редовна физичка активност
Одржувањето на вашето тело во форма и физичката активност се важни за вашето целокупно здравје. Вежбањето може да помогне во подобувањето на телесната циркулација и намалување на крвниот притисок кој е главен ризик фактор за проблеми со бубрезите.

Одржувајте нормална телесна тежина

Бубрезите работат понапорно кај лицата со прекумерна тежина за да ја компензираат дополнителната телесна маса. Потребен е поголем напор за филтрирање на отпадот и управување со другите функции на телото кога има повеќе телесна маса за опслужување.

Избегнувајте сол

Намалувањето на внесот на сол, може значително да влијае на голем број ризик фактори кои се поврзни со проблемите со бубрезите. Избегнувајте преработена и конзервирана храна секогаш кога е можно, бидејќи истата содржи големи количини на сол и натриум.

Контролирајте го нивото на шеќер во крвта

Високото ниво на шеќер во крвта може да ги оштети крвните садови во бубрезите, предизвикувајќи нивно неправилно функционирање. За да ги заштитите овие органи, важно е да го одржувате шеќерот во крвта во границите на нормалата

Пијте вода

Да се биде хидриран, т.е да се внесува соодветно колочество на вода, помага на вашите бубрези да функционираат нормално, отстранувајќи ја солта и токсините од вашето тело. Не се препорачува да пиете прекумерни количини вода наеднаш, подобро е да пиете континуирано во текот на денот.

Дознајте ја вашата семејна историја

Некои бубрежни заболувања се наследни. Дијабетесот и високиот крвен притисок, исто така, имаат тенденција да имаат генетска компонента. Разговарајте со членовите на вашето семејство за сите овие состојби за да одредите дали сте изложени на висок ризик за проблеми со бубрезите како што се инфекции на бубрезите и бубрежни заболувања.

Проверете ги бубрезите

Постојат два вида тестови кои даваат точни информации за тоа дали вашите бубрези се здрави. Тоа се анализа на уриуна и анализа на крв. Анализата на урината ќе утврди кои типови на протеини и албумин се присутни во вашата урина. Различни видови може да укажуваат на бубрежна болест. Тестот на крвта ќе открие колку отпад има во вашата крв и исто така ќе утврди дали вашите бубрези ја вршат правилно својата функција.

Обрнете внимание на вашите лекови

Бубрезите се одговорни за отстранување /филтрирање на лековите од телото. Земањето премногу лекови против болки во тек на долг временски период, може да предизвика оштетување на бубрезите. Најштетни видови на лекови се нестероидните антиинфламаторни лекови. Оние кои земаат лекови за хронична болка, треба задолжително да се консултираат со својот лекар и за можна примена на други методи за ублажување на болката кои не се штетни на нивните бубрези.

• 

Ноември – месец на машкото здравје

Во ноември, се случува една од најважните кампањи која што во последните години изврши големо влијание од општествен аспект. Станува збор за месецот на машко здравје промовиран и етаблиран како Movember. Ова движење има цел да ја подигне свеста за важноста на машкото здравје.

Но, што е Movember?

Станува збор за доброволна кампања која има за цел да даде поголема видливост, свесност и во крајна линија да го подобри машкото здравје.
Оваа иницијатива започнува со растење на мустаќи. Целта на овој гест е да ги потсети мажите за важноста да се грижат за себе и да одат на редовни контроли за превенција и борба против болести како што се ракот на простата и ракот на тестисите.

Ракот на простата е најчест тумор кај машката популација. Од друга страна, ракот на тестисите е тумор кој главно ги погодува младите меѓу 20 и 35 години.
Раното откривање на двата вида на рак е од суштинско значење за да може да се започне со соодветниот третман што е можно поскоро и да се зголемат шансите за излекување.

Симптоми на рак на простата

Ракот на простата е еден од најчестите видови рак кој ги погодува мажите. Симптомите генерално се отсутни во раните фази. Меѓутоа, ако тие се појават, најчесто се:

• Зголемена фреквенција на мокрење
• Уринарна итност придружена со болка и пецкање
• Чувство на нецелосно празнење на мочниот меур
• Појава на крв во урината и спермата
• Болка или печење при мокрење
• Непријатност или болка при седење, предизвикани од зголемена простата.

Уринарните симптоми може да бидат и резултат на инфекција на мочниот меур или други состојби. Ако сте загрижени за какви било промени што сте ги доживеале, разговарајте со вашиот лекар.

Симптоми на рак на тестисите

Овој тип на рак исто така не покажува симптоми во почетната фаза. Но, препорачливо е да посетите лекар ако забележите некој од следниве предупредувачки знаци:

• Присуство на грутка во тестисот
• Промена на големината или обликот на тестисот
• Често чувство на полн мочен меур
• Присуство на крв при мокрење
• Појава на болка во долниот дел на стомакот или препоните

За да се намали ризикот од заболување од овој тип на рак, препорачуваме преземање мерки како што се водење здрав живот (консумирање здрава исхрана, вежбање /физичка активност, да не пушете, да избегнете конзумирање на алкохол и стресни ситуаци) и секако еднаш годишо посета на уролог со цел да се открие било каква болест во рана фаза уште пред појавата на првите симптоми.

Спинална хирургија преставува дел од хируршките гранки, во медицината, која се однесува на изведување на оперативни интервенции на рбетниот столб.
Рбетниот столб е комплексна единица која се состои од структурите на мускулно-скелетниот систем и нервниот систем кај човекот.

• Проблемите кои се појавуваат на рбетниот столб етиолошки(причински) може да се поделат на:
• Деформитети на рбетниот столб (вродени и стекнати)
• Сршеници на рбетниот столб(при пад или траума)
• Патолошки скршеници на рбетниот столб (остеопоротични скршеници, скршеници во склоп на малигни болести)
• Примарни тумори на рбетниот столб и секундарни метастатски депозити
• Инфективни промени на пршленско тело и дискус (специфични и неспецифични инфекции, како и во склоп на други инфективни болести)
• Дегенеративни болести на дискус
• Дегенеративни болести на рбетниот столб(спондилоза, спондилоартроза)

Спинални оперативни интервенции

• Задна инструментација (заден пристап)
• Предна инструментација (преден пристап)
• 360 степени(заден/преден комбиниран пристап)
• MISS (минимално инвазивни оперативни интервенции)
• Вертебропластика и кифопластика

Oвие процедури се користат за третман на компресивни фрактури на пршлените предизвикани од остеопороза.
И двете постапки вклучуваат инјектирање на коскен цемент сличен на лепак кој ја стврднува и ја зајакнува коската/пршленот.

Спинална ламинектомија/спинална декомпресија

Oва оперативна интервенција се изведува кај ‘рбетна стеноза, тоест состојби кои предизвикуваат стеснување на’ рбетниот канал што резултира со последователна компресија на рбетниот мозок и нервните корени, а се манифестира со болка, радикулопатија, вкочанетост или слабост.
Хирургот ги отстранува коскените ѕидови на пршлените и сите коскени шилци(остеофити), со цел да се отвори ‘рбетниот канал, се одстрани стенозата, а со тоа да се отстрани притисокот врз рбетниот мозок и нервните корени.

Дисектомија (парцијална или комплетна дисeктомија)

Оваа постапка се користи за отстранување на дискот кога има хернија и притиска на нервниот корен или на ‘рбетниот мозок.
Ламинектомијата и дисектомијата често се изведуваат заедно.

Фораминотомија

Во оваа процедура, хирургот ја зголемува коскената дупка каде нервниот корен излегува од ‘рбетниот канал за да спречи испакнати дискови или зглобови задебелени со возраста да не го притискаат нервот.

Нуклеопластика (исто така наречена декомпресија на плазма диск)

Оваа ласерска хирургија користи радиофреквентна енергија за лекување на луѓе со болки во долниот дел на грбот поврзани со блага хернија на дискот.

Хирургот вметнува игла во дискот. Плазма ласерски уред потоа се вметнува во иглата и врвот се загрева, создавајќи поле што го испарува ткивото во дискот, намалувајќи ја неговата големина и ослободувајќи го притисокот врз нервите.

Спинална фузија

Хирургот го отстранува ‘рбетниот диск помеѓу два или повеќе пршлени, а потоа ги спојува соседните пршлени со помош на коскени графтови или метални уреди обезбедени со завртки.
Спиналната фузија може да резултира со одредено губење на флексибилноста на’ рбетот и бара долг период на опоравување за да им се овозможи на коскените графтови да враснат и да ги спојат пршлените заедно.

Замена со вештачки диск

Ова се смета за алтернатива на спинална фузија за третман на луѓе со сериозно оштетени дискуси.
Постапката вклучува отстранување на дискот и негова замена со синтетички диск кој помага да се врати висината и движењето помеѓу пршлените.

Д-р Љупчо Николов
Специјалист по општа хирургија