Дали топлото време може да влијае на нашето ментално здравје?

август 20, 2018

Летото и топлите сончеви денови вообичаено се поврзуваат со одмори, дружења со пријателите и семејството и останати креативни активности полни со забава. Но и покрај забавата и веселоста, на сите нам ни се познати ефектите кои топлината може да ги има врз нашето физичко здравје. Топлината сама по себе може да има влијание врз нашето тело, при што долгите периоди поминати изложени директно на топлина може да доведат до нарушување во сонот, изнемоштеност, намален апетит и дехидратација. За овие промени можеме да преземеме проактивни мерки за да истите ги превенираме, како на пример може да не излегуваме надвор во најтоплиот период од денот или пак може да го зголемиме внесот на вода. Но малкумина се прашуваат како топлото време влијае врз нашето ментално здравје. Сите овие промени понатаму може да доведат до промени во однесувањето и анксиозност.

Студиите покажуваат дека топлото време може да доведе до зголемување на агресивните однесувања па дури и да ја зголеми стапката на насилство. Ова многу често се поврзува со претпоставката дека кога ни е топло, непријатното чувство поврзано со високата температура не турка на работ, што од друга страна може да се поврзе со потешкотијата која ја има нашиот мозок во менаџирањето на топлината. Дополнително, како што растат температурите, студиите наоѓаат дека луѓето имаат потешкотија да искусуваат позитивни емоции како среќа и радост. Дел од причините може да бидат поврзани со нагласувањето на секојдневните стресови, зголемувањето на ризичните однесувања, нарушувањата на сонот и зголемениот ризик за дехидратација. Кога времето е топло, тоа истовремено може да направи ограничувања во секојдневните активности на луѓето, затоа што луѓето најчесто прават отстапки останувајќи дома само за да го избегнат топлото време. Овој недостаток на контрола врз секојдневните активности може да придонесе кон зголемена иритабилност. Од друга страна дел од студиите наведуваат дека топлото време може да го подигне расположението кај оние кои се чувствуваат тажно и депресивно. Најголемиот дел од истражувањата наведуваат дека времето може да има мерлив ефект врз расположението на луѓето, но истото зависи од многу фактори. Ова го вклучува и фактот дали сме вљубеници во лето или пак зима. Без оглед на се, сепак можеме да направиме нешто за себе и за своето ментално здравје ова лето за да можеме максимално да уживаме и да го вратиме балансот во нашето тело – редовен сон и добра хидрираност, време поминато со луѓето кои ни значат, пливање и престој покрај вода, музика и танц и секако да побараме професионална помош доколку чувствуваме екстремни или продолжени ефекти од топлината. Уживајте во топлите летни денови грижејќи се за себе.