Автор: zmc_piksel_dev

Со цел забрзување на процесот на природно лекување на организмот, физиотерапевтите од Специјализирата болница ЖАН МИТРЕВ користат нова техника- Kinesio Taping. Toa e техника на лепење на “Kinesio Tex” ленти чија функција е забрзување на процесот на природно лекување на организмот при што се обезбедува  поддршка и стабилност на мускулите и зглобовите, без нивно ограничување . “Kinesio Tex Tape” е еластична адхезивна лента развиена од јапонскиот киропрактичар д-р Кензо Касе. Toa е хипоалергена, водоотпорна лента направена од памучни влакна со акрилен лепак која може да се користи неколку дена и е безбедна за користење за широка популација, од спортисти до педијатриски пациенти. Kinesio Taping  најчесто се користи:

како потпора на мускулите ( ги подобрува контракции на слабите мускули, го намалува мускулниот замор и грчеви и овозможува поголем обем на движења и ја намалува болката)
при намалување на едеми и хематоми (ја подобрува крвната и лимфна циркулација, ја намалува температурата и зголемува елиминацијата на токсините во мускулно ткиво и со тоа се намалува воспалението и болка во кожата и мускулите)
ги активира внатрешните аналгетични системи (го активира спиналниот и еферентен инхибиторен систем)
при корекција на проблеми со зглобовите (го подобрува односот на зглобните површини кој што е провоциран од спазам или скратување на мускулите, го нормализира мускулниот тонус и пореметувањата на зглобната фасција, го зголемува обемот на движење и ја намалува болката)

Третман на лимфедем

За правилно користење и примена на оваа техника потребна е целосна проценка на пациентот. Оваа проценка треба да вклучува рачно тестирање на мускулите, тестирање на опсегот на движењето, оцена на одењето и слични ортопедски тестови кои што се сметаат за неопходни. Информациите добиени од овие проценки ќе му  овозможат на физиотерапевтот да изготви соодветен протокол за третман. Наодите од клиничката евалуација или проценка ги диктираат спецификите на апликацијата на Kinesio лентата. Со користење на единечни ленти во форма на  “I”  или модификации во облик на “X”, “Y” или слични специјализирани форми, како и насоката и количеството на истегнување на лентата за време на примената, Kinesio Tex лентата може да се примени на стотици различни начини. Во некои случаи, третманот на некоја состојба може да бара и третман на други основни состојби.

Кинезио тејпингот  се темели на концептот на олеснување на мускулните и кожните движења, со цел да се постигне биомеханички, терапевтски ефект врз третираните зони. Лентата со своите микро движења ги стимулира кожните и поткожните рецептори, стимулирајќи го нервниот систем кој го условува мускулниот рефлекс. Освен тоа, лентата со помош на кожната стимулација го редуцира лимфниот и крвниот застој, ја подобрува локалната микроциркулација и го олеснува намалувањето на отокот. Лентата  всушност, преку набирање на кожата го зголемува интра клеточниот простор со што ја олеснува лимфната дренажа . т.е , со намалување на тензијата врз поткожните рецептори за болка се редуцира болката и се превенира околното ткиво  од повреди, едеми и крварења.

Како изгледа, како се применува и кои се резултатите од оваа техника Ви прикажуваме од конкретен случај на третман на едем после периферен бајпас на пациент на 70 годишна возраст.

Прикажана е состојба по итна операција Fogarty емболектомија на фем-поплитеално премостување на лев долен екстремитет со директна сутура.  Состојба по феморо-поплитеално премостување лево со васкуларна протеза PTFE 8 mm. Операцијата е спроведена 48 часа после појавата на симптомите на  силно изразена болка пропратена со едем на лева потколеница и невролошки дефицит на лево стопало (спуштено стопало).

Еден ден по третманот

Три дена по третманот

24 часа постоперативно е применета физиотерапија со рана мобилизација  и елевација на лев долен екстремитет. Пациентот се движи со помош на подколен персонален  апарат со ограничување на плантарна флексија. Измерен обем  на потоленица постоперативно 48см . Во постоперативниот период во третманот на едемот вклучен е кинезиотејпинг со “kinesio tex tape“ во комбинација на интерферетни струии, електростимулација и кинезитерапевтски вежби за долни екстремитети. После 10 дневна хоспитализација пациентот е пуштен на амбулантска рехабилитација со евидентно намалување на едемот од 7 сантиметри  и субјективно зголемување на  сензитивноста на левата потоленица. Невролошкиот дефицит понатаму е евидентен.

За вкусните специјалитетите, но и кулинарските вештини на Игор Атанасов-Каспер, готвач во ресторанот “Пулс“ во Специјализираната болница ЖАН МИТРЕВ се повеќе се зборува. Гастрономските вештини тој се почесто ги потврдува не само во емисиите за кулинарство, туку и со учество на домашни и меѓународни гастрономски фестивали. На последниот Балкански гастрономски фестивал “Гулашијада“ што се одржа на 12-13 август во Јасеново, Србија тој со неговиот тим од ГАСТРОМАК доби прва награда. “ Гулашот беше направен по иста рецепта како што го подготувам во кујната на ресторанот “Пулс“. Кромид, јунешко месо, црвен пипер, сол и бибер. Тоа се состојките кои се потребни за ова јадење, а останатото  е вештина“, ни објасни Игор. Разликата во гулашот што го подготвува во ресторанската кујна и на фестивалот е во една состојка. За натпреварот додал и малку ким.

Игор е горд на неговите постигнувања особено што менијата кои се дел од понудата на  ресторанот „Пулс“ излегуваат и надвор од границите. “Убавината на овие фестивали не е само во готвењето и презентирањето на кулинарските вештини, туку и во дружењето, размената на искуства и рецепти за готвење“, дополни тој. Следен предизвик е Интернационалниот гастрономски фестивал кој е планиран за во октомври, годинава во Струмица. Тој додаде дека на овие фестивали може да се запознаат и да разменат искуства со многу познати готвачи, како што е Халим од Босна кој им готви на претседателите во Босна. Покрај медалот и пехарите, Игор донесе и благодарници за д-р Жан Митрев потпишани од словенскиот мастер шеф, како и од швајцарскиот мастер шеф за значајниот придонес на Игор на овие фестивали.

Димитар Ѓоргиев, трикратниот светски шампион и европски вице шампион во кикбоксинг во изминатиов период се подготвуваше интензивно и правеше редовни контроли за последниот туринир Sarajevo Fight Night што се одржа на 10 август, 2017 во Сараево. И овој пат тој се врати со медал. Уште во првата рунда го нокауитираше неговиот противник Зељан Решиќ од Хрватска. “ Не се штедев ниту при подготовките, ниту во борбата. Ова се професионални борби каде има само една борба и немаш втора шанса“, ни` објасни Димитар по враќањето дома. Задоволство од ваквите успеси е поголемо поради атрактивноста на самите борби, кои се профeсионални и со поголема тежина. На овој турнир учествувале борци од повеќе европски земји и од регионот. За Димитар ова е уште еден доказ дека со континуирани и интензивни тренинзи и силна поддршка од најдобрите, успесите се неизбежни.

Станка и Стојан Таневи од Валандово, сопруг и сопруга, родени иста година(1949) и во ист ден им беа направени операции во Специјализираната болница ЖАН МИТРЕВ.  Во консултација со д-р Еневер Идоски  кај Стојан беше договорена васкуларна операција односно реваскуларизација на левата нога, додека кај Станка операција на левата артерија која го снабдува мозокот со крв. На празникот Илинден ги правеа контролните прегледи и сите медицински подготовки пред операција. Разговорот го започнавме со Стојан кој само што заврши со прегледот кај д-р Идоски. “ Јас му верувам многу на д-р Еневер, но и на останатиот персонал во оваа болница. Затоа што во 2016 година кога никој и по една година не можеше да ме крене од кревет, тоа го направија овде. Д-р Енвер Идоски ја утврди причината, и по само две недели хоспитализација успеа да ме крене на нозе. Од тоа што повеќе да кажам“, со благодарност кон докторот зборуваше тој. После тоа одев на редовни контроли во “Филип Втори“ во Струмица, каде и повторно ме упатија да се јавам на преглед кај д-р Идоски за овој здравствен проблем. Знам дека сум во сигурни раце и очекувам се добро да помине со операцијата“, додаде Стојан. Неговата сопруга Станка имала проблеми со рамнотежата и по препорака на Стојан во мај, годинава отишла на преглед во “Филип Втори“ во Струмица. “ Ме упатија да се јавам на дополнителни контроли во Специјализираната болница ЖАН МИТРЕВ. Со Стојан решивме да дојдеме заедно и по прегледите и консултациите докторите одлучија во ист ден да правиме и операции. Верувам во нив и се надевам на успешна операција“, зборуваше Станка. Таа ни рече дека иако е првпат во болницата се чувствува како дома поради љубезноста и посветеноста на персоналот.

Другиот ден, двајцата сопружници веќе беа контактибилни по успешните операции направено од д-р Никола Христов, кардиоваскуларен хирург во болницата. Им посакавме побрзо  закрепнување и секако, да продолжат да ги поминуваат пензионерските денови во здравје и радост со нивните 5 внуки.

Жан Митрев клиниката заедно со својот партнер за соработка во областа на персонализирана медицина и генетика, Био Инженеринг ДОО денеска беше домаќин на високи претставници од Светска банка и Фондот за иновации и технолошки развој на Република Македонија.

Био Инженеринг Доо беше добитник на престижен грант за иновативност и развој во 2016 години за проектот “Granulis” oд страна на Фондот за иновации и технолошки развој подржан од Светска банка. Како резултат на тој проект во просториите на Био Инженеринг беше отворен центарот за “Применета микробиологија и биотехнологија д-р Кунгуловски”, а додека пак во соработка со Жан Митрев клиниката, беше отворена Лабораторијата за генетика и персонализирана медицина во самата болница.

На состанокот се разговараше за тековната соработка отелотворена во Лабораторијата за генетика и персонализирана медицина и нејзините успеси, но и за идните научно-истражувачки и медицински аспирации на Био Инженеринг и Жан Митрев клиниката. Исто така се разгледуваше просторот за соработка со Светска банка и Фондот за иновации и за проширување на пристапот на персонализирана медицина во остатокот од Балканот и Европа.

Димитар Ѓоргиев, трикратниот светски шампион и европски вице шампион, еден од спортистите кој добива долгогодишна поддршка од Специјализираната болница Жан Митрев во континуитет реди успеси. Покрај успешните настапи на државните првенства, на 6-7 мај, годинава, на  Меѓународен турнир во Тешањ, Босна беше прогласен за најдобар борец сениор, а се врати и со три победи. Потоа, во месец јуни настапи на Меѓународен турнир во Римини Италија, каде го победи рускиот репрезентативец, репрезентативецот од Унгарија, а поради загубената борба од италијанскиот репрезентативец, Димитар освои сребрен медал. “После освоените резултатите добив понуда да настапам на К1 турнирот во Сараево кој е еден од најсилните на овие простори и на кој ќе настапат искусни борци од 9 земји. Се подготвувам интензивно и очекувам високо место“, дополни Димитар

Колаче со свеќичка за нејзиниот 90-ти роденден беше изненадување за Виолета Неделковска која лежеше на одделението на полуинтезивна нега во болницата. Возбуда и среќа се забележуваше на нејзиното лице. Беше пресреќна дека се сетиле за нејзиниот роденден, дека грижата од персоналот ја потврдиле и на овој начин. “Колачето е прекрасно, и на изглед и на вкус. Благодарам за вниманието, за желбите. Посакувам сите луѓе да дочекаат да прославуваат 90-ти роденден и повеќе “, смирено, тивко и сладејќи се со колачето зборуваше Виолета. Таа е втора недела овде, на нега и закрепнување. Инаку, Виолета е наш долгогодишен пациент која пред 8 години правела операција на срце. Искажа благодарност за стручноста, грижата и негата која ја добивала низ годините, дека  довербата која ја има таа и нејизната фамилија кон нашата установа е голема. Ние и посакуваме уште многу внуци и паравнуци, да ја држи ведрината уште многу години…

Најтрофејната кик боксерка од клубот “Гладијатор“ од Штип, Јована Арсова интензивно се подготвува за Европското првенство во кикбоксинг кое е планирано да се одржи во септeмври, 2017 во Скопје. Пред две недели се врати со нов медал, освено трето место на Светскиот куп во кикбоксинг што се одржа во Римини, Италија каде учествувале 1803 натпреварувачи од 39 држави, од кои 11 натпреварувачи од Македонија. “ Имав 11 противнички од различни земји каде успеав да го освојам 3-то место. Спецификата е што иако сум јуниор се борев со сениори и успеав да го добијам 3-то место“, со задоволство зборуваше Јована. Додаде дека желбата за победа во комбинација со добрата подготовеност и напорните тренери ја воделе низ борбите. “Ова е еден од потешките турнири на кои сум настапувала.

После овој голем турнир мојата самодоверба е поголема, чувствувам дека сега можам уште многу повеќе“, додаде таа. Вака подготвена и со секојдневни интензивни тренинзи во следните 40 дена таа останува на истата патека. “ Подготовките се секојдневни, вежбаме по неколку часа, трчање по ридско-планиски предел, пливање по 1.000 метри ,со што би можеле да ја покажеме нашата подготвеност за вакви натпревари. Треба да ја оправдаме довербата која ја добиваме од нашиот најверен долгогодишен поддржувач, д-р Жан Митрев. Тоа е дополнителен стимул да се покажеме во најдобро светло на ова првенство кое за прв пат  се одржува во Македонија“, објасни Јована.Додаде дека има една желба- “ Да ја направам горда Македонија, а посебно д-р ЖанМитрев кој ни ги овозможи условите за секојдневни тренизни во сала, и секако мојот тим кој е верна поддршка составен од Ристо Огнанов, Кирил Нацев, Шенол Асанов и Бранко Петровски, како и сите мои клубски другари.“  Новите победи се нејзин придружник! Среќно, Јована!