Тестикуларна протеза или т.н. тестикуларен имплант е силиконски имплант кој се става во празен скротум. Недостатокот на тестис кој треба да се реши со поставување на ваква протеза може да биде предизвикан од неколку причини и тоа:
малформиран или исчезнат тестис при раѓање
неуспешно спуштен тестис во скротумот
хируршки отстранет поради повреда, инфекција или потешка болест
дел од процесот за промена на полот.
Целта на имплантот е да го подобри изгледот и да ги смири психолошките стравови.
Овој зафат во нашата клиника се спроведува како рутинска процедура од стручниот тим хирурзи уролози и бара еден ден болничко лекување.
Тестикуларните импланти им помагаат на пациентите да ја повратат својата самодоверба и чувство на целосност – велат нашите уролози.
Доколку одлучите да ја направите оваа процедура, важно е да биде изведена од хирург кој е специјализиран за имплантација на протеза на тестисите. Постапката за имплантација се изведува под општа или локална анестезија со правење засек во долниот дел на препоните или горниот скротум. При постапката се оформува „торбичка“ за протезата по што имплантот се фиксира во правилна положба и се затвора засекот.
Тестикуларната протеза ќе има тежина, форма и чувство многу слично на нормалниот тестис, сепак функционалноста како вистински тестис е исклучена.
Со цел да се информирате и закажете термин кој ви одговара јавете се на 02/3091-484.
Кератоконусот спаѓа во групата на пореметувања на рожницата (корнеата) кој се карактеризира со нејзино истенчување и испакнување. Всушност станува збор за состојба при која рожницата во централната зона, станува позакривена во однос на периферијата. Како сликовит пример може да послужи споредбата дека нормалното око има форма на пинг-понг топче, а при кератоконус, формата на окото личи на лажица. Кератоконусот како заболување се појавува на возраст од 6 до 40 години. Најчесто тоа може да се случи во пубертетот. Заболувањето е прогресивно, секогаш ги зафаќа двете очи, но обично почнува поизразено на едното око. Почесто се јавува кај машкиот пол. Во почетната фаза на кератоконус се појавува миопен астигматизам, но со тек на време диоптријата се повеќе се зголемува, по што пациентите имаат намалување на видот кое не може успешно да се корегира со очила.
Третман: во раните фази на лекување на кератоконусот, очилата или меките леќи, можат да бидат доволни за корекција на благиот астигматизам. Но, тие не се доволни за корекција на видот и најчесто во овие случаи на пациентите им се препишуваат тврди леќи. Овие леќи овозможуваат добра корекција на видот, но не го запираат понатамошното напредување на болеста.
Порано при напредните фази на кератоконусот се вршела хируршка интервенција (радијална кератотомија) која веќе ретко се употребува. При оваа метода во локална анестезија се прават неколку радијали засеци на рожницата со кои се намалува нејзината испакнатост. Основаните маркери за овие засеци се меридијаните добиени од корнеалната топографија.
Во случаи каде има прогресија се користи методата Cross-linking со која се зацврстува централниот дел на корнеата.
Кај најтешките случаи кај кои веќе има оштетување и заматување на централниот дел на корнеата, единствена метода е кератопластика (трансплатација на корнеа од донор). Од 10 до 25% од пациенитите со дијагностициран кератоконус напредуваат во стадиумот во кој корекцијата на видот веќе не е можна, и каде истенчувањето на рожницата станува премногу големо, во тој случај трансплатацијата на рожница е неопходна.
За правилна и навремена дијагностика и понатамошни чекори нашиот тим офталмолози е на располагање. Закажете преглед во нашиот Центар за офталмологија во соработка со Промедика Офталмологија на: 02/3091-484
Ова тврдење е општо познато кога се работи за срцев удар, бидејќи степенот на оштетување на срцевиот мускул при акутен срцев удар е директно поврзан со времетраењето на оклузија односно затворање на коронарната артерија. Колку подоцна се отвори засегнатата – инфарктна артерија, толку поголем дел од срцевиот мускул останува неповратно оштетен, односно изумира. Затоа се вели дека „Времето е срцев мускул”.
Срцето, како и сите останати мускули во нашето тело, за нормално функционирање има постојана потреба од кислород и низа хранливи материи. Тие ги добива со коронарната циркулација, односно преку крвта која минува низ коронарните артерии. Тоа се всушност двете артерии, десна и лева, кои излегуваат од аортата, веднаш над аортната валвула, се движат по површината на срцето и даваат многу гранки. Тие понатаму се делат на помали гранки кои навлегуваат во срцевиот мускул и обезбедуваат исхрана на истиот.
Слика 1. Приказ на коронарни артерии со неинвазивна КТ коронарографија
Кај акутниот миокарден инфаркт (АМИ), попознат како акутен срцев удар, најчесто се случува оклузија, односно затворање, зачепување, запушување на некоја од коронарните артерии кое ја прекинува циркулацијата на крвта во тој дел срцевиот мускул. Најчесто причина за затворање е тромб (згрутчена крв) кој се формира на местото каде што има задебелување/наслаги на ѕидот на артеријата настанат со таложење на различни супстанции, пред се масти. Овие наслаги се познати како атеросклеротична плаки.
Кога почнуваат првите знаци за атеросклероза на нашите крвни садови?
За жал, почетоците се многу порано отколку што можете да претпоставите. Имено, во зависност од начинот на живот и генетските предиспозиции, наслагите кои ја предизвикуваат атеросклерозата на крвните садови, а потоа доведуваат до прекин во циркулацијата и акутен срцев инфаркт, може да се појават уште пред 40-та година од животот.
Овој прекин на циркулацијата предизвикува прекин во исхраната – снабдувањето на срцевиот мускул со хранливи материи, поради што започнуваат низа промени во зафатениот срцев мускул кои потоа доведуваат до трајни оштетувања односно изумирање на тој дел од срцевиот мускул.
Големината на оштетувањето, односно колкав дел од мускулот ќе биде оштетен зависи од локализацијата и времетраењето на срцевиот удар.
Колку засегнатата артерија е поголема нејзиното затворање ќе доведе до потешко, поголемо оштетување мускулна маса на срцето односно до потешки последици од причина што таа исхранува поголема мускулна маса. На пример, затворање на почетниот дел на најголемата коронарна артерија (Предната Десцедентна Артерија (ПДА), доведува до тешки оштетувања и до смртен исход. Затоа срцевиот удар настанат како резултат на нејзино затворање се нарекува и “widow maker” (создавач на вдовици – слободен превод)
Времетраењето на срцевиот удар, е одредено од моментот на затворање на инфарктната артерија и прекин на циркулацијата. Се манифестира клинички со појава на тегоби, пред се градна болка. Колку времетраењето е подолго, толку и оштетувањата на мускулот ќе бидат поголеми. По период од околу три часа започнува трајно оштетување односно “изумирање” на тој дел од срцевиот мускул. Со понатамошно траење на состојбата без да биде санирана, овие промени се шират и зафаќаат се поголем дел од мускулот.
Затоа лекувањето на срцевиот удар се состои во брзо отворање на инфарктната артерија, воспоставување на проток на крвта, односно циркулација и исхрана на срцевиот мускул. Отворањето најчесто се прави механички, со инвазивна коронарна процедура односно со поставување на стент. Поретко е фармаколошки, односно со давање на лек интравенски.
Доколку ова се постигне во првиот час од почетокот на тегобите, срцевиот удар нема да остави последици, или тие ќе бидат минимални и нема да влијаат на понатамошниот квалитет на живот на пациентот. Тоа е правилото на “ЗЛАТЕН ЧАС”, односно успешно отворање на инфарктната артерија во првиот час по затворањето и почеток на тегобите.
Затоа, при сомнение за срцев удар, потребно е пациентот веднаш да се јави во најблиска здравствена установа заради брза и точна дијагноза.
На локализацијата на срцевиот удар не може да влијаеме, но затоа може да влијаеме на времетраењето. Раната и точна дијагноза на срцев удар, со кратко времетраење до почетокот на третман, овозможува негово успешно лекување.
ПРЕПОРАКА: Да не се чека до моментот кога докторите ќе треба да се борат со времето. Веднаш штом се појави било каков симптом одете на преглед.
Постои широка палета на превентивни кардиолошки испитувања кои може правовремено да откријат болест на коронарните артерии, пред да настане срцевиот удар. Такви се:
Ехокардиографијата (ултразвучен преглед на срцето)
Коронарниот стрес тест (особено со новите техники на HyperQ),
Одредувањето на калциум-скор на коронарните артерии
Доплер на каротидни артерии итн.
Слика 2. Одредување на Калциум-score на коронарни артерии. Се гледа значајна количина на калциум на почетен дел на ПДА, кај пациент пушач и покачен холестерол во крвта.
Сите овие методи можат да ги откријат промените на коронарните артерии, пред да се појават тегоби односно симптоми. Ова е особено важно за поединци кои се сметаат за целосно здрави, бидејќи немаат симптоми, но имаат значајни ризик фактори кои не ги сфаќаат сериозно. Во оваа група спаѓаат пушачи, (и оние кои сметаат дека 10 цигари не се страшни), оние кои имаат ,,малку,, покачени масти (но можат брзо да ги симнат бидејќи знаат што да пијат или ќе држат диета), оние со „малку“ покачен крвен притисок, оние со “малку,, покачена телесна тежина (ама не е проблем, со диета брзо ќе ослабат)” и сл.
Дали се препознавте во некоја од групите?
Срцето пумпа околу 5 литри крв во минута или 300 литри за еден час, 7200 литри за 24 часа или за една година срцето ќе испумпа околу 2 700 000 литри крв.
Не му е лесно на вашето срце, затоа чувајте го и погрижете се да делувате превентивно.
Соработката со Општина Центар продолжи и годинава. Ваучерите за бесплатни педијатриски прегледи во клиниката, наменети за сите бебиња родени на територијата на општина Центар, беа доделени лично на родителите на настанот кој се одржа во ООУ „Киро Глигоров“ во Скопје. На овој настан во организација на градоначалникот беа доделени и други донации од општествено одговорни компании како и од самата општина.
Клиника Жан Митрев продолжува да ги подржува ваквите акции каде што се слави раѓањето и животот.
Никола Далас, пациентка од Англија успешно беше оперирана во Клиника Жан Митрев. По претходно неуспешниот ортопедски зафат, Далас патеше од силни болки во коленото и неможност за движење по што решава да го истражи приватното здравство и доаѓа во Клиника Жан Митрев. Тимот ортопеди успешно направи целосна реконструкција на колено, вадење на имплант вграден во Англија и поставување нов, санирање пукнатина на предниот вкрстен лигамент и други тетиви, по што Никола Далас движејќи се патува дома. „Откако возач ме пречека и донесе во Клиниката веднаш ми ги направија сите можни испитувања и ме уверија дека се е во ред и може да се направи операцијата. Мислам дека ме испитаа од глава до петици. Целиот персонал на болницата е брилијантен и сите се запознаени со состојбата на пациентот, секогаш знаат што не е во ред и што ви треба“, вели Далас за својот престој во Клиника Жан Митрев. Долгото чекање термин за преглед и прескапото приватно здравство во Англија, ја натераа Далас да допатува во Клиника Жан Митрев од каде заминува движејќи се самата. „Сега се чувствувам многу добро и иако овде сум среќна едвај чекам да се вратам на мојот нормален живот и рутина. Се ми се допадна тука, но најмногу грижата од персоналот и професионалноста во тоа што го работат. Повторно би се вратила тука, доколку имам потреба и Клиника Жан Митрев би ја препорачала секому“, додава Далас.
Првата неврохируршка операција на Одделот за неврохирургија во Клиниката Жан Митрев е изведена со врвен неврохируршки микроскоп, еден од најсовремените во регионот. Неврохируршкиот тим предводен од проф. д-р Владимир Рендевски, заедно со д-р Михаил Таушанов и останатите членови на интердисциплинарната медицинска екипа, успешно изведоа операција на ‘рбетниот столб на пациентка со огромни болки во крстот и ограничена подвижност на десната нога.
Со исклучителното ниво на визуелизација на овој современ микроскоп, беше овозможено искусниот тим со најмала инвазивност да направи отстранување на дискус хернијата во лумбалниот дел ‘рбетот и ослободување на притиснатиот корен на нервот, што ги предизвикуваше наведените клинички симптоми и знаци кај пациентката. Во иднина, микроскопот од брендот Zeiss Kinevo 900, со неговите врвни перформанси и дополнителните оптички филтри кои овозможуваат интраоперативно пребојување на туморите, васкуларните промени (аневризми) и други патолошки промени на мозокот и ‘рбетниот мозок, ќе биде користен за нивно безбедно и прецизно оперативно отстранување со најмала можна инвазивност и притоа зачувување на околното здраво ткиво.
