Месец: м.г

Стрес ехокардиографија

Стрес ехокардиографијата е испитување кое користи ултразвучни техники за одредување како срцевиот мускул реагира при физички, фармаколошки или електричен стрес. Тоа е безболна процедура, која постигнува слична дијагностичка и прогностичка точност како и радионуклидните перфузиски тестови, но за значително пониска цена, без негативно влијание врз средината и без последици за пациентот и докторот. Прецизноста на стрес ехокардиографското испитување за откривање на значајна коронарна болест е помеѓу 80-90% и го надминува класичниот коронарен стрес тест, особено кај жени и пациенти со хипертрофија (задебелување) на левата комора. Стрес ехокардиографијата е моќно прогностичко средство кај хронична коронарна болест, после инфаркт на миокардот и кај евалуација на пациенти пред голема не-кардиохируршка операција. Се користи за проценка на кинетиката на зидот на левата комора, проценка на вијабилитетот на миокардот и проценка на големината на аортната стеноза. Постојат повеќе индикации за изведување на стрес ехокардиографско испитување. Тоа се: А. Дијагноза на коронарна болест:1.Пациенти кај кои стрес тестот е контраиндициран 2.Пациенти кај кои стрес тестот не е можно да се изведе (на пример пациенти кои тешко се движат поради проблеми со колена, колкови итн. ) 3.Пациенти со недијагностички или граничен коронарен стрес тест4.Блок на левата гранка5.Стрес тест на субмаксимални вредности ( пр. пациенти со слаба физичка кондиција)6.Проценка на вијабилитет кај високо ризични пациенти за коронарен бајпас операција (дали пациентот ќе има корист од бајпас операција). Б.Прогноза и стратификација на ризик кај пациенти со позната коронарна болестВ.Проценка на оперативен ризикГ.Евалуација за срцева етиологија на диспнеа (глад за воздух на напор)Д.Евалуација после реваскуларизацијаЃ.Локација на исхемијаЕ.Евалуација на тежина на валвуларна стеноза.

Дијагностицирањето на коронарната артериска болест се постигнува преку провоцирање на транзиторно влошување на функцијата на срцето со користење на соодветен стрес фактор. Знак за исхемија во тек на стрес ехокардиографијата е влошување на функцијата на срцето во дел кој бил нормален пред почеток на испитувањето односно пред подлегнување на стрес агенсот. Знак за вијабилност на миокардот е подобрување на функцијата на миокардот на ниски нивоа на стрес во дел од срцето кој бил со пореметена функција претходно. Стрес ехокардиографското испитување може да се изведе со користење на добутамин, дипиридамол или со велосипед. Добутаминското ехо е подобро кај пациенти со бронхијална астма или проблеми во спроводниот систем на срцето, додека дипиридамолскиот тест се препорачува кај пациенти со тешки аритмии или тешка хипертензија. Денес, стрес ехокардиографијата претставува најдобар (најекономичен, најефективен во однос на ризикот) можен метод за откривање на коронарна болест помеѓу неинвазивните дијагностички процедури во кардиологијата. Испитувањето се изведува најмногу 20 минути, во амбулантски услови.Оваа метода се изведува рутински во кабинетот за функционална дијагностика во рамките на специјалната болница по хируршки болести ”Филип Втори”.

Нега на болен базирана на eвропски стандарди

Професионалната нега е процес на интеракција помеѓу тие кои ја вршат, пациентите и роднините, при кој заедно се оценуваат потребите на пациентот, се дефинираат целите, се планираат мерките, истите се извршуваат, а потоа се евалуираат резултатите. Овде се ориентираме по процес на здравствена нега. Негата е професија, која во интердисциплинарниот тим претставува една посебна квалификација. Ние, вработените во Специјалната болница по хируршки болести Филип Втори, сметаме дека сите професионални групи кои директно или индиректно се грижат за пациентот се рамноправни, колегијални, со меѓусебно разбирање и соработка. Се стремиме да ги исполниме петте функции за нега по решението за дипломска едукација за здравствена нега и нега на болен од швајцарскиот црвен крст: – поддршка и превземање на активностите од секојдневниот живот- следење во кризни ситуации, вклучувајќи ја и фазата на умирање- соработка при превентивни, дијагностички и терапевтски мерки- соработка при акции за спречување болести и несреќи, како и одржување и поддршка на здравјето – соработка при програмите за рехабилитација- соработка за подобрување на квалитетот и ефикасноста на негата, а со тоа и развој на професијата- соработка при истражувачки проекти во здравствениот систем

Негата го изразува нашиот основен став на кој се базираат нашите стандарди за нега, концепти и нашето секојдневно работење. Таа се извршува без оглед и без предрасуди за биографијата на пациентот, националноста, религијата и актуелните прилики во животот на пациентот. Го заштитуваме правото на пациентот за самостојно одлучување, неговиот приватен и интимен дел и строго се држиме до професионалната тајна. Прифаќаме дека секој човек индивидуално ги перцепира здравјето и болеста, се занимаваме со човечките искуства и потреби кои се поврзани со кризни ситуации и физички ограничувања. Ги стимулираме самоодговорноста и самостојноста на пациентот и го поддржуваме да ги совлада промените на животната состојба. Нам ни е важна задача, индивидуалното, достојно следење на тешко болните, како и поддршката на семејството во тешките моменти.Квалитетот на нашата нега се обезбедува со основниот етички кодекс на нашата организација, со декларација за нега, со стандардите за нега, кои редовно се унапредуваат со детален едукациски концепт за новите соработници и континуирана едукација на целиот тим. Овие стандарди се ревидираат во согласност со промените во препораките од соодветни светски институции и здруженија. Квалитетот на негата може да се евалуира и мери на база на деталната сестринска документација. Ги земаме во предвид анализите од анкетите на пациентите за нивното доживување од третманот, кои ги извршува психолошката служба.

Високостепена стеноза на обете каротидни артерии кај 62- годишен пациент – приказ на случај

Крвта ги пренесува хранливите материи и кислородот до мозокот преку каротидните артерии, што значи преку каротидните арерии се храни мозокот. Поради натaложување на маснотии во ѕидот на артериите, доаѓа до стеснување на нивниот луме, а воедно и до многу лесно предизвикување на мозочни удари, или пак до привремени недостатоци на кислород во мозокот наречени ТИА (транзиторна исхемична атака). Болеста може да се јави на левата или на десната каротидна артерија или и на двете заедно, како во нашиот случај, при што се отежнува лечењето и се влошува прогнозата кај пациентот. Околу 75% од случаите со мозочен удар, барем еднаш во животот претходно имале ТИА што претставува привремен невролошки дефицит и обично трае околу 24 часа, а мозочниот удар за разлика од ТИА се карактеризира со траен невролошки дефицит. Маж на 62- годишна возраст, се јавува на кардиоваскуларен преглед заради чести синкопи кои започнале пред 2 месеци, но во последните неколку дена пред прегледот се с’ почести и по неколку на ден.

Сл. бр. 1 Сл. бр. 2

Во тек на прегледот, пациентот е со губиток на свест за неколку секунди. Направен е доплер на каротидни артерии, со што е верифицирана високостепена стеноза (>95%) на обете интерни каротидни артерии (АКИ). Ехокардиографски без особености. Индицирано е ургентно да се направи МСКТ на каротидни артерии со церебрална ангиографија и мозок. Верифицирани се критични стенози (95-99%) на обете АКИ (сл. 1 лева АКИ, сл. 2 десна АКИ – предоперативно) со несигнификантни промени на мозокот.

Сл. бр. 3 Сл. бр. 4

Поставена е индикација за ургентна тромбендаректомија (ТЕА) на обете АКИ последователно, со период од 10 дена, од едната до другата операција. Пациентот веќе после првата операција е со подобрување на состојбата и без синкопи од првата до втората ТЕА (сл. 3 лева АКИ, сл. 4 десна АКИ – постоперативно). Ризикот од трајни последици кај пациенти со критични стенози на една АКИ е висок (>70%), а со критични стенози на обете АКИ може да биде фатален. Пациентот се следи 1 година, се чувствува добро и после операцијата никогаш се немаат повторено епизодите на губиток на свест. Кај пациентот е поставена брза дијагноза и направен ургентен третман на обете АКИ, со што е спречено добивање на голем мозочен удар и тежок инвалидитет, а можеби и смрт.

КТ дијагностика на руптурирана аневризма на абдоминална аорта

Абдоминална аневризма на аорта (познато како тројно ААА) претставува балонирана аорта, повеќе од 50% од нормалниот дијаметар на аортата и е најчеста форма на аневризми на аортa – 90%. Најчесто се јавува кај пациенти на возраст меѓу 65 -75 години, почесто мажи. Аневризмите можат да бидат асимптоматски или да даваат болки во стомак или долен грб. Голема компликација е руптура на аневризмата што е животно загрозувачка состојба со морталитет 60-90%.По направениот ултразвук следи мултислојна компјутеризирана томографска ангиографија.Компјутеризираната томографска ангиографија е метод од избор за оваа живото загрозувачка состојба, поради незјината брзина и прецизност, самиот преглед трае неколку минути. Најчесто руптурираните аневризми се манифестираат на КТ како ретроперитонеален хематом, пропратен со поголема аневризма на абдоминална инфраренална аорта. Хеморагија може да има и во периреналниот простор, парареналниот простор, псоасниот мускул и перитонеум. Се детектира и дисконтинуитет на ѕидот на аортата на местото на руптурата.Со оваа метода, добиваме дополнителни важни информации за величината на аневризмата, активната екстравазација и зафатеноста на реналните и висцералните гранки, како важни информации за одлуката за понатамошен третман – најчесто оперативен.Некогаш се детектираат и во порана фаза, кога е сеуште интрамурална хеморагија, но најчесто за неколку часа настанува и екстравазација.Во период од 2000-2013 година, во нашата установа од 13542 оперативно лекувани кардиоваскуларни пациенти, 3085 (22,8%) беа со оперативен третман на големите крвни садови, од кои 326 (2,4%) пациенти со аневризма на абдоминална аорта. Од оперираните пациенти 78 (23,9%) беа со акутна руптура и потреба од итна животоспасувачка операција.Приказ на пациенти:

Сл. бр. 1 Сл. бр. 2

Сл. бр.3 Сл. бр. 4

Случај 1Пациент на 76- годишна возраст, со руптура на аневризма на абдоминална аорта. Примен во животозагрозувачка општа состојба, хеморагичен шок, сомнолентен, хипотензивен, диспноичен, со силни болки во стомакот. Пациентот знаел за аневризматско проширување на абдоминалната аорта од пред неколку месеци, дијагностициран со компјутеризирана томографија. Направен е 64 МСКТ преглед на аорта со наод за руптурирана аневризма (слика 1, 2, 3 и 4 црна стрелка) на инфраренална аорта со пречник 90мм и интраабдоминална хеморагија (слика 1, слика 3 и слика 4 – бела стрелка). Присутна аневризма и на лева заедничка илијачна артерија 30мм .Индициран и направен итен оперативен третман, од типот на замена на инфраренална аорта.

Сл. бр. 1 Слика бр.2

Слика бр. 3 Слика бр. 4

Случај 2Пациент на 81- годишна возраст со руптура на аневризма на абдоминална аорта.Примен со болки во стомак од пред 3 дена. Направен е 64 МСКТ преглед на аорта, со наод за задржана руптурирана абдоминална аневризма (слика1, слика 2- бела стрелка, слика 3), со пречник 85 мм (слика 1, стрелка, слика 2, бела стрелка) и ретроперитонеален хематом. ( слика 2- црна стрелка, слика 4)Присутна аневризма и на лева заедничка илијачна артерија 65мм .Индидициран и направен итен оперативен третман, од типот на замена на инфраренална аорта.