Автор: zmc_piksel_dev

Блефаропластика – корекција на очни капаци

Posted on by zmc_piksel_dev

Очите претставуваат нај проминентен дел на горната третина на лицето кое е од големо естетско значење. Притоа, очите ја прикажуваат физичката состојба на пациентот со тоа што очите се знак за свежост на човекот. Самиот процес на стареење, како и на преостанатите делови на телото, доведува до губиток на еластичноста на кожата кое доведува до појава на спуштени очни капаци. Блефаропластиката претставува операција на очните капаци, што е постапка која се користи за корекција на спуштените капаци. Во тек на оваа хируршка интервенција, хирургот го отстранува вишокот на кожа, мускулно ткиво, во зависност од индикацијата и масното ткиво кое може да е хипертрофично во подрачјето околу очите.

Кој е добар кандидат за корекција на очните капаци?

Корекцијата на очните капаци првенствено ја побаруваат пациенти кои посакуваат естетски третман од доменот на anti-aging медицината, со цел да се превенира процесот на стареење. Опуштањето на кожата околу очите е природен дел од стареењето, но пациентите можат да размислат за оваа операција ако сметаат дека овој процес доведува до нарушување на изгледот. Пациентите помислуваат на блефаропластика и ако нивните веѓи почнуваат да се спуштаат. Кај некои особи, блефаропластиката ги надминува овие козметски проблеми. Апсолутна индикација за блефаропластика претставува спуштеност на очните капаци до ниво кое доведува до потешкотии на видот, во таа цел самата блефаропластика овозможува подобрување на видното поле особено кај особи кои имаат и слабост на мускулите кои овозможуваат подигнување на очните капаци, односно кај пациенти кои имаат птоза на очните капаци.

Зошто кожата околу очите брзо старее?

Познато е дека првите видливи бори најпрво се јавуваат токму во подрачјето на очните капаци. Тоа е затоа што периорбиталната мускулатура е многу активна, притоа кожата е многу тенка и бргу доаѓа до губиток на еластичноста што доведува до формирање на бори во оваа регија. Поради тоа веќе во средните години кај многу особи се формираат бори во подрачје на очните капаци а тоа допринесува да целото лице оддава изглед на старост. Ова е веќе доволна причина да се размисли за корекција на очните капаци.

Подготовка за оперативна корекција на очните капаци

Подготовката за операција на очните капаци е следна: Прво, потребно е иницијална консултација со пластичен хирург како би се консултирале за актуелната предоперативна состојба на пациентот, да се објасни предоперативната подготовка, оперативниот тек и постоперативниот третман. Во текот на прегледот потребно е да се направи клинички преглед со кое што ќе се направи дистинкција на спуштени очни капаци од постоење на птоза на очните капаци. Во текот на прегледот се прави фотографија на очите и периокуларната регија кои ќе послужат во натамошната споредба со постоперативниот изглед. Во натамошниот тек, на пациентот се советува да се престане користење на лекови и суплементи кои доведуваат до зголемување на ризикот за интраоперативно и постоперативно крварење. Исто така, доколку пациентот е пушач, се советува да се прекине или да се намали пушењето неколку недели пред закажаната хируршка интервенција.

Како изгледа процедурата корекција на очните капаци?

Кога е во прашање хируршка интервенција за корекција на очните капаци, во поголемиот дел од случаите се користи локална анестезија. Општа анестезија може да се користи ретко во зависност од желбата на пациентот. Во текот на операцијата прво се обработуваат горните очни капаци. Правило е да локацијата на резот да се одбере така да постоперативната лузна да биде во потполност скриена и невидлива. Тука хирургот прави мал рез и го отстранува вишокот на кожно ткиво, мускулно ткиво или по потреба и периорбиталното масно ткиво. Блефаропластика на долните очни капаци обично подразбира одстранување на маста (масното ткиво), кое допринесува создавање на кеси под очните, но понекогаш се одстранува и мал дел од кожното ткиво. Резот исто така може да се направи на работ на долниот очен капак под трепките на истиот. После изведената корекција на очните капаци, пациентот во најголем број случаи може да оди дома брзо по самата интервенција.

Опоравување после операција на очните капаци

Опоравувањето од самата блефаропластика е релативно кратко во однос на некои други врсти на операции. Доколку не се јават компликации, пациентот после операцијата може да оди дома. Важно е пациентот да одмори неколку дена после извршената операција на очните капаци. По спроведената операција, очекувана е појава на оток и хематом во периорбиталната регија, но овие очекувани појави се од минлив карактер. Во постоперативниот период не се очекува болка, но доколку се јави болка истата се третира со медикаментозна терапија во домашни услови. Комплетното закрепнување после операција на очните капаци може да е со траење од 1 до 2 недели и истото е индивидуално кај секој пациент.
Поради локалната апликација на анестетик во периорбиталната регија, очекувана постоперативна појава е транзиторно заматување на видот и осетливост на светлина.
После спроведената оперативна интервенција се советува избегнување на носење на контактни леќи во траење од минимум 2 недели.

После спроведената операција, пациентот се упатува на понатамошен третман во домашни услови, каде оперативните рани се прекриени со завоен материјал, но окото не е затворено и притоа не пречи на видот. Завојниот материјал потребно е да стои во траење од 5 дена. 5тиот постоперативен ден пациентот потребно е да се јави на преглед со цел да се отстрани шавниот материјал. Процесот на отстранување на шавниот материјал е безболен. Во домашни услови, со цел да дојде до спад на постоперативниот оток, препорачливо е поставување на облог.
По вадењето на шавниот материјал, на пациентот се даваат инструкции за понатамошен третман во домашни услови, локална апликација на хепатромбин маст со цел да се намали постоперативниот хематом, но доколку хематомот не е многу изразен, тогаш се препорачува масажа на периорбиталната регија со користење на хидратантна крема. 14 дена постоперативно пациентите повторно се јавуваат на преглед со цел да се увиди постоперативната состојба без присутен оток и без присутен хематом, по што се дава натамошна препорака за користење на средства кои ќе ја намалат видливоста на постоперативната лузна.

Можни компликации

Бидејќи корекцијата на очните капаци претставува минимално инвазивна оперативна интервенција, истата се спроведува во амбулантски услови во локална анестезија. Поради тоа, оваа хируршка процедура ретко е пратена со компликации, освен појавата на оток и хематом кои се јавуваат речиси кај 80% од пациентите. Покрај оток и хематом, секако во тек и по спроведената хируршка корекција на очните капаци можна е појава и на други компликации како што се крварење, дехисценција (расцепување) на оперативната рана, некроза, инфекција, но користењето на фина оперативна техника и спроведувањето на адекватна предоперативна подготовка речиси во целост ги спречува овие компликации.

Често поставувани прашања

Дали во ист акт може да се оперираат и горните и долните очни капаци на двете очи?

Може да се оперираат и горните и долните очни капаци во ист акт, но доколку е можно се советува да се корекцијата да се направи во два одвоени акти.

Дали користењето Botox може да ја замени оперативната корекција на очните капаци?

Botox-от претставува блокатор на невро-мускуларната синапса и на тој начин доведува до смалена подвижност на мускулите. Истиот, може да се користи за корекција на борите околу очните капаци наречени Crow’s feet, но во случај на постоење спуштеност на очните капаци особено доколку е пратено со постоење на слабост на фронталните мускули Botox-от може да ја влоши состојбата на спуштеност на очните капаци.

Дали во исти акт може да се направи хируршка корекција на очните капаци и апликација на Botox?

Поради миорелаксирачкиот ефект на ботулинскиот токсин, Botox се препорачува минимум 3 недели по спроведената оперативна корекција на очните капаци.

Дали постои некој помалку инванзивен начин на третман на спуштеноста на очните капаци?

Можна е не хируршка корекција со користење на COG-ови конци (мезоконци), но истиот не може да го замени резултатот на хирургијата, притоа ефектот е краткотраен со траење од 6-12 месеци.

Која е нај адекватна возраст за спроведување на оперативната корекција на очните капаци?

Препорака е блефаропластика да се спроведува кај особи кои се постари од 40 години, но секако клиничкиот изглед е различен од пациент до пациент така да може да се направи и на порана возраст.

Д-р Живорад Коцевски
Специјалист по пластична реконструктивна и естетска хирургија

Flossing техника – третман со рестрикција на крвниот проток

Posted on by zmc_piksel_dev

Станува збор за физиотерапевтска техника при која се применува надворешен притисок со користење на специјална еластична лента во комбинација со вежби и мануелен третман. Времетраењето на еден третман е 30-45 минути, во зависност од регијата на примена.

Flossing техникaта е најчесто позната односно поврзувана со имињата на брендовите: RockFloss, Rogue Fitness, Voodoo Floss или EasyFlossing. Нејзината популарност континуирано расте бидејќи многу често се користи од страна на на физиотерапевтите ширум светот. Терминот Flossing често се користи истовремено со Blood Flow Restriction training (BFRT) т.е тренинг со рестрикција на крвниот проток.

BFRT и FLOSSING вклучуваат примена на надворешен притисок над или под одреден мускул или зглоб на екстремитетите, обично со користење на еластична лента. Притисокот овозможен од завитканата лента, безбедно го одржува артерискиот доток на крв, но го намалува или затвара венскиот одлив дистално од местото.

Најновите истражувања регистрираат зголемени бенефити од оваа техника при:

  • зголемување на обемот на мобилност на определени зглобови (глужд,колено,рамо)
  • намалување на мускулната болка
  • алтернативен третман на Осгуд-Шлатер-ова болест
  • подобрувања во перформансите на скок и спринт
  • подобри перформанси за време на тренинг/натпревар
  • превенција на повреди
  • подобро закрепнување на мускулите
  • зголемување на мускулната големина

Примената на траките за flossing предизвикува компресија и венска констрикција. Во зависност од посакуваниот исход, терапијата може да се користи во комбинација со вежби. Истражувачите откриле дека во врска со користењето техники за ограничување на протокот на крв, вежбите со отпор со низок интензитет покажуваат зголемена електромиографска активност (ЕМГ) во споредба со вежбањето само со отпор. По отстранувањето на компресијата, повторната перфузија на мускулното ткиво теоретски ги носи овие посакувани промени.

Примена на техниката

Практичната употреба генерално е наменета за перфиерните зглобови и мускули (нозете и рацете). Цел може да бидат вкочанети зглобови и/или затегнати мускули.

Процесот вклучува:

  • Поставување на флосинг траката околу екстремитетот (мускулите или зглобот) од проксимално до дистално;
  • 2 минути за третман;

Зглобот или мускулот може истовремено да се активираат активно или пасивно за време на третманот. Примената на flossing лентите потенцијално може да биде корисен метод при спроведување на тековните техники за третман на акутна вкочанетост, при истегнување на зглобовите и враќање на нормалниот обем на подвижност на зесегнатиот зглоб.

Лесно се комбинира со кинезиотејпинг, мануелен третман, кинезитерапија и електротерапија.
Оваа техника е достапна во нашата амбуланта за физиотерапија и ја изведуваат нашите искусни и соодветно обучени физиотерапевти.

За повеќе инфорамции и закажување јавете се на 02/3091-484

Блаже Арсов
Дипломиран физиотерапевт

Јазли на тироидната жлезда

Posted on by zmc_piksel_dev

Тироидната жлезда е сместена на предната страна на вратот и се состои од два лобуси кои се поврзани со истмус. Нарушувањата на тироидната жлезда може да бидат од морфолошки и функционален аспект. Морфолошките или нарушувањата во структурата на жлездата се манифестираат како нодуларни или цистични промени. Тие најчесто се евидентираат при случаен ултрасонографски преглед на вратот од некоја друга причина.

Ултразвукот е метода која се користи за откривање и следење на цврстите или цистични формации во тироидната жлезда. Околу една третина од нодусите/јазлите кои може да се идентификуваат со допир се тироидни цисти. Димензиите може да бидат различни, а содржината најчесто е колоидна течност, која во зависност од густината, доколку се аспирира (се отстрани со помош на шприц), истите јазли/цисти може да се намалат. Она што е важно да се знае е дека цистите честопати може повторно да се појават и доколку се големи или со сомнителна клеточна содржина, треба истите хируршки да се отстранат.

Солидните/цврсти јазли најчесто се со бенигна природа. Може да бидат единечни или мултипни. Нивното постоење најчесто е асимптоматско, освен доколку не станува збор за голем јазол кој врши притисок на душникот или голтникот, бидејќи во тој случај пациентот има отежнато дишење или голтање. Ултрасонографските карактеристики се многу важни за следење на промените на самиот јазол. Доколку јазолот уште на самиот почеток има некои ултразвучни елементи кои поставуваат сомнение за природата на самиот јазол, или доколку со текот на времето настанале промени во димензиите или карактеристиките, тогаш се поставува индикација за тенкоиглена аспирациона биопсија на јазолот на тироидната жлезда (ФНАБ). Со аспирација на клетки од јазолот, ќе се добие материјал за цитопатолошка анализа која ќе ја утврди генерално бенигната или малигната промена на јазолот, со насочување на понатамошниот тек на лекување.

Карциномот на тироидната жлезда е најчестото малигно заболување на ендокриниот систем. Диференцираните тумори како папиларниот карцином или фоликуларниот карцином на тироидната жлезда, често може да се излекуваат. Прогнозата е најдобра кај пациентите кај кои заболувањето е откриено во рана фаза. Анапластичниот карцином е агресивен, слабо реагира на третман и е со лоша прогноза. Медуларниот карцином е поагресивен од папиларниот и фоликуларниот карцином, но помалку агресивен од анапластичниот карцином и опфаќа 5-10% од сите типови карциноми на тироидната жлезда.

Лекувањето на карциномите првенствено се состои од хируршка интервенција.
Во Клиниката Жан Митрев има можности за сето тоа навремено да се идентификува, дијагностицира и правилно третира. Ви стоиме на располагање за сите подетални информации и услуги.

Д-р Џулиана Михајловска
Специјалист ендокринолог

9 Март – Светски ден на бубрезите

Posted on by zmc_piksel_dev

Светскиот ден на бубрезите е всушност кампања која се фокусира на подигање на свеста за важноста на бубрезите како орган, но и за влијанието на бубрежната болест и проблемите кои произлегуваат од неа. Овој ден се прославува секоја година во втората недела од месец март во повеќе од 100 земји на 6 континенти. Светскиот ден на бубрезите е заедничка иницијатива на Нефрлошкото здружение и Меѓународната федерација на бубрежни здруженија. Оваа година денот на бубрезите се одбележува под мотото: “Да се подготвиме за неочекуваното, да ги поддржиме ранливите”.

Денес повеќе од 850 милиони луѓе во светот имаат некоја форма на бубрежна болест, односно едно од 10 возрасни лица се лекува од различна форма на бубрежна болест, што ако се спореди со останатите хронични заболувања е двапати поголем од оние кои што живеат со дијабетес мелитус (422 милиони), дваесет пати повеќе од светската преваленца со малигни заболувања (42 милиони) и приближно исто толку со AIDS/SIDA (36.7 милиони). Фактот дека едно од три возрасни лица кои се лекуваат од дијабетес мелитус и едно од пет возрасни лица со покачен крвен притисок може да развие бубрежна болест, која што во најголемиот број на случаи доведува до хронична бубрежна болест и до терминална бубрежна функција.

Чувајте ги вашите бубрези за да го сочувате вашето општо здравје.

Ставена во мирување изградбата на најсовремениот радиолошко-онколошки центар во регионот

Posted on by zmc_piksel_dev

Како резултат на случувањата во последните 8 месеци поврзани со Клиника Жан Митрев ја информираме јавноста дека принудени сме да ја ставиме во мирување изградбата на новиот радиолошко-онколошки центар во Катланово кој требаше да почне со реализација минатата година.

„Центарот за Радиологија и Онкологија“ е проектирана инвестиција вредна 45 милиони евра, која е планирана со учество на странски партнери. Предвидено е да се гради на локација во месноста Катланово во близина на Скопје каде треба да работат околу 350 медицински лица – доктори и друг медицински персонал. Радиолошко-онколошкиот центар планирано е да биде опремен со најсовремена апаратура за дијагностика и третман на тешко болни пациенти. Исто така, проектиран е и специјален дел наменет за рехабилитација и згрижување на пациентите засегнати од малигни и други заболувања. Со остварување на овој проект ќе се обезбеди врвна медицинска нега и третман за пациентите.

Се надеваме дека оваа година конечно ќе започнеме со изградбата на овој проект што е од исклучително значење за Македонија и регионот.

Светски ден на повеќекратна личност

Posted on by zmc_piksel_dev

Петти март се одбележува како светски ден на повеќекратната личност . Одбележувањето е од две причини, и тоа: Првата која има за цел да се подигне јавната свест за растројството на повеќе кратна личноста, кое во последниот период се нарекува Дисоцијативно растројство на идентитетот (ДИД). Дисоцијативното растројство на идентитетот е состојба во која идентитетот на една личност е поделен на две или повеќе специфични состојби на личноста. Оваа болест останува слабо разбрана и донекаде мистериозна. Се смета дека траумите особено во детскиот период може да имаат влијание. Се  манифестира со чувство на  емоционална одвоеност, слабо себепрепознавање, губење на меморијата за секојдневни настани и лични информации. Лицата страдаат и од депресија, дел од нив се соочуваат со обиди за самоубиство, самоповредување, менување на нивоата на функционирање, обезличување, злоупотребуваат супстанции или се под влијание на аудитивни или визуелни халуцинации.

Во случај на дисоцијативно нарушување на идентитетот, поединецот поседува две различни или различни и релативно издржливи личности. Овие се нарекуваат и раздвоени личности. Па, овие различни личности одвоено го контролираат однесувањето на лицето. Само 1% од населението страда од ова нарушување на повеќекратна личност. Со ова состојба на овие лица им треба  соодветна социјална поддршка од страна на членовите на семејството, пријателите и заедницата, но од големо значење е добивањето на  психичка поддршка и помош.

Втората причина за одбележување на овој ден е запознавање на сопствената личност.

Но што е всушност Личност? Психологијата ја дефинира личноста како психолошка карактеристика на луѓето, која директно влијае на мислите, постапките и зборовите на секој човек. Но убаво е да се спомене дека Личност доаѓа од латинскиот збор persona, што значи маска. Персона е сценска маска што ја користел актерот за да го скрие вистинскиот идентитет на сценската личност. Има за цел да се претстави одредена особина на ликот.

Оттука и ние како луѓе, при анализа на сопствени постапки, зборови  согледуваме дека секој од нас покажува различна страна од својот карактер при една состојба и на различни места. Понекогаш се чини дека нашите личности се менуваат, во зависност од тоа со кого сме и што правиме.

Истото треба да го имаме на ум за да се разбереме себе си и луѓето околу нас. Преку согледување на личните карактеристики ќе можеме да ги разбереме однесувањата,  размислувања, карактерите на лицата, а тоа  ќе ни овозможи да  се однесуваме  со поголема толеранција и поддршка кон нив.

Денеска одбележуваме 23 години постоење

Posted on by zmc_piksel_dev

Пред 23 години ја внесовме кардиoхирургијата во Македонија за нашите граѓани да имаат врвна медицинска услуга

Денеска одбележуваме 23 години постоење

  • 390 000 пациенти
  • 40 000 операции
  • Над 1 милион прегледи
  • 350 вработени

Приказната на Клиниката Жан Митрев, започна на денешен ден во сега далечната 2000 година пред точно 23 години. Во изнајмен дел од Воената болница во Скопје, беа поставени контурите на тогашната болница „Филип Втори“, каде што е направена првата бај-пас операција во земјата, предводена од д-р Жан Митрев.
Почнавме со само шест вработени, операциона сала една на број и со дванаесет (12) болнички кревети.
Благодарение на големата посветеност, упорност, истрајност и се разбира довербата од пациентите полека но сигурно, се развивавме и прераснавме во најсовремен медицински центар со комплетни дијагностички процедури во повеќето медицински гранки, поддржани со услуги од модерната хирургија, анестезија и интензивна нега.

Предизвици имаше и ќе има, но во ниту еден момент не ја изгубивме од вид визијата од која започна се:
Извонредност во грижата за здравјето на пациентите.
Идеалот да им дадеме на граѓаните на Македонија врвна медицинска услуга согласно највисоко утврдените стандарди во светски рамки е достигнат.

Од 2016 година „Жан Митрев Клиника“ е сместена во нов, модерен објект, инвестиција од 40 милиони евра, во кој главна мисија е фокусот на развојот на болницата и постигнување на нависок можен квалитет во услугите. Клиниката се простира на 17.000 м2, располага со повеќе операциони сали, одделенија за интензивна и полуинтензивна нега во која функционира нашиот тим од над 350 професионалци. Изградена е плански, согласно намената и ги задоволува највисоките еколошки стандарди без CO2 отпечаток (carbon footprint). Комплетно е дигитализирана, хартија скоро и да не се користи во секојдневното работење. Меѓу првите во Европа, „Жан Митрев Клиника“ оформи генетска лабораторија и ги доближи различните генетски испитувања во рутинската секојдневна пракса. Комбинацијата на индивидуален пристап со фармакогенетика т.е. толеранција/нетолеранција на одредени лекови беше почеток на примената на персонализирана медицина специфична за секој пациент со што се спречуваат можните фатални последици по пациентите.
Потврда за успешноста е и фактот што во 2020 година, дури и во време на пандемија, по втор пат добиваме акредитација со златен печат од „Joint Commission International“.

Во последните години се појави потребата и од регионалнa присутност. Затоа беа отворени два големи дијагностички центри под брендот Жан Митрев Дијагностик најпрво во Струмица, а потоа и во Битола. Целта за отворање вакви центри е да се гарантира нивото и квалитетот на нашите услуги локално и секако да им помогнеме на пациентите да се чуствуваат подобро, посигурно и посреќно.
Клиниката „Жан Митрев“ континуирано вложува во постојана едукација и усовршување на своите вработени, создавајќи врвни кадри подготвени да се соочат со сите предизвици.

,,Следејќи ја новата технологија во медицината и работа со најнови медицински апарати, ние создаваме кадри овде, што претставува една многу долгорочна инвестиција на која всушност се базираат нашите одлични резултати. Реално, имаме доктори кои се далеку поподготвени и со многу повисоки професионални перформанси од многу доктори во светот“, вели д-р Митрев.
ОНА ШТО ЈА ПРАВИ ОВАА КЛИНИКА ПОСЕБНА Е УНИКАТНИОТ ПРИСТАП СО БЕСПЛАТНИ ОПЕРАЦИИ ЗА ПАЦИЕНТИТЕ ЗА СРЦЕ И КРВНИ ЖИЛИ ПОВЕЌЕ ОД 20 ГОДИНИ. УСПЕШНАТА СОРАБОТКА СО ДРЖАВНИОТ ФОНД ЗА ЗДРАВСТВО ЗА КАРДИОХИРУРГИЈА ИМ ОВОЗМОЖУВА НА ПАЦИЕНТИТЕ ДА ГИ ДОБИЈАТ ОВИЕ ВРВНИ УСЛУГИ БЕСПЛАТНО.

Иако само во кардиохирургијата, сепак ова е пример, т.е. покажува колкав потенцијал за развој на здравството постои, ако се променат условите на функционирање.
„Жан Митрев Клиника“ е класичен пример за остварување на една визија, концепт кој макотрпно бил реализиран и е пример за многу млади луѓе дека може и тука, дома, да се направат големи работи.

Горди сме на целиот тим кој направи ова да биде реалност и секако бескрајно благодарни на нашите пациенти кои ни го доверуваат најскапоценото – нивното здравје.

Kлиника Жан Митрев: Кривичен суд ја донесе пресудата без судење, судијата Лидија Петровска донесе решение со кое нашата болницата треба да престане со работа

Posted on by zmc_piksel_dev

Клиниката Жан Митрев сака да ја информира јавноста дека на еден ден пред да отпочне судскиот процес, од страна на Кривичниот суд е донесено решение за определување на предлог мерки кои предвидуваат целосно блокирање на сметките на болницата.
Укажуваме дека со донесените мерки целосно се блокира работењето на болницата Жан Митрев, која е здравтсвена организација од јавен интерес.

Клиниката Жан Митрев од денеска не е во можност да ги отплаќа обврските кон банките.
Сакаме да ја информираме јавноста дека ќе направиме се што е во нашите можности и лекувањето на ниту еден пациент нема да биде доведено во прашање иако, постапките на Кривичниот суд, а на барање на обвинителството одат во поинаква насока односно бараат наше затварање.
Се што баравме е фер судење во однос на лагите и невистините пласирани против нашата Клиника, а добивме „пресуда“ пред отпочнување на судскиот процес.
Токму поради овој развој на настаните кој го очекувавме после седум месечна синхронизарано организирана хајка баравме од јавноста, како и од претставниците на меѓународната заедница во Македонија да се заинтересираат и да го следат судскиот процес.

Очигледно дека нашите апели беа залудни бидејќи токму пред отпочнувањето на судскиот процесот сме сведоци на брутална блокада со нејасна позадина на Клиниката Жан Митрев.
Образложението на Кривичниот суд дека се блокираат сметки на правни лица кои не се од интерес на клиниката е целосно неосновано. „ПЗУ Жан Митрев Струмица“ и „Битола“, не можат сами да ги покријат инвестициите и тие ги покрива матичната клиника во Скопје. Другиот правен субјект „Фила Фарм“ работи со позајмица за да може да ги исплаќа побарувањата на правниот субјект „ЛАБС“, кој е исто основан и поврзан со клиниката „Жан Митрев.“ Друштвата кои се наведени се формирани и се финансираат согласно законската регулатива во државата и истите се тесно поврзани со функционирањето на клиниката. Тие вработуваат голем број луѓе и истите се двојно пораснати во капитал.
Потенцираме дека ваквото решение на Кривичниот суд е во спротивност со начелата на презумпција на невиност и создава неодржлив притисок врз Клиниката Жан Митрев.