Kirurgjia gjinekologjike minimalisht invazive

8 Maj, 2025

Gjatë gjithë jetës së saj gruaja mund të përballet me një sëmundje të organeve gjenitale, e cila do të duhet të vlerësohet, të diagnostikohet dhe të jepet një zgjidhje e përshtatshme, që mund të nënkuptojë edhe ndërhyrjen kirurgjikale. Disa nga gjendjet që mund të kërkojnë ndërhyrje kirurgjikale janë: cistet ovariane, fibromat ose miomat, si dhe polipet ose septumet e mitrës, gjakderdhja jonormale e mitrës, dhimbja e pelvisit (legenit) ose problemet me zbritjen e organeve gjenitale dhe rrjedhja e padëshiruar e urinës (inkontinenca urinare).

Për fat të mirë, sot, kirurgjia gjinekologjike minimalisht invazive është shpesh një opsion që zëvendëson kirurgjinë klasike. Pacientët largohen nga spitali ditën e operacionit ose te nesërmen me më pak dhimbje postoperative dhe një kthim më të shpejtë në aktivitetet e përditshme dhe jetën normale.

Çfarë është kirurgjia gjinekologjike minimalisht invazive?

Kirurgjia minimalisht invazive është një qasje kirurgjikale që përdor prerje të vogla në lëkurë. Megjithatë, kjo përfshin edhe procedurat pa asnjë prerje në lëkurë, atëherë kur e gjithë ndërhyrja kryhet në mënyrë vaginale duke përdorur mjete të specializuara (instrumente dhe një kamera) për të kryer vetë ndërhyrjen kirurgjikale. Ky lloj i kirurgjisë gjinekologjike përfshin procedurat e mëposhtme minimalisht invazive: kirurgji histeroskopike, laparoskopike dhe vaginale.

– Kirurgjia histeroskopike

Histeroskopia përdor një teleskop të vogël (histeroskop) për të vizualizuar hapësirën/zgavrën e mitrës përmes vaginës pa pasur nevojë për prerje me kohë minimale rikuperimi. Kryhet në rastet e gjakderdhjes jonormale, të parregullt dhe të rëndë nga mitra, siç është heqja e fibroideve që dalin në zgavrën e mitrës, polipeve, ngjitjeve intrauterine të pranishme nga procedurat e mëparshme dhe në zgjidhjen e anomalive kongjenitale të mitrës dhe vaginës në formën e septumeve (ndarjeve/barrierave).

A mund të përdoret procedura histeroskopike minimalisht invazive në vend të histerektomisë?

Sigurisht. Ekzistojnë disa gjendje që tani mund të trajtohen me kirurgji minimale invazive pa pasur nevojë për histerektomi. Çdo pacient, çdo problem është individual, prandaj konsultimi dhe zgjidhja duhet të përshtatet sipas nevojave, planeve të pacientes, duke hartuar një plan individual terapie.
Teknika histeroskopike, e quajtur edhe ablacion endometrial, është një trajtim për gjakderdhjen e rëndë menstruale që çon në anemi kronike tek pacientja. Me kryerjen e kësaj procedure minimalisht invasive, tek disa pacientë mund të shmanget nevoja për ndërhyrje të madhe kirurgjikale, siç është histerektomia.

– Kirurgjia laparoskopike

Trajtim efektiv që rezulton me qëndrim më të shkurtër në spital, më pak dhimbje, një periudhë më të shkurtër rikuperimi dhe kthim më të shpejtë në aktivitetet e përditshme.
Laparoskopia përdor një teleskop të vogël dhe instrumente të projektuara posaçërisht që vendosen në zgavrën/hapësirën e barkut përmes prerjeve të vogla në murin e barkut, ose ndonjëherë përmes vaginës pa prerje në lëkurën e barkut, për të vizualizuar organet e brendshme. Laparoskopi (kamera) është i lidhur me një video monitor, i cili i lejon kirurgut të vizualizojë anatominë dhe të kryejë ndërhyrje kirurgjikale komplekse me trauma minimale për pacientin.

Cilat probleme gjinekologjike mund të zgjidhen me laparoskopi?

Me përparimin e teknologjisë, gama e mundësive të kirurgjisë laparoskopike është në rritje. Kirurgjia laparoskopike mund të jetë e përshtatshme për vlerësimin dhe trajtimin e dhimbjes së pelvisit/legenit, endometriozës, cisteve ovariane, fibroideve të mitrës dhe shtatzënisë ektopike. Laparoskopia është gjithashtu një mënyrë e sigurt për mënjanimin e mitrës ose vezoreve.

– Kirurgji vaginale

Qasje minimalisht invazive pa prerje në lëkurë. Ka të gjitha avantazhet e rikuperimit që lidhen me kirurgjinë laparoskopike dhe histeroskopike. Përdoret më së shpeshti për problemet me statikën dhe prolapsin e organeve gjenitale femërore, ndërhyrjet në qafën e mitrës, si dhe në zgjidhjen e problemeve të stres inkontinencës urinare. Kohët e fundit, qasja vaginale përdoret gjithashtu në procedurat gjinekologjike laparoskopike, në vend që të bëhet përmes lëkurës së barkut.

Bëni rezervimin për ekzaminimin ose konsultimin tuaj me Dr. Irena Andonova, specialiste gjinekologe – obstetër, në telefon 02/3091-484, 070 383 270 ose në email në irena.andonova@zmc.mk

Ne jemi të përkushtuar për të ofruar kujdes gjithëpërfshirës për pacientët tanë, duke punuar së bashku për të gjetur një trajtim që i përshtatet më së miri gjendjes, nivelit të komoditetit dhe stilit të jetës tuaj.