Имајќи во предвид дека деновиве во медиумите се објавени невистинити и наведувачки информации поврзани со работата на Клиничката болница Жан Митрев и Академик д-р Жан Митрев би сакале да ја известиме целокупната јавност, медиумите и нашите пациенти за следното: Клиничката болница Жан Митрев успешно работи за добробит на граѓаните веќе 22 години, нудејќи им услуги сертифицирани по светски стандарди, професионална грижa во насока на подобрување на здравјето, што е докажано во безброј успешни случаи. Ваквиот пристап продолжи да се применува и во текот на светската пандемија предизвикана од страна на вирусот КОВИД-19, во кој период клиниката со многу труд, волја и неизмерно себевложување од своите вработени придонесе за спасување на огромен број човечки животи.
Навистина сме згрозени од тенденциозниот говор на омраза употребен кон нашата институција, како и од неточните наводи, односно од фабрикуваните информации кои единствено се насочени кон креирање на лажна слика во пошироката јавност за работата на Клиничката болница Жан Митрев. Очигледно е дека овие лажни информации се креирани со намера за целосно искривување на фактите кои се однесуваат на долгогодишната успешна работа на Клиничката болница Жан Митрев, каде што работат повеќе од 400 стручни и професионални лица под раководство на д-р Жан Митрев.
Изнесените невистинити квалификации пласирани низ одредени медиуми деновиве се насочени кон намерно нарушување на честа и угледот на Клиничката болница и воопшто не кореспондираат со вистината. Истите се вознемирувачки и за нашите пациенти, целиот наш тим и нивните блиски кои посветено и чесно работат сите овие години. Ние како институција практикуваме исклучиво медицина базирана на докази. Од самиот почеток, но и во иднина ние бевме и ќе останеме професионални во вршењето на својата деловна активност и ќе продолжиме грижливо и стручно да им помагаме на нашите пациенти за целосно подобрување на нивното здравје.
Нашите следни чекори ќе бидат во насока на искористување на сите правни можности согласно законите, а со цел да се спречат овие и сите следни вакви и слични неосновани напади на нашата институција.
И летово децата со своите родителите во периодот од 1 до 7 јули уживаа во летниот камп ,,Моето срце во сите бои,,. Кампот е организиран традиционално од нашиот тим психолози: лиценциран психотерапевт и Доц. д-р Кристина Егуменовска, лиценциран психолог и специјализант по психотерапија Александра Петроски и лиценциран психолог, специјализант по психотерапија и практичар по невро-лингвистичко програмирање Марија Аџиоска, во соработка со Клубот на Млади на Црвен Крст на град Скопје.
Активностите беа бројни и опфаќаа: утрински физио часови, работилници и игри, со цел децата, но и нивните родители да знаат и искусат дека нивниот физички, емотивен и социјален развој ни е важен и по напуштањето на болницата.
Свој придонес за успешна реализација на овој камп камп дадоа: д-р Иван Милев-специјалист по педијатрија субспецијалист кардиолог, д-р Ѓорѓи Филев-специјалист педијатар-неонатолог, сестра Весна Милев и Блаже Арсов дипломиран физиотерапевт, специјалист за рехабилитација при травматологија, ортопедија и хирургија. Беа доделени и пригоди подароци од брендот Ортомол од страна на Николина Мишева претставник од Фила-Фарм.
Кампот немаше да се реализира без големата поддршка на д-р Митрев, кој заедно со Црвениот Крст овозможува сиве овие години бесплатно сместување за дечињата и родителите. Погледнете дел од неповторливата атмосфера ❤
Светската пандемија на Ковид-19 донесе низа здравствени проблеми, што го менуваат животот на прележаните пациенти. Вирусот покажа дека може да го погоди секој систем во телото, вклучувајќи ги респираторниот, кардиоваскуларниот, гастроинтестиналниот, невролошкиот, мускулно-скелетниот, бубрежниот, дерматолошкиот, ОРЛ и хематолошкиот, може да влијае на менталното здравје, да донесе расеаност, хроничен замор и болки. Со проф. д-р Милка Клинчева од клиничката болница „Жан Митрев“ поразговаравме за постоковидниот период и компликациите што може да ги донесе вирусот.
Пандемијата со Ковид-19 донесе низа здравствени проблеми, како резултат на постковидната состојба, што се манифестираат на најразличен начин. Кои се најчестите компликации со кои се соочуваат пациентите кои прележале инфекција со вирусот Ковид-19?
Постковид-синдромот се дефинира како „присуство на знаци и симптоми, кои се јавуваат во текот и по прележување инфекција со Ковид-19 и продолжуваат 12 недели (три месеци), а притоа не се објаснуваат со друга дијагноза. Голем дел од постковид-компликациите се поврзани со кардиопулмоналниот систем. Кардијалните проблеми вклучуваат: миокардитис, перикардитис, аритмија и исхемија. Додека, пак, најчестите пулмонални компликации вклучуваат: бактериска пневмонија, пневмоторакс и плеврална ефузија. Други системски постковид-симптоми вклучуваат: замор, главоболка, болки по телото, диспнеја, анксиозност и депресија. Исто така, можат да се појават и синдромот на Гилен-Баре, енцефалитис, полиневропатија, депресивен синдром, делириум и психоза, кои се најчестите невропсихијатриски компликации. Длабока венска тромбоза и белодробна тромбемболија, како и акутна бубрежна слабост се исто така можни компликации. Затоа е потребно да не се занемарува појава на какви било симптоми и да се консултира лекар.
Кардиоваскуларните компликации се честа постковид-компликација. Како и зошто е засегнат кардиоваскуларниот систем од инфекцијата што најмногу ги напаѓа белите дробови?
Вирусот Ковид-19 се врзува за трансмембранскиот рецептор ангиотензин конвертирачки ензим 2 на клетките домаќин: пневмоцити, макрофаги, ендотелни клетки, миокардни клетки (мускулните клетки на срцето), водејќи до инфламација (воспаление) и мултиорганска слабост. Инфекција на ендотелните клетки води до микро- и макро-васкуларни нарушувања. Овие нарушувања можат да доведат до дестабилизација на атеросклеротски плак и развој на акутен коронарен синдром (инфаркт на миокардот срцевиот мускул). Инфекцијата на респираторниот тракт со САРС-КОВ 2, особено на пневмоцити тип 2, води до системска инфламација и прекумерна реакција на имунолошкиот систем. Ова води во т.н. „цитокинска бура“, при која се зголемува нивото на цитокините, како што се интерлеукин 6, интерлеукин 7 и интерлеукин 22. Последователно на ова, можно е активираните Т-лимфоцити и макрофаги да го инфилтрираат (засегнат) и инфицираат миокардот (срцевиот мускул). Ова води до развој на воспаление на срцевиот мускул (миокардитис) и оштетување на срцевиот мускул. Покрај индиректното оштетување на миокардот со имунитетот, можна е и директна вирусна инвазија на срцевиот мускул, што води до оштетување на срцевите мускулни влакна и можен развој на аритмии.
Дали и претходно сте дијагностицирале миокардитис и дали постои разлика?
Миокардитисот е позната дијагноза од претходно. Многу различни вируси, меѓу кои е вирусот на грипот (инфлуенца), можат да предизвикаат миокардитис. Воспалението на срцевиот мускул може да биде предизвикано и од многу бактерии (стафилококи, стрептококи), некои паразити, дури и фунги. Патофизиолошкиот механизам на развој на воспаление е сличен кај сите предизвикувачи. Разликата е во честотата на развојот на воспалението. Се смета дека миокардитис може да се развие кај 1% од луѓето кои се заразуваат со вирусот на инфлуенца (грип). За разлика на ова, миокардитис по Ковид-19 се сретнува кај 10 до 15% од луѓето. Нашата статистика го потврдува ова мислење.
Како пациентите можат да препознаат проблеми со срцето по прележување на Ковид-19?
Најчестите симптоми на миокардитис се: забрзана и неправилна работа на срцето, замор, задушување, понекогаш и во мирување, градна болка, малаксаност. При појава на овие симптоми потребно е да се направи кардиолошки преглед, бидејќи истите или слични симптоми се јавуваат и при други кардиолошки дијагнози. Тоа ќе овозможи поставување на вистинската дијагноза.
Раната дијагностика со магнетна резонанса покажала одлични резултати во лекување на низа срцеви заболувања. Што е магнетна резонанса на срце, како се изведува и кои заболувања и неправилности може да ги открие?
Магнетната резонанса на срце претставува златен стандард за дијагностицирање на многу срцеви заболувања, меѓу кои е дијагностицирањето воспаление на срцевиот мускул. Овој метод ни овозможува процена на контрактилната функција на срцето, процена на воспаление, едем и некроза. Присуството и проширеноста на некроза во срцевиот мускул има дијагностичка и прогностичка способност.
Миокардитисот не може да се дијагностицира со ехо на срце. Со ехокардиографијата и присуството на биохемиски маркери може да се постави сомнение за миокардитис, кое треба да се потврди или да се отфрли токму со магнетната резонанса на срце.
Освен миокардитис, со магнетната резонанса на срце можат да се добијат многу информации за структурата и функцијата на срцето, да се дијагностицираат многу кардиомиопатии, вродени и стекнати срцеви маани, процена на ризик од ненадејна смрт, процена на мултисистемски инфламаторен одговор, кој од страна на срцето може да биде во форма на миокардитис, перикардитис (воспаление на обвивката на срцевиот мускул) или транзиторна систолна дисфункција.
Најголемата предност на магнетната резонанса на срце се состои во тоа што е единствен неинвазивен метод, кој ни го покажува квалитетот на срцевиот мускул. Притоа, тоа е безбеден метод, кој користи контрастно средство што може да се користи и кај пациенти со бубрежна слабост.
Кои се следните чекори по дијагностицирање на постковидниот миокардитис?
Најголемиот број случаи се со добра прогноза. Пациентите добиваат терапија за превенција или третман на срцева слабост. Се препорачува мирување и се забранува спортување следните шест месеци. Потешките случаи е потребно да се хоспитализираат.
Кардиоваскуларните болести се најчеста причина за тешки животни компликации, инвалидитет и смрт за огромен број луѓе. Кои чекори треба да ги преземе секој поединец за да се грижи за сопственото кардиоваскуларно здравје?
Секој човек треба да го знае својот ризик за кардиоваскуларни заболувања. Тоа се пресметува врз основа на процена за постојните ризик-фактори, возраст, пол и генетика. Превентивните кардиолошки прегледи се клучни за навремено откривање на можните проблеми. Тие се состојат во прецизна процена на кардиоваскуларниот ризик кај секој поединец. 80% од кардиоваскуларните заболувања можат да се спречат доколку се контролираат ризик-факторите што водат до кардиоваскуларни заболувања. Тука спаѓаат контрола на крвниот притисок, нивото на масти во крвта, нивото на гликемија (шеќер) во крвта, како и одржување на телесната тежина во граници на нормала и, секако, последно, но не и најмалку важно, практикување на редовна физичка активност.
Во периодот од 11 до 12 јули, во просториите на нашата клиника, а во соработка со вработените од Холандската Амбасада во Скопје, беше оджан дводневен курс за прва помош. Во склоп на курсот учесниците беа запознаени со основните принципи на давање на прва помош.
Истовремено добија теоретска и практична едукација за самите постапките на давање на прва помош. Првиеот ден беа опфатени ситуации како: срцево-белодробно оживување, употреба на авотматски дефибрилатор, задавување, срцев инфаркт, анафилактичен шок, астматичен напад, епилептичен напад, хипо и хипергликемична кома. Во тек на вториот ден, низ теоретска и практична едукација, учесниците се стекнаа со вештини за давање на прва помош при скршеници, повреди на меки ткива, повреда на рбетен столб, повреди на глава, топлотен удар, сончаница, изгоренци, удар од струја, смрзнатини, како и повреди на око.
Наши обучувачи беа Доц. д-р Тања Анѓушева и физиотерапевтот Никодин Вељановски. Им благодариме на Холандската Амбасада во Скопје за дадената доверба.
На 7 и 8 јули 2022 во просториите на Жан Митрев Клиника беше одржан првиот дводневен курс по магнетна резонанца на срце организиран од Македонско Здружение по кардиологија со подршка од Европското здружение за кардиоваскуларен имиџинг (EACVI).
Курсот го посетија кардиолози и радиолози од нашата земја со што преку низа теоретски предавања и практична “hands-on” сесија се стекнаа со основни познавања за оваа современа, неинвазна дијагностичка и прогностичка моќна алатка која зазема се поголем број на индикации во светските и европски водичи и препораки за практикување совермена кардиологија базирана на докази.
Магнетната резонанца на срце е златен стандард за неинвазивна проценка на структурата, функцијата и ткивните карактеристики на срцевите структури. Едни од основите индикации се миокардитис, кардиомиопатии, срцева слабост од непозната етиологија, конгенитални маани, исхемична болест на срцето, срцеви маси и тумори, болести на перикард.
Предавања одржаа врвни светски експерти во полето на магнетна резонанца на срце како Robin Nijveldt (потпрестедател на EACVI-CMR section), Chiara Bucciarelli- Ducci (CEO of Society of cardiac magnetic resonance), Tomaz Podlesnikar, Bostijan Berlot, Saloua El Messaouidi и Јадранка Стојановска.
Комбинирани предавања и од областа на ехокардиографијата како компаративна метода беа одржани од искусни локални предавачи како Д-р Тања Анѓушева, Проф. Д-р Љубица Георгиевска – Исмаил, Проф. Д-р Елизабета Србиновска, Проф. Д-р Марија Вавлукис и предавања од областа на магнетна резонанца на срце одржани од Доц. Д-р Планинка Зафировска, ко-директори на курсот беа Проф. Д-р Елизабета Србиновска, Доц. Д-р Планинка Зафировска и Проф. Д-р Робин Нијвелдт.
Партиципантите се стекнаа со сертификат за завршено I ниво на магнетна резонанца на срце (Level I CMR) подржано од EACVI и акредитирано од Македонската Лекарска Комора.
Остеопорозата претставува метаболно заболување на коските кое се карактеризира со нивна намалена густина и подложност на скршеници при минорна траума.
Ризик фактори кои придонесуваат за појава на остеопороза се: пушење, недоволен внес на калциум и Витамин Д, возраст над 50 години, рана менопауза, неактивен стил на живот, долготрајна употреба на кортикостероиди.
Сите жени над 65 годишна возраст, треба да направат скрининг за остеопороза со помош на коскената дензитометрија.
Самата дијагноза остеопороза, заедно со проценката на ризик за скршеници вклучува повеќе фази: анамнеза, одредување на коскена густина – DEXA скен, FRAX скор и лабораториски иследувања. Дензитометријата како рентгенографска техника за откривање на остеопорозе е со голема прецизност. Иако таа може да се користи за мерења на сите коски од скелетот, клиничките мерења вообичаено се прават на слабинските рбетни пршлени и на колковите, а по потреба и на подлактицата.
Коскената густина во овие подрачја се мери затоа што луѓето со остеопороза имаат поголема опасност да направат скршеница токму на овие коски, скршениците на овие места предизвикуваат сериозни проблеми со долго време на опоравување, поголема болка и инвалидност. Секако дека може да се предвидат и идни скршеници на останатите коски.
Иако постојат и многу други техники развиени за оваа намена, сепак остеодензитометријата нуди најпрецизни мерења на повеќе скелетни места со најмала изложеност на зрачење и согласно сите тековни препораки во светот е алатка број еден за соодветен скрининг на остепорозата. Во Клиничката болница Жан Митрев, на располагање е апарат за мерење на коскената густина (DEXA скен) од најновата генерација, како и искусен лекарски тим специјално обучен и подготвен да препорача понатамошен третман и лекување на оваа состојба.
Моментално снимањето за коскената густина како и компјутерската томографија (КТ), магнетна резонанца (МРИ), РТГ, 2Д и 3Д мамографија и ехо на дојка се со намалување од 30%.
Според Интернационалната Асоцијација за истражување на болката (IASP) за хронична болка во вратот се смета онаа болка која што е локализирана во било која регија од цервикалниот `рбет, од окципиталната коска па се до спинозниот израсток на првиот торакален пршлен. Болката во вратот се смета за таква со или без проградирање кон главата, телото или горните екстремитети.
За хронична болка се смета онаа болка која што трае 12 недели или повеќе. Оваа болка се карактеризира со хипералгезија при палпација на регијата на вратот и рамениците, и е поизразена при сите движења во вратот и рамениот појас.
30% од пациентите со болка во вратот во траење подолго од 6 месеци ќе развијат хронични симптоми. Ова влијае на 14% од сите лица кои доживуваат состојби со болка во вратот. 37% од лицата кои имаат болка во вратот, пријавуваат постојани проблеми во траење од најмалку 12 месеци. 5% од возрасната популација со болка во вратот ќе биде оневозможена од болката, што претставува сериозен здравствен проблем.
Физиотерапевтскиот третман при хронична болка во вратот е базиран според класификацијата на состојбата
– При болка во вратот со дефицит во движењата, третманот опфаќа:
Манипулација на торакален и цервикален `рбет со мобилизација на зглобовите
Комбинирани вежби за цервикална/скапулоторакална регија: невромускулни вежби (на пр. Координација, проприоцепција и постурален тренинг), истегнување, зајакнување, аеробно кондиционирање и третман на когнитивно зафатените елементи
Dry needling, ласер, механичка или мануелна тракција
Кинезиотејпинг.
– Хронична болка во вратот со нарушување на координацијата
Едукација на пациентите и давање совети со фокус на уверување, охрабрување, прогноза и третман на болката
Мобилизација комбинирана со индивидуализирана, прогресивна и субмаксимална програма на вежби вклучувајќи цервикоторакално зајакнување, издржливост, флексибилност, координација и когнитивна терапија
Тенс
Функционална магнетна стимулација.
– Хронична болка во вратот пропратена со главоболка
Во оваа состојба се врши манипулација на цервикална и цервико-торакална регија. Мобилизација на зглобовите на вратот во комбинација со вежби за истегнување на рамениците и вратот, зајакнување на мускулатурата и вежби за издржливост.
– Хронична болка во вратот со радијациона болка
Тракција на цервикалниот `рбет во комбинација со истегнување на мускулите и мобилизација на зглобовите.
Старт на ракометниот камп Handball Camp 40×20 Macedonia во Охрид
Во организација на KMG Sport започна ракометниот камп за деца кој е предвидено да трае од 19 до 24 јуни. Истиот се одржува во хотелот ,,Аквалина,, на брегот на Охридското езеро. Со децата од Македонија, Шведска и Босна и Херцеговина ќе работат најдобрите македонски тренери со лиценци за Мастер коучинг, тренери од тимовите учесници во супер лига, како и тренери специјализирани за работа со млади категории. Исто така планирани се и предавања за здрав начин живот и исхрана и спортска психологија. Нашите лекари се погрижија на сите деца да им бидат направени потребните прегледи уште пред почетокот на кампот.
Секако покрај тренинзите, забавата и дружењето нема да изостанат. Планирани се прошетки, кајакарење и гостувања од поранешни и актуелни ракометни ѕвезди.
Им посакуваме добар помин на сите учесници во овој летен камп.
