5 мај – Светски ден на хигиена на раце

мај 05,2022

Светскиот ден на хигиената на раце се одржува секоја година на 05 мај. Денот е прогласен од Светската здравствена организација (СЗО) и ги охрабрува пациентите и членовите на нивните семејства да им се придружат на здравствените работници во нивните напори да практикуваат добра хигиена на рацете. Според СЗО, секоја година, стотици милиони пациенти ширум светот се погодени од инфекции поврзани со здравствената нега. Повеќе од половина од овие инфекции би можеле да се спречат со тоа што здравствените работници правилно ќе ја одржуваат хигиената на рацете и болничката околина постојано при грижата за пациентите.

Хигиена на рацете значи миење на рацете со вода и сапун или нивна дезинфекција со алкохолен дезинфициенс. Медицинската хигиена на рацете се однесува на хигиенските практики поврзани со давање лекови и останата медицинска нега, со цел да се спречи појава на болест или нејзино пренесување.

Хигиената на рацете е особено важна за луѓето кои се занимаваат со храна или работат во медицинската област, но исто така е важна практика за пошироката јавност во секојдневното живеење. Луѓето можат да се заразат и со респираторни заболувања како што се грип или обична настинка, на пример, ако не ги мијат рацете- преку контакт пред да ги допрат очите, носот или устата.

Миењето раце е секојдневна рутина, континуирана пракса и треба да се прави на соодветен начин, доволно долго и во вистинско време.

Грижете се за Вашето здравје!