Малиот Кирил од Одделот за интензивна нега во одлична состојба замина дома

април 1, 2019

По еден месец престој на Одделот за интензивна нега и терапија, дома е пуштено првото предвреме родено бебе згрижено во Клиничка болница „Жан Митрев“.

Се работи за новороденче кое е префрлено од родилиште со тежина од 1.400 грама и сериозни кардио-респираторни компликации. По триесетдневниот соодветниот третман на Одделот за интензивна нега бебето денес беше пуштено дома. Тежи нешто повеќе од два килограми и е одлично адаптирано.

Родителите пресреќни исто како и нашите доктори коишто успешно ја завршија оваа среќна приказна.

– Едвај чекаме малиот Кирил да го однесеме дома. Сите со нетрпение го очекуваат. Јас како негова мајка секој ден бев тука со него и бескрајно сум благодарна на целиот тим од вашата клиника кој покажа неизмерна љубов, грижа и знаење да се помогне на најмалите, најнежните најкревките… на бебињата кои се родени предвремено и со здравствени проблеми. Нашето бебе беше во сигурни раце а сега се си дојде на свое место – изјави мајката на малиот Кирил напуштајќи ја нашата болница.