Месец: м.г

Првото “дружење“ на Драган Стоичов( 1940) од Делчево со ортопедскиот тим од ЖАН МИТРЕВ КЛИНИКАТА бил во 2015 година.  Сега, во 2017 година имаше трета ортопедска интервенција. “ Пред две години, кога болките во коленото се интензивираа и почнаа проблемите со движењето закажав ортопедски преглед. По консултација со д-р Сашо Младеновски се согласив за операција на коленото од левата нога. Се беше во ред, закрепнав за брзо време и се вратив на секојдневните прошетки и активности“, ни објасни Драган кој е љубител на прошетки во природа. Веќе во 2016 година, поради болка во другото колено се решил за нова интервенција. “Успехот што го имав со левото колено, се потврди и кај операцијата со десното колено. Бев пресреќен поради тоа, поради вратената подвижност и сум благодарен на д-р Младеновски и целиот персонал кој работеше со мене додека бев на болничко лекување. Ми се врати и сонот“, дополни тој. Ова лето Драган имаше трета средба со ортопедите. Овој пат со д-р Константин Митев. “ За време на летниот одмор имав незгоден случај. Во обид да помогнам на друг, јас се лизнав покрај базенот. Ме транспротираа до болницата во Банско, Бугарија и ми рекоа дека сум за операција и ми препорачаа да одам на Клиниката за ортопедија во Софија. Но, недвосмислено,  мојот избор беше повторно ЖАН МИТРЕВ КЛИНИКА“, додаде Драган кој само што завршуваше со физикална терапија и беше расположен да ја сподели својата позитивна приказна со нас. “И по трет пат се` добро се заврши. Зарем треба да има уште причини зошто ја одбирам оваа болница за мене и мојата фамилија“, објасни Драган. Неговата сопруга е исто така наш пациент која имала кардиолошка операција во 2012 година. “ На почеток лутавме низ другите болници и некако надежта ни се губеше се додека не дојдовме на преглед кај д-р Жан Митрев. Ми рече дека сопругата е во критична состојба и дека треба итна операција. Се согласивме и таа до денес успешно функционира со 4 бајпаса“, ја дополни приказаната со искуството и за неговата сопруга. Драган денес ужива во пензионерски денови и се надева дека и по третата ортопедска операција ќе може да оди на прошетки низ планината заедно со неговата сопруга. Тој испрати поздрави и до двата синови кои го следат неговиот пат и  работат во Швајцарија, како и ќерката која е во Словенија верувајќи дека ќе ја прочитаат неговата приказна.

Определени заболувања или состојби од невролошки или пост хируршки карактер најчесто ја ограничуваат мобилноста на пациентите при што се создаваат и услови за појава на различни видови на компликации во периодот на нивното лекување. Најчести компликации од нефизиолошко мирување се декубит, длабока венска тромбоза, намалување на мускулниот тонус и обем, контрактури, намален белодробен капацитет, бронхопневмонија, продолжена механичка вентилација и др. Знаејќи го тоа, во ЖАН МИТРЕВ КЛИНИКАТА посветуваме посебно внимание на овие пациенти. За успешен третман со поголем бенефит  за пациентите, непходно е  процесот на рехабилитација   да се започне што е можно порано, и да се искористат новите технологии односно современа апаратура. Физиотерапевтски тим од нашата установа ги применува овие уреди и може да потврди за нивниот бенефит.

MOTOmed е моторизиран, софтверски контролиран систем за терапија со движење кај пациенти со мултипла склероза, мозочен удар, параплегија, квадриплегија, церебрална парализа, Паркинсонова болест, како и било кој  облик на намален мотилитет (долготрајна неподвижност поради хируршки зафат, компликации од продолжена механичка вентилација, кома…) .

Тераписки цели

Намалување на напнатоста на мускулатура, подобрување на флексибилноста, ослободување на мускулите и кај општа вкочанетост
Прогаоѓање на резидуална мускулна сила која е незабележителна и е и недоволна за движење, а со користење на овој уред може да се пронајде и примени
Намалување на последиците од инактивитетот како што се проблемите со циркулацијата ( студени нозе), вкочанети зглобови, скратени мускули, проблеми со пробава и перисталтика, со мочниот меур, со остеопороза, едеми на зглобови и екстремитети. Дневната MOTOmed терапија со движење исклучува други непријатни и скапи третмани
Поттикнување на способноста за движење при што MOTOmed тренингот може да создаде и/или оддржува основна добра кондиција потребна за движење ( издржливост и сила на мускулите, намалување на лимитирачка вкочанетост на мускулите и подобрување на постура и сигурност при движење)
Подобрување на менталната состојба – со контрола над сопственото движење

Терапевтски опции

Пасивен тренинг се применува кај спастични плегии/парези, или како подготовка за физиотерапија, поради неговото релаксирачко дејство
Активен тренинг (ServoCycling) кој овозможува активно возење и кај пациенти со лимитирана мускулна сила. Пациентот користи своја резидуална мускулна сила и со помош на моторот и специјална програма и може да се движи. Оваа опција се користи во најраниот стадиум на рехабилитација за јакнење на мускулите
Активен тренинг се изведува со сопствена мускулна сила против отпор. Оптоварување се подесува во 16 -20 прецизно градуирани брзини. Пасивниот тренинг е многу ефикасен за загревање и опуштање на мускулите пред, за време и по активното возење.

Контраиндикации :

Тешки форми на контрактури
Тежок стадиум на остеопороза
Тромбоза на долни екстремитети
Вродени деформации на рбетот – сколиози од (III IV степени)
Неконсолидирани фрактури
Остри хронични инфекции
Метастази
Когнитивни нарушувања/психијтриски нарушувања
Епилепсија

Уред за континуирана пасивна мобилизација -Артромот

Уредите за континуирана пасивна мобилизација се користат во првата фаза на рехабилитација по хируршка интервенција или кај траума на мускулно-скелетниот систем. Главни цели во прва фаза на рехабилитација се: контрола на пост-оперативна болка, намалување на воспаление, заштита на оперираната региа за стекнување на услови за соодветно зараснување и спроведување на пасивните движења во контролиран обем и специфична рамнина. Артромот е уред со кој зглобот континуирано, пасивно се движи со контролиран обем на движења и кој постапно се зголемува.

Што се континуирани пасивни движења? Тоа се прецизно повторувани движења во точно зададени рамки, симултано во сите правци  (агол и тип на движења во третираниот зглоб) во траење од најмалку половина час на ден, при што се следи  принципот на современата терапија “ што подолго тоа подобро” и е можно да се примени само со помош на компјутерски контролираните движења на Артромот.

Уредот за континуирана пасивна мобилизација – Артромот се применува постоперативно по различни видови на ортопедски операции. Движењето на синовијалната течност во рана фаза на рехабилитација овозможува подобра дифузија на хранливите материи во сите зглобни структури по оперативниот зафат. Континуираните пасивни движења превенираат формирање на фиброзно ткиво и овозможуваат подобра подвижност.

Кога се користат уредите за континуирана пасивна мобилизација- Артромот?

Веднаш по:

Спортска повреда на коленото
Артроскопија на коленото
Менисектомија
Реконструкции на лигаментите (LCA; PCL; MPFL)
Конзервативно третирани повреди на колено
Стабилна остеосинтеза
Остеотомија на колено
Трансплантација на рскавица на коленото
Вградување на тотална ендопротеза на коленото

Кои се придобивките од континуираните, пасивни движења во раната фаза на рехабилитација?

Намалување на болка, едем и хематом
Намалување на ризикот за појава на тромбоза
Регенерација на рскавица и синовијална течност
Спречување на формирање на прираслици
Спречување на формирање на контрактури
Враќање на нормалната функција на зглобот
Намалување на престојот во болница

Специјализираната болница Жан Митрев е секогаш во чекор со најновите пристапи во молекуларната дијагностика. Отсега, кај сите предоперативни пациенти тестирањето за присуство на инфективни организми ќе се извршува со најнапредната и најчувствителната PCR технологија, без промена во цената.

Досега присуството/отсуството на инфективни агенси како HIV, hepatitis B и hepatitis C вирусите се извршуваше со биохемиско-имунолошки методи. Отсега, за сите предоперативни пациенти, ќе се спроведува рутинска, понапредна PCR технологија за молекуларно биолошка детекција на истите којашто е почувствителна и поверодостојна од претходната.

Бидејќи здравјето на пациентите и нивната најдобра нега се нашиот прв и единствен приоритет!

Информирајте се повеќе на 02/02/3 104 921 или на е-маил: info@zmc.mk.

Пливачите од ПК “Челични“ од Штип на кои Специјализираната болница ЖАН МИТРЕВ од неодамна им е поддршка редат успеси. На последниот Охрдиски маратон кој традиционално се одржува на 2 август учествувале 10 пливачи од овој клуб со добар пласман.

“Најдобар натпреварувач од нашиот клуб беше Марија Ристовска која освои 2 место. Ова е добар поттик да продолжиме и понатаму со секојдневни тренинзи и да се бориме за нови награди на следниве маратони“, објасни Мирко Јакимовски, тренер во клубот. На “ челичните“ ова не им е прво натпреварување. “ До сега имаме учествувано на две летни државни првенства и две зимски првенства и на еден новогодишен Куп на кратки стази во организација на ПФМ.Секако, наши пливачи учествувале на повеќе маратонски трки на 2,5 км (Охридски, Преспански, Велешки и Дојрански), како и на повеќе пливачки митинзи во Македонија, Србија и Бугарија. Следен натпревар им е Велешкиот маратон кој е планиран на 27 август, 2017 на 2,5 км.

Пливачкиот клуб “Челични“ е основан во 2016 година и е официјален член на Пливачката федерација на Македонија. Во клубот има 15 пливачи на возраст од 10-16 години. Секоја година организираат обука за непливачи каде околу 150 деца ги учат пливачките вештини. Тренерите од овој клуб веќе три години работат на проектот на адапатација на  водена површина и основна елементарна техника за пливање за децата од Дневниот центар за лица со посебни потреби од Штип. За време на летниот период тренинзите ги организираат на Градскиот базен во Штип, додека останатиот период доаѓаат на тренинзи на Олимпискиот базен во Скопје, салата Борис Трајковски или затворениот базен во Куманово.

Со цел забрзување на процесот на природно лекување на организмот, физиотерапевтите од Специјализирата болница ЖАН МИТРЕВ користат нова техника- Kinesio Taping. Toa e техника на лепење на “Kinesio Tex” ленти чија функција е забрзување на процесот на природно лекување на организмот при што се обезбедува  поддршка и стабилност на мускулите и зглобовите, без нивно ограничување . “Kinesio Tex Tape” е еластична адхезивна лента развиена од јапонскиот киропрактичар д-р Кензо Касе. Toa е хипоалергена, водоотпорна лента направена од памучни влакна со акрилен лепак која може да се користи неколку дена и е безбедна за користење за широка популација, од спортисти до педијатриски пациенти. Kinesio Taping  најчесто се користи:

како потпора на мускулите ( ги подобрува контракции на слабите мускули, го намалува мускулниот замор и грчеви и овозможува поголем обем на движења и ја намалува болката)
при намалување на едеми и хематоми (ја подобрува крвната и лимфна циркулација, ја намалува температурата и зголемува елиминацијата на токсините во мускулно ткиво и со тоа се намалува воспалението и болка во кожата и мускулите)
ги активира внатрешните аналгетични системи (го активира спиналниот и еферентен инхибиторен систем)
при корекција на проблеми со зглобовите (го подобрува односот на зглобните површини кој што е провоциран од спазам или скратување на мускулите, го нормализира мускулниот тонус и пореметувањата на зглобната фасција, го зголемува обемот на движење и ја намалува болката)

Третман на лимфедем

За правилно користење и примена на оваа техника потребна е целосна проценка на пациентот. Оваа проценка треба да вклучува рачно тестирање на мускулите, тестирање на опсегот на движењето, оцена на одењето и слични ортопедски тестови кои што се сметаат за неопходни. Информациите добиени од овие проценки ќе му  овозможат на физиотерапевтот да изготви соодветен протокол за третман. Наодите од клиничката евалуација или проценка ги диктираат спецификите на апликацијата на Kinesio лентата. Со користење на единечни ленти во форма на  “I”  или модификации во облик на “X”, “Y” или слични специјализирани форми, како и насоката и количеството на истегнување на лентата за време на примената, Kinesio Tex лентата може да се примени на стотици различни начини. Во некои случаи, третманот на некоја состојба може да бара и третман на други основни состојби.

Кинезио тејпингот  се темели на концептот на олеснување на мускулните и кожните движења, со цел да се постигне биомеханички, терапевтски ефект врз третираните зони. Лентата со своите микро движења ги стимулира кожните и поткожните рецептори, стимулирајќи го нервниот систем кој го условува мускулниот рефлекс. Освен тоа, лентата со помош на кожната стимулација го редуцира лимфниот и крвниот застој, ја подобрува локалната микроциркулација и го олеснува намалувањето на отокот. Лентата  всушност, преку набирање на кожата го зголемува интра клеточниот простор со што ја олеснува лимфната дренажа . т.е , со намалување на тензијата врз поткожните рецептори за болка се редуцира болката и се превенира околното ткиво  од повреди, едеми и крварења.

Како изгледа, како се применува и кои се резултатите од оваа техника Ви прикажуваме од конкретен случај на третман на едем после периферен бајпас на пациент на 70 годишна возраст.

Прикажана е состојба по итна операција Fogarty емболектомија на фем-поплитеално премостување на лев долен екстремитет со директна сутура.  Состојба по феморо-поплитеално премостување лево со васкуларна протеза PTFE 8 mm. Операцијата е спроведена 48 часа после појавата на симптомите на  силно изразена болка пропратена со едем на лева потколеница и невролошки дефицит на лево стопало (спуштено стопало).

Еден ден по третманот

Три дена по третманот

24 часа постоперативно е применета физиотерапија со рана мобилизација  и елевација на лев долен екстремитет. Пациентот се движи со помош на подколен персонален  апарат со ограничување на плантарна флексија. Измерен обем  на потоленица постоперативно 48см . Во постоперативниот период во третманот на едемот вклучен е кинезиотејпинг со “kinesio tex tape“ во комбинација на интерферетни струии, електростимулација и кинезитерапевтски вежби за долни екстремитети. После 10 дневна хоспитализација пациентот е пуштен на амбулантска рехабилитација со евидентно намалување на едемот од 7 сантиметри  и субјективно зголемување на  сензитивноста на левата потоленица. Невролошкиот дефицит понатаму е евидентен.

За вкусните специјалитетите, но и кулинарските вештини на Игор Атанасов-Каспер, готвач во ресторанот “Пулс“ во Специјализираната болница ЖАН МИТРЕВ се повеќе се зборува. Гастрономските вештини тој се почесто ги потврдува не само во емисиите за кулинарство, туку и со учество на домашни и меѓународни гастрономски фестивали. На последниот Балкански гастрономски фестивал “Гулашијада“ што се одржа на 12-13 август во Јасеново, Србија тој со неговиот тим од ГАСТРОМАК доби прва награда. “ Гулашот беше направен по иста рецепта како што го подготувам во кујната на ресторанот “Пулс“. Кромид, јунешко месо, црвен пипер, сол и бибер. Тоа се состојките кои се потребни за ова јадење, а останатото  е вештина“, ни објасни Игор. Разликата во гулашот што го подготвува во ресторанската кујна и на фестивалот е во една состојка. За натпреварот додал и малку ким.

Игор е горд на неговите постигнувања особено што менијата кои се дел од понудата на  ресторанот „Пулс“ излегуваат и надвор од границите. “Убавината на овие фестивали не е само во готвењето и презентирањето на кулинарските вештини, туку и во дружењето, размената на искуства и рецепти за готвење“, дополни тој. Следен предизвик е Интернационалниот гастрономски фестивал кој е планиран за во октомври, годинава во Струмица. Тој додаде дека на овие фестивали може да се запознаат и да разменат искуства со многу познати готвачи, како што е Халим од Босна кој им готви на претседателите во Босна. Покрај медалот и пехарите, Игор донесе и благодарници за д-р Жан Митрев потпишани од словенскиот мастер шеф, како и од швајцарскиот мастер шеф за значајниот придонес на Игор на овие фестивали.

Димитар Ѓоргиев, трикратниот светски шампион и европски вице шампион во кикбоксинг во изминатиов период се подготвуваше интензивно и правеше редовни контроли за последниот туринир Sarajevo Fight Night што се одржа на 10 август, 2017 во Сараево. И овој пат тој се врати со медал. Уште во првата рунда го нокауитираше неговиот противник Зељан Решиќ од Хрватска. “ Не се штедев ниту при подготовките, ниту во борбата. Ова се професионални борби каде има само една борба и немаш втора шанса“, ни` објасни Димитар по враќањето дома. Задоволство од ваквите успеси е поголемо поради атрактивноста на самите борби, кои се профeсионални и со поголема тежина. На овој турнир учествувале борци од повеќе европски земји и од регионот. За Димитар ова е уште еден доказ дека со континуирани и интензивни тренинзи и силна поддршка од најдобрите, успесите се неизбежни.

Станка и Стојан Таневи од Валандово, сопруг и сопруга, родени иста година(1949) и во ист ден им беа направени операции во Специјализираната болница ЖАН МИТРЕВ.  Во консултација со д-р Еневер Идоски  кај Стојан беше договорена васкуларна операција односно реваскуларизација на левата нога, додека кај Станка операција на левата артерија која го снабдува мозокот со крв. На празникот Илинден ги правеа контролните прегледи и сите медицински подготовки пред операција. Разговорот го започнавме со Стојан кој само што заврши со прегледот кај д-р Идоски. “ Јас му верувам многу на д-р Еневер, но и на останатиот персонал во оваа болница. Затоа што во 2016 година кога никој и по една година не можеше да ме крене од кревет, тоа го направија овде. Д-р Енвер Идоски ја утврди причината, и по само две недели хоспитализација успеа да ме крене на нозе. Од тоа што повеќе да кажам“, со благодарност кон докторот зборуваше тој. После тоа одев на редовни контроли во “Филип Втори“ во Струмица, каде и повторно ме упатија да се јавам на преглед кај д-р Идоски за овој здравствен проблем. Знам дека сум во сигурни раце и очекувам се добро да помине со операцијата“, додаде Стојан. Неговата сопруга Станка имала проблеми со рамнотежата и по препорака на Стојан во мај, годинава отишла на преглед во “Филип Втори“ во Струмица. “ Ме упатија да се јавам на дополнителни контроли во Специјализираната болница ЖАН МИТРЕВ. Со Стојан решивме да дојдеме заедно и по прегледите и консултациите докторите одлучија во ист ден да правиме и операции. Верувам во нив и се надевам на успешна операција“, зборуваше Станка. Таа ни рече дека иако е првпат во болницата се чувствува како дома поради љубезноста и посветеноста на персоналот.

Другиот ден, двајцата сопружници веќе беа контактибилни по успешните операции направено од д-р Никола Христов, кардиоваскуларен хирург во болницата. Им посакавме побрзо  закрепнување и секако, да продолжат да ги поминуваат пензионерските денови во здравје и радост со нивните 5 внуки.