„Со првиот воз од Велес дојдов во клиникава, а сега со 3 бајпаса си одам среќна и задоволна“

април 04,2025

,,Во 05:30 часот се качив во возот од Велес и тргнав за Скопје. Сама, со верба дека ќе најдам решение за мојот проблем. Целта ми беше да дојдам во клиника Жан Митрев, и дојдов. Околу 7 часот стигнав во болницата и екипите кои беа веќе почнати со работа веднаш ме спроведоа на преглед кај доктор Енвер Идоски“ – вака ја започнува својата приказна за искуството кое го имала во нашата клиника госпоѓа Хрисула Величкова, 74 – годишна храбра госпоѓа која по предупредувањето од својот лекар во родниот Велес не чекала ниту еден ден, туку веднаш побарала решение.

,,Последниот месец или два чувствував гушење, замор, тегоби. Едвај се движев повеќе од десетина метри. Чувствував дека нешто не е во ред со моето здравје. Ми се појавија проблеми и со притисокот. Се чувствував несигурно и исплашено. Отидов на преглед во локалната амбуланта во Велес по што докторот ми рече дека морам да одам на кардиолог бидејќи имам проблеми со срцето. Веднаш одлучив дека сакам да одам во Скопје во клиника Жан Митрев. Имав слушано многу добри искуства за клиниката и тоа ми влеваше доверба. Така и направив. Утрото го фатив првиот воз и сама дојдов во клиниката,, – го продолжува своето храбро патешествите госпоѓа Хрисула додека се смешка и ни раскажува во својот кревет на одделението каде лежи пред да си замине дома по направените 3 бајпаса.

Таа веднаш по доаѓањето во клиниката била прегледана од д-р Енвер Идоски кој констатирал потреба од итна операција поради тешката состојба во која била госпоѓа Хрисула.
,,Веднаш го послушав докторот и без колебање му реков дека сакам да останам во клиниката и да се направи операцијата. Знаев дека тоа мора да биде сега и без никакви одлагања. Уште следниот ден веќе бев ставена на план за операција која заврши успешно. Утрото веднаш по операција веќе сама станував и се чувствувам многу полесно, посигурно и едноставно послободно. Еве сега 3 дена потоа чекам да си одам дома,, – ја завршува својата приказна г-ѓа Величкова.
На оваа решителна велешанка целиот тим од клиниката и посакува успешно закрепнување и безгрижни пензионерски денови со желби на долг живот.