Inflamacioni i muskulit të zemrës pas  infeksionit me virusin COVID-19

Tetor 10,2020

Infeksioni i virusit Covid-19 përbën një problem të madh shëndetësor sepse prek jo vetëm mushkëritë, por edhe organe të tjera, siç është edhe muskuli i zemrës. Tashmë është dëshmuar se virusi shkakton inflamacion të muskujve të zemrës, të ashtuquajturin miokardit.
Ende nuk është e qartë nëse miokarditi është gjendja që shkaktohet mëshpesh si pasojë e virusit COVID-19 dhe nëse ka një pamje klinike më të rëndë në krahasim me gjendjet miokarditit të shkaktuar si pasojë e viruseve të tjera.

Virusi shkakton përgjigje imune në trup në mënyrë jo konvencionale. Personat të cilët e kanë përjetuar këtë virus mund të jenë në rrezik të lartë ndaj shfaqjes së inflamacionit të muskujve të zemrës. Zemra është e prirur ndaj inflamacionit me COVID-19 sepse në sipërfaqen e qelizave të muskujve të zemrës ndodhet receptori 2 i enzimës konvertuese të angiotenzinës, me të cilin lidhet virusi. Për këtë arsye, janë bërë disa studime mbi pacientët të cilët i janë nënshtruar virusit COVID – 19 disa muaj më parë dhe kanë pasur një pamje klinike të butë ose të moderuar (mesatare).

Është kryer rezonanca magnetike e zemrës, e cila është metoda më e saktë dhe jo invazive për diagnostikimin e inflamacionit të muskulit të zemrës. Nga ky ekzaminim është dëshmuar se 78 nga 100 pacientë kanë probleme me zemrën. Interesant është fakti që 60 nga 78 pacientë kanë dhënë shenja të inflamacionit akut pas 71 ditësh nga infektimi me COVID – 19. Studimi ka arritur në përfundimin se edhe infektimi i lehtë me COVID – 19 tek personat relativisht të shëndetshëm mund të lërë shenja në zemër.

Një studim tjetër ka bërë ekzaminimin e sportistëve profesionistë. 4 nga 26 atletë nga Universiteti Shtetëror i Ohajos, SHBA, të cilët i janë nënshtruar infeksionit me COVID – 19 kanë pasur miokardit.

Miokarditi mund të shkaktojë aritmi kardiake, vdekje të papritur (gjatë trajnimit intensiv) dhe dobësim apo dështim të zemrës. Prandaj, ekzaminimi kardiak, ekokardiografia dhe rezonanca magnetike e zemrës rekomandohen 3 muaj pas infektimit me COVID – 19.
Shoqata Europiane e Kardiologjisë rekomandon për pacientët me miokardit të shmangin aktivitetet e rënda fizike për 3-6 muaj.

Në të ardhmen, një nga pyetjet e shpeshta për kardiologët do të jetë nëse keni qenë të infektuar nga virusi COVID-19?

Gjatë 8 muajve të fundi, pandemia e shkaktuar nga koronavirusi, ka ndikuar në shumë mënyra, ka vendosur rregulla të reja në jetën tonë duke e bërë atë të funksionojë krejtësisht ndryshe nga mëparë.

Për kontroll më të mirë të pandemisë dhe shëndetit tuaj, duke treguar se çfarë mund të shkaktojë koronavirusi, ju rekomandojmë që të mbani maska ​​mbrojtëse kudo dhe të lani duart shpesh.

Pas infektimit me COVID-19, ne rekomandojmë të paktën një ekzaminim kardiak, pavarësisht nga mosha juaj ose ashpërsia e pamjes tuaj klinike. Diagnostikimi i hershëm i miokarditit mund të parandalojë zhvillimin e komplikimeve serioze.

Dr. Millka Klinçeva
Kardiologe