Месец: м.г

Вчера, во болницата ЖАН МИТРЕВ беше извршена уште една ретка операција која е специфика за д-р Жан Митрев и неговиот тим. Беше направена автотрансплантација на срце на 64- годишна пациентка на срце која имала терминална валвуларна болест. “Овие пациенти имаат огромно проширување на преткоморите на срцето. Најчесто, пациенти со вакви промени ретко преживуваат бидејќи се случува да им се откачи тромб и да предизвика мозочен или срцев удар. Оваа пациентка е дојдена на време кај нас. Единствено решение за вакви пациенти е автотрансплантација на срце“, изјави д-р Митрев на првата посета на пациентката. На денот после операцијата,  таа е во добра и стабилна состојба, без  компликации.

Автотрансплантација на срце, како процедура ги има истите фази како трансплатанција на срце од друг донор. Разликата е во тоа што кај автотрансплантација на срце се реконструира срцето на пациентот на кого му се прави интревенцијата.

Ова е 4-та  ваква операција на  д-р Жан Митрев од 2000-та година до сега. На пациенти после ваква ретка интервенција им се продолжува животот со години. Последната пациентка со ваква интервенција живееше 13 години после успешната автотрансплантација на срце.

Д-р Жан Митрев и неговиот тим, уште еднаш ја реафирмираа потребата од добивање на дозвола за трансплантација на органи и ткива во болницата ЖАН МИТРЕВ, каде ги има сите потребни услови и кадар за продолжување на живот на многу пациенти од земјата и регионот.

 

На 28 септември, болницата Жан Митрев во соработка со работната група за Периферна артериска болест и тромбоза на Кардиолошкото здружение на Македонија и Здружението на трансфузиолози на Македонија, организираа стручен состанок на тема: „НОАК … нова ера во менаџментот на венски тромбемболии“. На состанокот се презентираа неколку аспекти на оваа тема. За „Дијагностички и терапевтски пристап на венскиот тромбемболизам и искуствата од реалната клиничка пракса“ зборуваше проф. д-р Марјан Бошевски. Д-р Румјана Апостоловска презентираше за „Лимитираноста на конвенционалните терапии за венски тромбемболии“, додека д-р Илија Нешковски од болницата Жан Митрев презентираше за „Менаџмент на белодробни емболии – од протоколи до реална клиничка пракса“.

На крајот се разви дискусија за местото на најновата генерација лекови за третирање на венските тромемболии и се заклучи дека претставуваат скоро идеални лекови за пациенти со венски тромемболии. Состанокот го водеше проф. д-р Мирко Спироски, претседател на Комисијата на наука при Болницата Жан Митрев.

Состанокот се организираше под покровителство на Bayer d.o.o. Љубљана – Претставништво Скопје и е акредитиран од лекарската комора на Македонија.

Пофалбите и изразување на благодарност често „пристигнуваат“ на адресите на докторите од болницата ЖАН МИТРЕВ. Пофалбите од пациенти или нивните фамилии за продолжениот живот, за враќањето на надежта, за моментите кои ги носи животот се упатуваат преку писма, објавуваат на социјални мрежи или им се искажуваат лично… Било до одреден доктор, медицинско лице или тим од болничко одделение…

Таква е и пораката која пристигна на електронската адреса на д-р Жан Митрев од пациентот Бранко Рајко од Умаг, Хрватска. На него, пред една година му беше направена васкуларна операција, аортно-бифеморално премостување, од страна на д-р Жан Митрев.

Postovani Akad. dr. Mitrev

Ne prodje niti jedan dan da se ne sjetim Skopja, Vas, vaseg tima i svih dobrih ljudi koji su nam pomogli kad nam je bilo najteze. Zahvaljujucu Vama zajedno smo docekali veseli dogadjaj diplomiranja nase kceri Ivane.

Srdacan pozdrav iz Umaga,

Branko i Diana

Бранко Рајко дојде во болницата Жан Митрев пред една година откако ги исцрпил сите можности за решевање на болките во коленото и тешкотии во движењето во тамошните клиники. По неколкуте негативни одговори дека кај нив може да се изврши таква сложена операција, по препорака на докторка од клиника во Ријека, закажува преглед кај д-р Митрев. По дијагностицирањето на болеста и потврдниот одговор од докторот дека може да се направи операција во болницата, му се враќа оптимизмот. Операцијата е направена на 18 октомври 2016 година. „Среќен сум и задоволен што ако до пред еден месец не можев да се движам, сега тоа го правам. Благодарност до докторот, но и целокупниот персонал за грижата и негата околу мене. Моето искуство ќе го споделувам со сите мои сонародници, пријатели“, изјави г. Рајко додека беше на постоперативно закрепнување. На првата контрола за која допатува пред 6 месеци доби позитивни резултати. Тогаш ни раскажа дека одлично се чувствува и дека на само една недела после враќањето дома, не само што почнал самостојно да ги извршува секојдневните обврски, туку и без проблеми го возел неговиот автомобил.

Пред неколку дена, на неполна година од успешната интервенција, неговата сопруга која го придружуваше и за време на операцијата и на контролниот преглед испрати благодарност до д-р Митрев кое Ви го пренесуваме во целост.

Достави и фотографија со која сведочи дека продолжениот живот на Бранко Рајко е неизмерен дар за целото семејство.

На последниот состанок на Научниот клуб на болницата ЖАН МИТРЕВ што се одржа на 20 септември, 2017, радиолозите од РТГ одделот заедно со колега д-р Диме Сапунџиев, специјалист по орална хирургија од Заводот за орална хиругија, Вергина, Љубљана, Словенија, дискутираа за радиодијагностичките интервенции и методи кои се применуваат во секојдневната работа, а се најавија и новитети на кои работат радиолозите од нашата болница.

Во своето излагање, гостинот д-р Диме Сапунџиев се осврна на заболувањата на темпоромандибуларниот зглоб. „Најчести заболувања на темпоромандибуларниот зглоб (ТМЗ) се дислокаијските заболувања што се должат на изместување на зглобниот диск пред зглобната глава на долната вилица. Проследени се со болка, што според некои податоци е на прво место по застапеност од страна на неодонтогената болка. Покрај болката присутен е и шум т.н. терминален клик којшто се јавува во крајната фаза на отворање на устата. Во напреднатите фази доаѓа до вклештување на дискот и неможност од отворање на устата. Тоа претставува ургентна состојба, кај којашто треба да се интервенира во првите 24 часа најдоцна до една недела.

Лекувањето на овие заболувања е конзервативно во почетните фази и хируршко во понапреднатите. Од хируршкото лекување најголем успех има артроцентезата на ТМЗ којашто претставува ургентна интервенција при вклештување на дискот на ТМЗ. Со помош на физиолошки раствор којшто се внесува во горно-задниот зглобен простор преку една игла и со помош на втора игла се изнесува од зглобниот простор, при што доаѓа до механичко отстранување на воспалителните продукти, растегнување на зглобната капсула и правилно позиционирање на зглобниот диск“, потенцираше д-р Сапунџиев.

Свои презентации имаа и радиолозите од Радиодијгностичкото одделение од болницата ЖАН МИТРЕВ. Д-р Лидија Вељановска-Кириџиевска го дополни колегата и се осврна на дијагностиката на ова заболување, односно МР прегледи на темпоромандибуларен зглоб која е нова метода и се воведува ексклузивно од болницата ЖАН МИТРЕВ. Д-р Магладена Поповска-Цветковска се осврна на улогата на МР, односно потенцираше за можностите и бенефитите на МР периферна ангиографија (каротиди и периферија) особено кај постоперативни пациенти. Д-р Звонко Атанасов потсети на интервенциите кои се изведуваат под КТ со акцент на ПРТ и биопсии. При тоа потенцираше за значајноста на оваа метода која се применува единствено во нашата болница на ниво во земјата.

Во болницата ЖАН МИТРЕВ успешно беше извршена уште една специфична интервенција на црн дроб. За кратко време се дијагностицираше и реши уште еден специфичен случај кој беше вистински предизвик и за искусниот д-р Јован Мирчевски.

Андреја Дулевски (82), по успешната операција на комплициран ехинокок на црн дроб извршена од абдоминалниот хирург д-р Јован Мирчевски се подготвуваше да замине во родната Битола. Оваа ретка дијагноза беше успешно решена од д-р Мирчевски кој до сега, во неговата богата кариера имал бројни пациенти со црнодробен ехинокок, но ретко со ваков искомплициран случај на ехинок.“

Ова е ретка и специфична интервенција бидејќи се работи за огромна ехинококна циста во десниот лобус на црниот дроб претворена во абсцес на црниот дроб. Се работи за одамна изумрен ехинокок, исполнет со гнојна маса и мртви остатоци од некогашните ехинококни мембрани. Кај пациентот имаше загнојување на огромната ехинококна циста која беше пред перфорација, со последователни компликации по неговиот живот. Цистата можеше да перфорира преку дијафрагмата во десното белодробие со тешки животни компликации“, објасни д-р Мирчевски. Тој дополни дека „се евакуираше околу 2,5 л течна, гнојна маса со распаднати материи од цистата. По евакуацијата на содржината, шуплината се исполни (тампонира) со голем васкуларен резен од омениумот. Постоперативниот тек е уреден и на 4-иот постоперативен ден во добра општа состојба пациентот е отпуштен дома“.

Андреја кој живее на релација Австралија – Македонија искажа голема благодарност најнапред на докторите од Поликлиниката „Филип Втори“ Битола кои го прегледале и упатиле на специјалистички преглед во болницата ЖАН МИТРЕВ.“ Се до пред 3 недели немав никакви проблеми. Од време на време чувствував како нешто да ми скока во стомакот, а потоа почнав и да губам апетит и упорно да кашлам“, започна да раскажува Андреја. Заедно со синот поминале низ неколку ординации во Битола, но никој не им дал точна дијагноза. „По препораката, за кратко време го закажавме прегледот кај д-р Мирчевски. Бидејќи ситуацијата беше ургентна и специфична веднаш бев подготвен и за операција. Среќен сум што се помина во најдобар ред и што се ослободив од тоа чувство дека имам нешто туѓо во мене“, со благодарност зборуваше Андреја. За него, здравјето нема цена и порачува на сите да прават редовни прегледи и контроли за да навремено се откријат здравствени проблеми кои често се без симптоми.

17 години после тешката операција на срце, Ѓеорги Јовановски (74) секое утро пешачи по 20-22 километри. „Тоа е клучот на одржување на моето здравје. И секако, следење на медицинските совети на д-р Тања Анѓушева која веќе 17 години се грижи за мојата здравствената состојба“, вака зборуваше Ѓеорги од Скопје кој беше дојден на редовна контрола во болницата ЖАН МИТРЕВ.

„Пациентот беше примен на 20 јуни, 2001 во животозагрозувачка состојба, со знаци на срцева слабост и изразени промени на коронарните крвни садови. Веднаш беше внесен во операциона сала кога д-р Жан Митрев му вгради 3 бајпаса и пластика на левата комора. Потоа, поради слабост на срцето на пациентот му беше поставена балон пумпа која му овозможи стабилизирање на состојбата“, објасни д-р Анѓушева која постојано била со Ѓеорги во критичните моменти. После успешното закрепнување и до ден денешен таа ја следи и контролира неговата здравствена состојба.

„Се чувствувам како да не сум опериран, витален сум и задоволен од животот. Најголема благодарност за тоа упатувам на д-р Тања Анѓушева. Мојот избор на доктор е одреден уште пред 17 години и не го менувам, презадоволен сум“, дополни тој.

„Дисциплиниран сум во однос на контроли, совети за исхрана и физичка активности и сметам дека тоа е тајната за одржување на здравјето. И после таква тешка и комплицирана операција, секое утро, без исклучок возам велосипед од населбата Влае до Ново Лисиче (20-22 км), а назад се враќам пеш, туркајќи го велосипедот“, објаснуваше со задоволство Ѓеорги. Тој има и други болести кои редовно ги контролира и следи насоките на докторот.

Му посакуваме на Ѓеорги да остане витален уште долги години и континуирано да си го одржува здравјето.

Пред 20 години, д-р Жан Митрев на негова 36 годишна возраст извршил трансплантација на срце и е првиот македонец кој пресади срце во Универзитетската клиника во Франкфурт. По тој повод беше организирана и прес-конференција каде беше прикажана видео-приказна во која беа претставени моментите од периодот кога д-р Митрев работел во Франкфурт, со акцент на трансплантацијата на срце кај пациентот. Успешната приказна за оваа специфична интервенција од пред 20 години за брзо време се прошири и во Македонија. „Жан Митрев-македонски Кристијан Бернард“, „ЖАН – првиот македонец кој пресади срце“, „Македонски хирург пресади срце“… беа само некои од насловите во весниците кога се прошири веста за успешната трансплантација на срце. „Всушност, со овој пациент бележиме и еден раритет дури и за германската медицина. По операцијата што ја извршив со екипа од десетина доктори, шест часа по трансплантацијата, откако утврдивме дека се е во ред, на истиот пациент и во истиот ден е извршена трансплантација на бубрег. Заменети се два клучни органи во истиот ден, што навистина претставува реткост и во Германија“ е дел од изјавата на д-р Митрев, објавена во еден од весниците во тој период. На крај, видео приказната беше заокружена со едно, се уште, отворено прашање: Зошто во болницата ЖАН МИТРЕВ сè уште не е воведена оваа интервенција?

Дека ова е важно прашање кое сè уште претставува предизвик за д-р Жан Митрев и неговиот тим потврдија и новинарите кои побараа одговори од д-р Митрев на оваа тема. Кои се тие административни пречки, каков бенефит ќе имаат пациентите, дали во болницата ЖАН МИТРЕВ има услови за воведување на оваа специфична интервенција?

„Ова е моја долгогодишна желба која се надевам дека ќе ми се реализира. Се работи за административни пречки кои доколку се надминат ќе спасат многу животи и за оваа интервенција не мора да се оди во други земји. Ова е заедничка борба која треба да ја добиеме од надлежните институциите, а за доброто на многу пациенти“, беше пораката на д-р Митрев.

Погледнете ја видео-приказната за 20 години од трансплантација на срце.