Автор: zmc_piksel_dev

Балансираната исхрана со свежи состојки е основа за силна имунолошка одбрана. Поради тоа, сезонското овошје и зеленчук треба да добијат најголем приоритет во вашата исхрана. Интегралните производи, масла и јатки се исто така важни, бидејќи овие производи содржат важни витамини, елементи во траги и фитонутриенти.

Тие не само што штитат од болести и ни помагаат да ги надминеме, туку и овозможуваат поддршка за многу други процеси во телото.

Вие сте тоа што јадете

За жал, луѓето консумираат храна богата со хранливи материи многу поретко отколку што препорачуваат меѓународни експерти. Испитувањето за потрошувачката на храна и однесувањето кон здрава исхрана во Германија покажува дека 59% од населението не успева да го консумира препорачаното количество овошје на ден (250 g). Дури 87% не внесуваат доволно зеленчук (400 g) на ден (Анкета за националните навики во исхраната – Nationale Verzehr- studie II, 2008). Соодветно на тоа, студијата открива недостатоци во снабдувањето со неколку микронутриенти како што се витамин Д₃ и фолна киселина. Нивниот внес  во поголем дел од популацијата е под референтните вредности за здрави лица според дадените информации од Друштвото за исхрана во Германија.

Наш совет

Јадете повеќе сезонска храна – особено оние со разновидни бои. Важно: овошјето и зеленчукот треба да се готват колку што е можно помалку, бидејќи готвењето може значително да ја намали содржината на витамин.

Доволниот внес на микронутриенти е многу важен за имунолошкиот систем. Лицата со акутни или хронични заболувања имаат потреба од многу поголема количина од оние што се препорачани за здрави лица. Не секогаш може лесно да се задоволи оваа зголемена потреба со нормалните навики во исхраната.

 

За време на новогодишните празници вообичаено подготвуваме големи количини разновидна храна, која уживаме да ја споделиме со поширокото семејство и пријатели. Оваа година поради пандемијата, дружењето ќе биде ограничено, а тоа значи дека треба да обрнете внимание на количината храна која ќе ја подготвите. Не претерувајте, но истовремено следете ги и препораките во поглед на типот на храна која може да предизвика непријатност при варењето. Ова се однесува и на консумирањето алкохол и газирани пијалаци.

Иако се празници, сепак може да се погрижите да уживате во храна која е здрава, избегнувајќи консумирање на прекумерни количини.  Оваа година имате и повеќе време да експериментирате со нови, здрави рецепти.

Но доколку сепак решите да одите со новогодишната класика, имајте ги на ум следните совети:

• Избегнувајте полуподготвена храна со многу зачини, сосови и прекумерна количина алкохолни пијалаци.
• Консумирајте умерено месо и доколку е можно со помалку маснотии: пилешко или риба (скуша, лосос, туна, пастрмка). Тие се најдобрите сојузници за намалување на лошиот холестерол и одржување на маснотиите бидејќи содржат омега 3 масни киселини.
• При готвењето користете масла со добар квалитет како што се маслиново, ленено, сончогледово или пченкарно. Овие масла содржат незаситени масти кои го намалуваат лошиот холестерол. Исто така, содржат природни антиоксиданти како витамин Е.
• Консумирајте јаткасти производи како што се ореви, бадеми, лешници, ф’стаци бидејќи тие му обезбедуваат на вашиот организам мононезаситени масти и антиоксиданти.
• Изберете пијалоци без шеќер како што се вода, минерална вода, лесно газирани пијалоци без шеќер и природни свежо цедени овошни сокови. Важно е да останете добро хидрирани.
• Вечерајте лесна храна навечер и не прескокнувајте оброци, бидејќи тоа може да доведе до прејадување.
• Заменете го мајонезот или сосевите со обезмастено млеко или посен мајонез. Евентуално можетеда консумирате моцарела или друго не многу солено бело сирење.
• Не заборавајте на физичката активност. Иако се празници сепак би можеле одвоите време за пешачење во парк, возење велосипед па и во домашни услови. Ова ќе ви помогне да ги согорите вишокот внесени калории.
• Во следниот период, се препорачува детокс диета заснована на овошје, зеленчук и билни чаеви.

Не ги заборавјате салатите направени од свеж зеленчук. Тие му обезбедуваат на вашиот организам фитостероли, витамини и минерали кои помагаат во намалувањето на холестеролот. Подобри ефекти  ќе добиете од нив доколку ги консумирате сирови. Додадете зелка, брокула, карфиол и лук како зачин или кондимент за замена на солта. Сите овие заедно со кромидот содржат соединенија на сулфур кои ја подобруваат циркулацијата и кардиоваскуларната активност.

Овошјата се исто така важни. Во овој период сезонските овошја како калинки, цитрусните: мандарини, портокали, цитрони. Секогаш присутните банани.

Црвените или синкавите плодови како сливи, цреши, малини и боровинки иако во овој период во замрзната форма, се богати со антоцијани, природни антиоксиданти кои спречуваат натрупување на маснотии на внатрешните sидови на артериите. Грозјето кое сеуште можете да го најдете во маркетите содржи ресвератрол, природна супстанца која го штити срцето од хиперхолестеролемија, високи триглицериди и висок крвен притисок.

Празниците се токму за да уживаме во нив, да го избереме најдобриот и најздравиот начин, без претерување или забрани. Среќни празници!

Бронхитис е воспаление на обвивката на бронхијалните цевки кои внесуваат воздух од надвор кон внатре во белите дробови каде се збогатува со кислород и изнесуваат воздух од белите дробови кон надвор.

Луѓето кои имаат бронхитис најчесто го манифестираат со кашлица и искашлување густа и безбојна слуз и отежнато дишење.

Бронхитисот може да биде акутен и хроничен. Акутниот бронхитис е многу чест и во најголем број од случаевите е резултат на настинка или друга респираторна инфекција. Хроничниот бронхитис пак, е многу посериозна состојба бидејќи претставува континуирана иритација или воспаление на обвивката на бронхијалните цевки, најчесто предизвикано од пушењето.

Акутниот бронхитис, познат и како „ градна настинка“, обично поминува за една недела или 10 дена без последици, иако кашлицата може да продолжи и да трае со недели.

Меѓутоа, ако имате периодични епизоди на бронхитис, може да станува збор за хроничен бронхитис, а истиот бара лекарска помош. Хроничниот бронхитис претставува едно од нарушувањата на хроничното опструктивно белодробно заболување.

Симптоми

Знаците и симптомите на акутен и хроничен бронхитис можат да бидат:

∙ Кашлица

∙ Производство на слуз (спутум), кој може да биде проѕирен, бел, жолтеникав, сив или зелен – ретко може да се појават дамки од крв.

∙ Замор

∙ Тешкотии при дишењето

∙ Лесно покачена температура и треска

∙ Непријатност или болка во градите

Ако имате акутен бронхитис, може да имате симптоми на настинка, како што се болки во телото или благи главоболки. Иако овие симптоми обично се подобруваат за околу една недела, може да имате вознемирувачка кашлица која обично трае неколку недели.

Хроничниот бронхитис се дефинира како продуктивна кашлица која трае најмалку три месеци, со повторливи епизоди најмалку две последователни години.

Доколку имате периоди кога кашлицата или другите симптоми се влошуваат, покрај хроничниот бронхитис, може да имате и присутна акутна инфекција.

Кога треба да се консултирате со лекар?

Консултирајте се со вашиот лекар ако кашлицата ги има следниве карактеристики:

∙ Трае повеќе од три недели

∙ Не ви дозволува да спиете

∙ Придружена е со температура 38°C (или повисока)

∙ Произведува безбоен слуз

∙ Произведува крв

∙ Имате отежнато дишење

Причини

Акутниот бронхитис обично е предизвикан од вируси, најчесто станува збор за истите вируси кои предизвикуваат настинки и грип (инфлуенца). Антибиотиците не го уништуваат вирусот, затоа тие најчесто не се корисни во повеќето случаи на бронхитис.

Но, најчеста причина за појава на хроничен бронхитис е пушењето. Загадувањето на воздухот, токсичната прашина, гасовите во животната средина или на работното место исто така можат да придонесат за развој на оваа болест.

Фактори на ризик

Факторите кои го зголемуваат ризикот од добивање бронхитис се:

∙ Чадот од цигари. Луѓето кои пушат или живеат со пушач имаат поголем ризик да добијат и акутен и хроничен бронхитис.

∙ Ниско ниво на имунитет. Може да биде резултат и на друга акутна болест, како што е настинка или хронично нарушување што го компромитира вашиот имунолошки систем.

Постарите лица, доенчињата и малите деца се најосетливи на инфекција.

∙ Изложеност на надразнувачки супстанци на работното место. Ризикот од заболување од бронхитис е поголем ако работите во близина на одредени надразнувачи на белите дробови, како што се житарки или влакна, или ако сте изложени на испарувања од хемикалии.

Компликации

Иако само една епизода на бронхитис не предизвикува загриженост, кај некои луѓе може да доведе до пневмонија. Сепак, повторливи епизоди на бронхитис може да покажат дека имате хронично опструктивно белодробно заболување (ХОББ).

Превенција

За да го намалите ризикот од добивање бронхитис, потребно е да ги следите овие совети:

∙ Избегнувајте го чадот од цигари. Ова го зголемува ризикот од хроничен бронхитис.

∙ Вакцинирајте се. Многу случаи на акутен бронхитис се предизвикани од вирусот на грип. Со вакцинирање против грип секоја година, можете да се заштитите од оваа состојба.

∙ Мијте ги редовно рацете. За да го намалите ризикот од заразување со вирусна инфекција, често мијте ги рацете со многу вода и сапун секаде каде што има услови за тоа, а надвор користете средства за дезинфекција на рацете на база на алкохол.

∙ Секогаш носете маска. Ако имате хронична опструктивна белодробна болест, и доколку на вашето работно место сте изложени на прашина или испарувања на токсични гасови, но и кога сте во контакт со луѓе (при патување со автобус или авион), задолжително носете маска, ова не важи само за време на пандемијата, туку и во вообичаени услови.

Студот, ветерот и греењето го сушат и го оштетуваат епидермисот (површинскиот слој на кожата). Греењето ја отстранува малата влажност во овој период од годината и ја суши нашата кожа. Истата, во контакт со студот надвор, може да стане рапава, сува, и да се појават пукнатини.

За среќа, постојат природни решенија за да се одржи кожата хидрирана и здрава во текот на целата зима:

• Одржувајње на влажноста на воздухот дома: нема потреба да купувате навлажнувачи, едноставно под радијаторот можеме да поставиме сад (отпорен на топлина) исполнет со вода. Топлината предизвикува испарување на водата и го зголемува нивото на влажноста во вашиот дом.
• Туширање со млака, а не со топла вода: премногу топла вода ги оштетува заштитните слоеви на кожата. Иако многумина сакаат да го претвораат тушот во сауна, млаката вода е поздрава за кожата.
• Пилинг: доволно е да се протрие телото со влажна фротирна ракавица, морски сунѓер или четка (не силно) освен лицето и градите чија кожа е понежна. На овој начин помагаме во елиминирање на мртвите клетки.
  Исто така, постојат креми за пилинг или домашни лекови, како на пример една рака од крупна сол комбинирана со маслиново масло и неколку капки од есенцијално масло, кои можат да послужат како добар третман на вашата кожа.
• Деликатно сушење: Бришењето треба да биде без употреба на сила. Но за да се стимулира протокот на крв, најдобро е да примените тапкање за да ја впиете влагата.
• Хидратација: најдобро е да се нанесува хидратантна крема на сеуште влажна кожа, бидејќи така кожата ќе остане хидрирана подолго.
• Балансирана исхрана: пиење доволно вода, јадење здраво, вклучувајќи големи количини на свежо овошје и зеленчук, елиминирање на индустриските преработки (колачиња, сувомесно …), намалување на внесот на белиот шеќер или негова замена со шеќер од трска / меласа или други природни засладувачи, како и замена на рафинираните производи со цело зрнести, се дел од советите важни за општо здравје и здравјето на вашата кожа.

Лицето, усните и рацете се деловите од телото кои страдаат најмногу од лошите временски услови, бидејќи се целосно изложени, и на нив треба да им посветиме посебно внимание за нивна заштита.

Лицето: важно е чистење со соодветен сапун или млеко за чистење. Чистењето на лицето се прави наутро и навечер. Наутро бидејќи во текот на целата ноќ кожата се поти и порите лачат токсини, а навечер за да се елиминира прашината која се лепи во текот на денот, дури и ако не носиме шминка. Ова чистење може да се надополни со пилинг и маска најмалку еднаш неделно. Експертите препорачуваат професионално чистење на кожата два до три пати годишно. Хидратацијата со добар крем е исто така неопходна.

Усните: за секојдневна заштита можете да нанесете заштита за усни која хидрира и штити од сончевите зраци. Може да користите заштитата од шеа путер или какао, бадемово масло, или алое вера.

Рацете: во овој период од годината дерматитисот кој се појавува на задниот дел од рацете е честа причина за консултации со дерматолог. Ова појава е особено е честа кај луѓето кои поради своите работни обврски постојано ги мијат и ги чистат рацете. За да се избегне ова, треба да се носат ракавици и природни креми или масла за заштита на кожата на рацете.Истите се препорачува да се користат навечер пред спиење.

Сите овие совети се применливи и за жените и за мажите. Времето кога мажите ја запоставуваа нивната хигиена и нега на лицето сега се веќе се минето. Грижата за кожата е всушност прашање на вашето здравје.

Прекумерното седењето негативно влијае на нашето физичко и ментално здравје. Ние тоа го знаеме, но тешко е да се натераме да се активираме и да ги смениме веќе воспоставените навики.

Ова е особено важно денес, во времето на пандемијата на Ковид -19, кога многумина работат од дома.

Постојат востановени препораки од Светската Здравствена Организација во поглед на времетрање и интензитет на физичка активност / вежбање во зависност од возраста. Сегментирани се во две нивоа: умерена, интензивна физичка активност.

Со седентарниот начин на живот за здрави луѓе од 18 до 64 годишна возраст препорачано е 150-300 минути умерена физичка активност неделно или 75-150 минути неделно интензивна физичка активност. Ова ќе придонесе за подобрување на вашето дравје.

„Седењето е новото пушење“ е студија која покажа дека просечен човек во САД седи шест до осум часа на ден.

Друга студија спроведена во Велика Британија ги следеше учесниците 16 години, бележејќи ги сите важни податоци, од тоа колку долго седат до нивната физичка и ментална состојба.

Заклучокот кај сите истражувања е едноставен – Активноста е неопходна!

Кога седите мирно, не согорувате калории, напротив, телото ги собира сите вишок калории. Метаболизмот исто така забавува, така што телото не може да го контролира нивото на шеќер во крвта и крвниот притисок. Дебелината, дијабетес тип 2, некои видови на рак, а понекогаш дури и смрт може да се појават како резултат на долго седење.

Последиците од прекумерното седење се исто така психолошки проблеми, како што се вознемиреност и деменција. Менталното здравје е поврзано со вежбање и дневното пешачење.

Но, не е сè толку црно како што изгледа на прв поглед. Потребна е активност. Затоа, треба да ги слушате корисните совети на експерти.

Се занесувате додека работите и не забележувате колку време поминало. Затоа, поставете го вашиот мобилен телефон да ѕвони кога е време за пауза од седење. Прошетајте низ куќата, тераса, направете лесни вежби и ќе бидете како нови.

Кога ќе имате простор за подолга пауза, направете ги вашите дневни вежби. Ако не знаете кои само отворете некое видео на Интернет, има одлични снимки. Можете исто така да се претплатите и да вежбате со други лица со помош на тренер или онлајн тренер. Ова е одлична идеја, бидејќи кога плаќате, сигурно нема да пропуштите состаноци.

Некои дури сугерираат да стоите додека работите, ако е можно. Прилагодете го работниот простор, прилагодете ја работната позиција и стојте додека работите.

Постојат многу начини, само треба да се активирате уште денес. Изборот е ваш!

 

Како да се заштитиме или да ја запреме остеопорозата?

Остеопорозата се дефинира како состојба во која постои зголемена разградба на коскеното ткиво, со што тоа станува порозно, коските се меки и кршливи, и тоа доведува до многу голема веројатност од појава на сериозни скршеници дури и при лесни падови или удари.

Ова значи дека суштината на остеопорозата е појавата на порозни коски кои имаат намалена цврстина и променет квалитет, поради што се подложни на појава на скршеници.

Скршениците на колк кај постарите лица (кои често се пропратени со неспособност за извршување на основните дневни активности)  многу често се случуваат поради присуство на остеопорозата.

Исто така најчестите скршеници при остеопороза се на подлактницата, пршлените и колкот. Особено се сериозни скршениците на пршлените, кои најчесто се јавуваат спонтано и доведуваат до губење на висината, појава на грпка, болки во грбот, половината и долните екстремитети и нарушено држење на телото и активност. Скршениците на колкот, од друга страна, се лекуваат хируршки со сите можности за компликации кои со себе ги носат таквите зафати.

Навременото откривање на оваа болест е многу значајно, за да се превенираат последиците. Сами не можете да ја откриете оваа болест се додека не се здобиете со некоја скршеница. Затоа е потребно да се консултирате со стручно лице-лекар специјалист во оваа област.

Доколку сте повозрасни од 35 години и имате најмалку два од следните ризик фактори, најдобро е да се консултирате со лекар:

• седечки начин на живот
• рана менопауза
• хронична употреба на кортикостероиди
• употреба на цигари, алкохол и кофеин
•  исхрана пребогата со протеини од животинско потекло, фосфорна киселина (фосфор) и сол.Превенција:

Иако генетските фактори играат голема улога во ризикот од остеопороза, начинот и стилот на живеење може да влијаат на коскеното формирање во текот на младоста, како и на степенот на коскеното губење во текот на подоцнежниот период на животот.

Исхраната, вежбањето и преостанатите фактори на стилот на живеење имаат клучна улога врз здравјето на скелетот и одржувањето на коскеното формирање.

Децата и младите треба да имаат:

• Редовно и оптимално внесување на калциум
• Нормална и оптимална исхрана и да не се потхранети или лошо исхранети
• Доволно витамин Д преку редовно изложување на сонце и со надопол-нување со суплементи
• Редовна физичка активност
• Да не пушат и да не консумираат алкохол

Постојат неколку терапии за остеопорозата, а всушност истите можат да се користат и за превенција од појава на болеста:

Витамин Д – за правилна апсорпција и искористување на калциумот на телото му е потребен витамин Д. Но, факт е дека кај лицата кои живеат во места каде има доволно сонце, дефицитот на овој витамин не е присутен, така што суплементацијата на витамин Д не е од некоја голема корист.

Калциум – скоро задолжително при третман на остеопороза се препишуваат и суплементи на калциум, но вистинскиот проблем кај остеопорозата не е недостатокот на внес на калциум, туку неговото неправилно искористување и трошење.

Лекови – во последните години, развиени се и лекови кои имаат за цел да ги зајакнат коските кај веќе настанатата остеопороза и да го намалат ризикот од настанување на скршеници.

Вежбање – доколку не вежбаме редовно коските нема да зајакнат ниту да се здебелат. За да коските ги задржат минералите во себе (калциумот), треба да бидат изложени на отпор спротивно од силата на земјината тежа. Доколку пушите, најдобро е ваднаш да престанете со тоа.

Правилна исхрана – намалете ја количината на сол, протеини од животинско потекло и фосфор во вашата исхрана. Вообичаената исхрана богата со сол, фосфор и протеини од животинско потекло предизвикува преголемо излачување на калциум од нашиот организам, што значи дека дури и да внесуваме доволно калциум тој нема да се задржува во коските туку ќе се излачи преку урината.

За да го спречиме овој губиток на калциум треба да ја намалиме употребата на сол во нашата исхрана, да внимаваме на внесот на фосфор (да не консумираме газирани пијалоци богати со фосфорна киселина) и да внесуваме протеини во препорачана количина од 50-60 грама на ден, притоа внимавајќи на квалитетот на внесените протеини, т.е. да се внесуваат протеини и од растително, а не само од животинско потекло.