Автор: zmc_piksel_dev

Битката со болеста ревматoиден артритис С.В. ја води од нејзината десетгодишна возраст, а семејство ѝ е најверната потпора во изминатите 22 години. Во потрагата по решение за нејзината болест наидувала на многу препреки, се соочувала со тешки моменти, некогаш погрешни чекори во дијагностиката или несоодветна терапија, затворен однос доктор-пациент, а болеста прогресила… “На кратки патеки болеста ќе се стабилизираше, но погрешната дијагноза поставена на десетгодишна возраст и терапијата која и го ослабна имунолошкиот систем си го направи своето“, почна да раскажува нејзината мајка Васка. Болница по болница, од доктор до доктор, од Штип до Скопје, немало подобрување… Се додека на инсистирање на мајката не направиле уште едно испитување на Клиниката за детски болести во Скопје. Тогаш и поставиле вистинска дијагноза за јувенилен ревматoиден артритис. Но, претходната терапија си го направила своето и имала големо влијание врз ослабнување на имунитетот. Десет години скитања по болниците, една по друга терапија, зглобот на коленото почнал да ослабува и операција била неизбежна. Првата операција на С. В. ѝ ја направиле во Клиниката за ортопедија во Скопје. Иако операцијата била успешна, раната тешко заздравувала, па морале да продолжат да прават редовни преврски во родниот град. После неколку месеци раната зараснала, но болеста продолжила да ја разнишува стабилноста и на другите зглобови и коски. “Моето дете целосно ја изгуби вербата во докторите. Така живееше 7,8 години, со помали или никакви подобрувања од првата операција. Тогаш дознавме дека и во болницата кај д-р Жан Митрев се прават ортопедски операции. Со првиот преглед кај ќерка ми од страна на ортопедот и првата успешна операција на колк, кај нејзе се врати вербата за живот. Тоа за нас беше голем импулс иако беше големо финансиско преоптоварување и бараше големи жртви… Но, радоста и подобрувањето на здравјето кај моето дете е највредно, неспоредливо со било кои материјални издатоци кои ги имаме за операции, терапии, преврски итн. Таа болницата ја доживува како свој втор дом, сите ги чувствува како дел од едно големо семејство, кои се премногу љубезни и блиски со неа“…

Од тогаш до денес, на С. В. ѝ се направени уште 5 операции од страна на д-р Сашо Младеновски. Васка ја потенцираше стручноста, но и исклучително пријателскиот однос и посветеноста на докторот“. Д-р Младеновски е секогаш достапен за нас, има прекрасен однос кон својата пациентка, што многу значи. Но, болеста е толку лоша што и покрај успешните операции, сепак коските не може долго да ги држат протезите и беше препорачно да се направи нова операција. Овде, сакам да ја потенцирам хуманоста на д-р Жан Митрев за неодамна направената последна операција на скочен зглоб. Се помина во добар ред, a докторите споменале и за озон терапија, која доколку даде позитивни резултати ние би биле најсреќните луѓе на светот. Неизмерно сум благодарна на д-р Жан Митрев, кој согласно можностите секогаш ни излегувал во пресрет. Тој е посебен човек, не само поради стручноста, туку и воопшто, кај него има голема човечност што е реткост во денешно време“, емотивно дополни Васка…

Дологодишната соработка на СОУ “ Димитар Влахов“ од Струмица со болницата продолжи и годинава со денешната посета на учениците од втора година, здравствена струка.   Над триесетеина ученици и нивните професорки ги пречека главната сестра Александра Темелковска и организирани во групи тргнаа во обиколка по болницата.

Професорката Емилија Котеска, која е од самиот почеток вклучена во програма, кога учениците организирано ја посетуваат болницата, вели дека секоја година има нешто ново, посебно што се прави овде. “Но, она што посебно ме фасцинира е континуираниот квалитет и професионализмот, од самиот почеток до ден денес. Тоа е за почит“, изјави таа. “Со овие посети учениците имаат можност да направат разлика во работа во државна и приватна болница. Исто така, имаме долгогодишна соработка  со изведување на  практична настава на нашите ученици во Поликлиниката во Струмица“, додаде таа и го оцени како вредно искуство за нивните ученици.

Ова им е осма година по ред како ученици од ова училиште доаѓаат да се запознаат со новитетите во болницата, а денес дознаа повеќе за дијагностичките процедури, како фунцинира и е организирано секое одделение, слушнаа за новитетите кои доаѓаат од генетската лабораторија, добија информации и за новите методи и софистицирана опрема и условите во кои се работи во болницата.

Пред заминување ги прашавме со која оценка би не оцениле? “5-ка за условите, за професионалноста, софистицираната опрема, љубезниот и посветен однос на персоналот кон пациенти, но и други лица, дијагностичките методи, но и хигиента и континуираниот квалитет во испораката на услугите“… За крај порачаа дека, по завршување на образованието би сакале да работат овде, да учат од професионалци, да се грижат за здравјето на луѓето токму во ваква современа болница!

Четири месеци после заминувањето дома, Бранко Рајко од Умаг, Хрватска допатува во Македонија за да го направи првиот контролен преглед по неодамнешната васкуларна операција во Жан Митрев Клиниката. Не можеше да ја прикрие возбудата од средбата со д-р Жан Митрев и нетрпеливо чекореше пред неговиот кабинет, држејќи ги резултатите со себе. Сакаше да сподели со д-р Митрев за неговото позитивно искуство, по успешната операција. Да му раскаже дека ако до пред пет месеци бил со сомнежи за неговиот живот, сега тој е жив и среќен што се се враќа во нормала. Неговата сопруга која го придружуваше, преку разговорот со нас се обидуваше да го анимира и да ја амортизира неговата трема. „Д-р Жан Митрев е спасителот на Бранко. Благодарение на него, на неговата исклучителна стручност тој е жив и нормално ги извршува секојдневните обврски. За нашата приказна многу слушнале и прочитале, така што ни се јавуваат сограѓани за да им дадеме контакт од болницата. Тоа е најмалку што можеме да направиме за некој кој бара помош и му треба вистинска информација за потенцијално решение на неговиот здравствен проблем“, зборуваше таа.

На само една недела после враќањето дома, како што ни раскажа Бранко, веќе без проблеми го возел автомобилот и самостојно ги извршувал секојдневните обрвски. Додека ни објаснуваше за искуствата кои ги имал по враќањето дома, на врата се појави д-р Митрев и природно фокусот на интерес веднаш беше пренасочен кон свежиот изглед на Бранко, кон неговата здравствена состојба… Ги оставивме да разговараат за начинот на одржување на здравјето, следни чекори, совети..

“Лабораторијата за генетика и персонализирана медицина, за само три месеци постави цврсти темели за развој на македонската генетика. Со ова истражување, каде што направивме анализа на цели геноми, предвремено утврдиме ризик од одредени заболувања кај овие лица. Уште пред да се појават симптоми за одредени болести се утврди потенцијалниот ризик од развивање на рак, дијабетес, срцеви заболувања и др. Исто така, утврден е и нивниот одговор на стрес, одредени лекови, исхрана.. “. Ова денес го изјави д-р Горан Кунгуловски и на конференцијата пред новинарите, на која обраќање имаше и д-р Иван Кунгуловски проф. д-р Мирко Спироски. Тие објаснија за значењето на проектот кој беше посветен на  секвенционирање на неколку човечки геноми и десетици човечки егзоми (дел од геномот кој кодира за протеини), нешто што е за прв пат направено во регионот.

“Иако ова е едно од најголемите достигнувања на македонската наука, ние не застануваме тука.  Нашата интенција е во наредниве неколку години да започнеме проекти што ќе се викаат “1000 македонски геноми” и “Геном за секое новородено бебе” со што персонализираната медицина ќе се демократизира и ќе стане достапна за сите“, објасни д-р  Горан Кунгуловски.                                                                                                                                               Секвенционирањето на првиот човечки геном во 2003 година е едно од најголемите достигнувања на цивилизацијата. Проектот за човечкиот геном (Human Genome Project) започнал во 1990 година, траел 13 години, и изнесувал 2.7 милијарди долари, во кој биле вклучени стотици научници од различни институти и приватни компании. Со развојот на нови и напредни технологии за ДНК секвенционирање, брзината и цената на овие анализи се драстично намалени, а истовремено прецизноста е за многу пати зголемена. Секвенционирањето на целосни геноми и егзоми е првиот чекор кон еден нов пристап во медицината, што се вика персонализирана медицина. За разлика од стандардната медицина којашто е реактивна, овој пристап е проактивен, односно однапред се откриваат потенцијалните ризици за развивање на болести како рак и срцеви заболувања и слично, уште пред да се појават нивните први симптоми. Исто така однапред се утврдува и нашиот личен одговор на одредени лекови лекови, најсоодветната исхрана и слично.

“Кога се работи за здравје, кај мене не постојат алтернативи во избор на доктори… Здравјето е примарно, а во изминативе  неколку години, во болницата кај д-р Жан Митрев сум имала само позитивни искуства. За моја среќа, тоа се потврди и овој пат“. Драгица Митковски од Скопје (67), го истакна нејзиното задоволство од успешната операција на матка и јајници, од страна на искусниот гинеколошки тим од  проф. д-р Васил Илиев и д-р Ирена Андонова.

Со текот на времето, Драгица почнале да ја мачат гинеколошки проблеми. Искуството со другите клиники во однос на недоволна грижа при интервенции, долг период на чекање и неизвесност при лекувањето, и овој пат ја упатиле кон професионалците од тимот на д-р Митрев. Нејзиниот проблем со матката беше решен само за 5 дена. Ниту во еден момент немала сомнежи дека се ќе помине во ред, пред се поради сигурноста која ја имаат докторите, а индиректно ја пренесуваат на пациентите.

На четвртиот ден од операцијата, Драгица чекаше да помине редовната визита од медицинскиот тим и беше во исчекување на информации за нејзината состојба… Се вративме во нејзината соба по визитата, а загриженоста на лицето која ја имаше претходно беше заменета со насмевка… “ Се подготвувам за заминување дома. Се е во ред, ми потврдија докторите. Сега сум смирена и среќна“, изјави Драгица.

Пред заминување дома, Драгица не штедеше пофалби за д-р Жан Митрев, за проф. д-р Васил Илиев и д-р Ирена Андонова, како и за другиот медицински и немедицински кадар. Нејзината порака е: Негувајте ја пожртвуваноста и професионалноста кон пациентите, ние тоа го цениме и препознаваме…

Работата е значаен сегмент од нашето живеење и на која одвојуваме минимум една третина од нашето деноноќие. Познато е дека современиот работник е прекинат во просек 7 пати во текот на еден час и е дефокусиран околу 2.1 час во текот на еден ден. Статистиката покажува дека 4 од 10 вработени кои работат за големи компании искусуваат големи корпоративни реструктурирања и заради тоа се соочуваат со несигурност во однос на нивната иднина. Токму ова е причината зошто голем дел од вработените лица имаат потешкотија да заспијат навечер. Товарот од изминатиот ден… Чувството на преплавеност и прекумерна зафатеност им го нарушува сонот…

Организациските психолози, консултанти и психотерапевти со години се обидуваат да изнајдат начини и применат методи за ефикасно и ефективно работење, а при тоа, вработениот да ја сочува енергијата до крајот од денот. Вложените напори за тоа како да останете смирени и покрај големите барања на работното место резултираат во следните препораки:

Делување наместо реагирање (Акција vs. Реакција) – во моментите кога чувствувате како да немате контрола над ситуацијата, тогаш доживувате и стрес. Затоа, неопходно е да ги идентификувате ситуациите кои можете да ги контролирате од оние кои не можете. При тоа, да бидете свесни дека имате контрола над Вашите активности и реакции, но не и врз макро силите или однесувањето на другите.
Вдишете длабоко – Доколку се чувствувате преплавено или излегувате изморено од некој тензичен состанок, потребно Ви е  да си ја разбистрите главата. Својот баланс може да го воспоставите повторно со пет минутно длабоко дишење, што воедно Ви помага и да се “втемелите” (термин кој во гешталт терминологија значи да се вратите во сегашноста и да се смирите).
Елиминирајте ги прекинувањата –  Електронски пораки, телефонски повици, “упади“ во канцеларија, неочекувани пораки и изненадни крајни рокови се само дел од нештата кои Ве прекинуваат во работата. Во вакви случаи, експертите препорачуваат да делувате на еден од следните три начини: да го прифатите прекинувањето, да го прекинете соговорникот или пак да ја процените важноста од прекинувањето и соодветно на тоа да го реорганизирате планот за работа.

Организирајте го својот ден оставајќи простор за енергија и фокус – повеќето од нас, во работата го применуваат пристапот на “туркање”, сметајќи  дека доколку работат цели 8 до 10 часа, ќе сработат многу повеќе. Ефектот е спротивен – продуктивноста се намалува, стресот се зголемува, а останува помалку енергија за социјален и приватен живот. Затоа е неопходно да направите неколку паузи во текот на денот, да се истегнете и направите вежби за дишење.
Јадете правилно и спијте доволно – нездравото консумирање на храна и депривацијата од сон го зголемуваат степенот на стрес кој телото го процесуира. Затоа, наспијте се, а својот организам  негувајте го со вкусни и здрави оброци.
Променете ја својата приказна – нашата перспектива за стресните настани на работното место е субјективна интерпретација на фактите, најчесто видени низ филтерот на нашиот сомнеж. Затоа, значајно е да направите чекор наназад и да пробате да ги видите нештата од пообјективен аспект. На тој начин ќе бидете многу поефективни , а работите помалку ќе ги доживувате лично.
Смирете се брзо – кога се чувствуваме фрустрирано или луто, чувството на напнатост води и кон реагирање на нештата. Наместо веднаш да реагирате, потребно е смирено да вдишувате на уста и метафорички да го редуцирате степенот на оваа “жештина”.
Идентификувајте го стресот кој сами си го наметнувате – значајно е да научите како да го контролирате и минимизирате стресот кој, најчесто самите си го наметнувате. Фокусирајте се на Вашата самодоверба наместо да барате одобрување од другите. Концентрирајќи се на тоа како другите Ве перципираат делува контрапродуктивно при ефикасното извршување на Вашата работа бидејќи не можете соодветно да реагирате на работите.
Поставување на приоритети – значајно е да поставувате приоритети така што ќе ја препознаете и разберете Вашата улога во организацијата, во стратешките приоритети на организацијата и во Вашите лични цели и капацитети.
Имајте влијание кај другите – иако самите сме одговорни за своето однесување и изглед, сепак секојдневно се соочуваме и со стресното однесување на нашите колеги. Од тие причини значајно е да се соочите со проблематичниот колега или вработен. При тоа, на смирен начин и со почит, истакнете го неговото однесување, опишувајќи го влијанието кое го има врз тимот и колегите и учтиво побарајте да се промени.
Бидете својот најдобар мотиватор – наместо да бидете строги и критички настроени кон себе, неопходно е да се мотивирате преку охрабрувачките мисли кои ќе Ве поттикнат да постигнете подобри резултати, а со тоа ќе бидете инспирација и за дртугите.

И не заборавајте, работното место е нашиот втор дом и место на кое поминуваме значаен дел од нашето секојдневие. Вреди да уживаме работејќи!

Со ребрендирањето на Специјалната болница “Филип Втори“ во  “Жан Митрев Клиника“ се поврзува уште еден новитет, а тоа е отпочнување со функционирање на Центарот за едукација на средно медицински персонал.

На 06 март, 2017 година и официјално ќе отпочне со работа Центарот за едукација, кој ќе функционира во рамките на болницата. Со тоа ќе се реализира  уште една иницијатива  која треба да придонесе за теоретски и практично воведување во работата на средно медицинскиот персонал кој ќе работи во болницата, но и на вработените на овие позиции, кои треба да ги потврдат и унапредат своите знаења и вештини. Основната цел на овој центар е структуирано, целно едуцирање на лицата кои ќе се пријават на конкурс за едукација, заради лична едукација или вработување во болницата. Програмата за обука опфаќа основно и напредно ниво на обуки.

Наскоро ќе биде објавен Конкурс со критеруми за пријавување на сите заинтересирани медицински сестри за обука и вработување. “Обуката ќе биде тримесечна, по однапред развиен курикулум за tailor-made training или т.н. скроена обука. Тоа подразбира посетување на обука од кандидатот која се состои од теоретски и практичен дел, пет дена во неделата. Предавањето е предвидено да трае од 3 до 4 часа, а потоа канидадатот ќе треба да посетува пракса во траење од 4 часа. На крајот од денот, наученото ќе биде проверувано од страна на менторот, номиниран за секој од кандидатите, пред почетокот на обуката. По тримесечната едукација, секој кандидат ќе полага испит, пред комисија за сертификација, и секој што успешно ќе помине на истата ќе добие сертификат за завршена едукација (каде ќе бидат наведени сите вештини кои би можеле да ги извршуваат лицата кои ќе поминат на оваа едукација). Сите кои ќе покажат одлични резултати, а по препорака на комисијата ќе имаат можност да се вработат во болницата.

Овој конкурс е отворен и за сите заинтересирани лица од други институции или невработени млади со завршено средно медицинско образование кои сакаат да го надоградат своето знаење, да поминат пракса во болницата. За тие лица, кои дополнително ќе се пријават, услугата ќе треба да биде платена.  „Тоа подразбира дека во нашиот центар ќе може да се пријават на тримесечната обука повеќе лица отколку што е планирано за вработување во болницата. Тоа секако, ќе биде детално објаснето во конкурсот кој ќе биде објавен пред секоја обука“.

Во текот на процесот на едукација, учесниците ќе добијат и прирачник за работа, составен од сите предавања кои ќе бидат одржани.

Овој центар е со финансиска  поддршка од д-р Жан Митрев кој континуирано е фокусиран на воведување на нови стандарди во работењето, постојаност во јакнење на капацитетите на вработените, а еден од начините за тоа е и овој едукативен модел. Со овој новитет, кој е единствен во клиниките и болниците во Р.Македонија, ќе се придонесе за унапредување на знаењето и на вработенитете од редот на средно медицински персонал во болницата, а во насока на континуирано јакнење на  нивните капацитети и следење на современите трендови во работата.

Со интерактивна работилница насловена како Генетика, нутриционизам и здрав начин на живот, годинава беше започната Неделата за борба против срцево садови заболувања. Тимот на “Филип Втори“, како и секоја година, беше активен чинител, и на 20.02.2017, во конференциската сала во болницата, пред волонтерите од Клубот на млади на Црвениот Крст на Град Скопје, претставници од нив зборуваа на оваа тема. Вера Кировска, нутриционист во болницата стави акцент за тајните на здравата исхрана и водење на здрав живот кои се од голема важност за младите. “Најважно е да се работи на развивање на нашата самосвест и вежбање на самоконтролата, а останатите работи сами по себе ќе се наредат, вклучувајќи ја и правилната исхрана. Кога зборуваме од аспект на храната, не постои здрава или нездрава храна, што смееме или не смееме да консумираме. Сè може да се јаде, повеќе или помалку. Треба само да го слушаме телото кое веднаш нѝ испраќа сигнали доколку консумираме нешто што му пречи на организмот. Затоа тука е најважна самоконтролата“, потенцираше таа. Горан Кунгуловски, доктор на науки по геномика и епигеномика, од Лабораторијата за генетика зборуваше на тема персонализирана генетика и кардиоваскуларни болести. Зборуваше за значењето од однапред скроена медицина или персонализирана медицина или медицинска нега базирана на индивидуата. Овој пристап е важен за:

Максимизирање на ефикасност на третмани, минимизирање на несакани дејства
Профилакса за болести (третман на болеста пред да се појават симптомите)
Прекинување на бесполезни третмани

Илија Дојчиновски, здравствен психолог зборуваше на темата воведување на здрави навики за здрав живот каде се осврна на важноста од редовна физичка активност, балансирана исхрана со овошје и зеленчук, социјализација, но и одвојување на време за себе, за читање. Секако важно е одржување на цврста врска со семјството, искажување на чувства кон најблиските, но и откажување од штетните навики(пушење), како и контролирање на ризик факторите кои водат кон стрес, беа некои од поентите на Дојчиновски. Активностите со волонтерите од Црвенио крст на Град Скопје продолжија со бесплатни прегледи на 10 деца од згрижувачки семејства и посета на тројца оперирани пациенти. При посетата, психологот од болницата и волонтерите разговараа со нив за процесот на опоравување, за промените во семејнтата динамика кои ги носи оперативниот зафат како и со членовите на семејството кои се особено важен агенс на поддршка во фазата на домашна рехабилитација. „Беше предизвик да се разговара со луѓе кои со својата решителност и храброст поминале крупни оперативни зафати и повторно се враќаат во секојдневно милје со своите улоги во семејството. Им благодариме за гостопримството и им посакуваме многу години здрав живот“, изјавија по посетата. И волонтерите од Црвениот крст на општина Центар се приклучија на активностите. Активноста се реализираше на падините на Водно, поточно на пешачката патека од подножјето до врвот на Водно.

Рекреативната дружба со цел да се испромовира здравиот начин на живот, беше искористена на случајните минувачи кои решиле своето слободно време да го поминат на планински воздух да им се дели печатениот пропаганден материјал подготвен од страна на стручни лица од болницата. Младите беа посветени на целта за материјалите да завршат во рацете на лица кои се одлучиле на Водно да дојдат со своите автомобили или да ја искористат жичарницата, при што им се потенцираше потребата на организмот од рекреативни прошетки кои позитивно влијаат на човековото здравје, особено на кардиоваскуларниот систем. Советите од волонтерите беа одлично прифатени од страна на скопјани, а сето тоа во насока на подигнување на свеста за здравиот начин на живот.