Автор: Nertila Ivanovski

Брачниот пар Голабоски од Охрид доживеа вистински кошмар при патување кон Маврово. Додека се возеле во нивното возило влегла пчела која ја каснала сопругата Соња алергична на пчелни убоди. Поради состојбата која брзо се влошувала, нејзиниот сопруг Владимир веднаш одлучил да се вратат назад упатувајќи се кон охридската болница.

За среќа, на патот кон Охрид ја пресретнале мобилната единица на Клиниката Жан Митрев. Нашата екипа сестра Весна Наумоска – анестетичар и колегата шофер Тони Антониевски, иако со друга задача, без размислување застанале да ја укажат побараната помош. Со брза и стручна интервенција, веднаш биле преземени неопходните чекори за спасување на сега веќе пациентката Соња Голабоска.

,,Не направив ништо посебно. Постапив онака како што сум обучена и како што треба да направи секој човек. Своето знаење и опремата и средствата кои ми беа на располагање во амбулантното возило ги употребив за спасување и стабилизирање на жената,,- објаснува сестра Весна.

По убодот на инсектот веќе биле видливи отоци и имало трнење на ногата. ,,Немавме време да ја чекаме брзата помош која доаѓаше од Охрид, затоа одлучивме веднаш да ја ставиме во нашето возило и се упативме кон Охрид. Во меѓувреме аплицирав антиалергиски лекови и постојан мониторинг додека брзавме кон болницата,, – ни објаснува Весна која додадва дека вакви случаи се чести кога се патува со амбулантно возило.

Семејството Галабоски изрази огромна благодарност до нашиот медицински тим, чија подготвеност да се стават на располагање на граѓаните не штедејќи се себе и ресурсите кои им се на располагање уште еднаш покажа дека животот е скапоцен.

Мелис, Мира и Малахат, трите предвремено родени бебиња во Клиника Жан Митрев, по неколку недели поминати во Центарот за мајка и бебе, денеска си заминуваат дома.

Тројката се роди на 4 јуни 2025, од природно зачната бременост, што е реткост во современата медицина. Родени со царски рез 9 недели пред очекуваниот термин, во 31 гестациска недела, новороденчињата се во стабилна состојба и подготвени да си одат во својот дом.  

Ова породување претставуваше не само медицински успех, туку и симбол на надеж, живот и хуманост. Доаѓањето на свет на Мелис, Мира и Малахат за Жан Митрев Клиника претставуваше огромна радост, но и потврда дека можат да се надминат и најголемите предизвици кога ќе се соединат знаењето, искуството и современата технологија.

Со ова породување и официјално започна со работа Одделот за неонатална интензивна нега (NICU) во Клиника Жан Митрев.
Во последните три децении, стапката на повеќеплодови бремености е зголемена за 70%, а тројните бремености по природен пат, како оваа, се вистинска реткост и во светски рамки се појавува во 1 на 8000 случаи.

Центарот за мајка и бебе при Жан Митрев Клиника на мајката Мубеџел Бектешова од Скопје ѝ посакува брзо закрепнување, а на Мелис, Мира и Малахат живот исполнет со љубов, здравје и сила.

Во Центарот за мајка и бебе на Клиника Жан Митрев се роди 100-тото бебе, момент кој го одбележува растот и довербата што стотици семејства им ја даваат на нашите медицински тимови. Овој значаен настан не е само бројка, туку симбол на љубов, посветеност и современа медицинска грижа, која овозможува секое породување да биде најубаво и најбезбедно искуство за мајките и нивните семејства.

Центарот за мајка и бебе е создаден како место каде што животот започнува со највисока можна грижа и внимание. Од моментот кога беше родено првото бебе во Центарот, пред нешто повеќе од половина година, па сè до денес, нашата мисија останува иста: да обезбедиме врвни услови и безбедност за секоја мајка и секое новороденче. Со комплетно опремени породилни сали, современа неонатолошка интензивна нега, приватни и удобни соби, и тим од искусни гинеколози, неонатолози, анестезиолози и медицински сестри, Центарот претставува дом за безбедни породувања и топол почеток на секој нов живот.

„Секое бебе е посебна радост и огромна одговорност. Со секое бебе родено во Центарот на Клиника Жан Митрев, испраќаме порака дека секој живот е бесценет и заслужува најдобра можна грижа уште од првиот здив. Благодарни сме за довербата која секојдневно ни ја укажуваат идните родители,“ велат од тимот на Центарот за мајка и бебе на Клиника Жан Митрев.
Безбедноста и индивидуалниот пристап се темел на работата на Центарот. Се применуваат највисоки стандарди за хигиена и стерилност, а секое породување се одвива со 24-часовна медицинска поддршка и внимателно следење на здравјето на мајката и бебето. Со ова, Клиника Жан Митрев ја продолжува својата посветеност кон создавање здрави генерации и обезбедување најсовремена медицинска грижа во земјава.

Тимот на Клиника Жан Митрев оствари забележителен успех на меѓународниот турнир во шутбал (walking football), кој се одржа од 11 до 13 јули на терените на клубот „Ференцварош“ во Будимпешта, Унгарија. На турнирот учествуваа вкупно 16 екипи од Унгарија, Италија, Австрија, Израел, Англија и Македонија, во категории над 50 и над 60 години возраст, а натпреварите беа организирани под покровителство на Унгарската федерација.

Во силна конкуренција со реномирани екипи, меѓу кои и АС Рома од Рим, екипата на Жан Митрев Клиник го освои високото 8-мо место, постигнувајќи значителен број голови и оставајќи силен впечаток како достоен претставник на Република Македонија. Овој успех е особено значаен имајќи предвид дека шутбал односно фудбал со одење, е спорт кој доживува експанзија во Европа и светот, а во некои од земјите-учеснички е веќе на значително повисоко развојно ниво.

Покрај спортските резултати, тимот на Клиника Жан Митрев активно ја предводи иницијативата за развој и официјализирање на шутбал и во Македонија. Очекувањата се дека до крајот на годинава, нашата земја, предводена токму од овој тим, ќе стане полноправна членка на Меѓународната федерација на Walking Football. Со тоа, Македонија ќе се вклучи уште посериозно во развојот на спортот кој носи здравствени и социјални бенефити за луѓето во постара возраст, кои и понатаму се чувствуваат активни и полни со енергија.

Според планот на екипата, веќе од септември се очекува почеток на формирање на национална „Македонска лига“ со повеќе домашни тимови, што претставува нова страница во спортската сцена на земјата. Дополнително, во текот на следната година, Клиниката Жан Митрев планира организација на голем меѓународен турнир под името „Walking Football Tournament – Macedonia Open 2026“, со учество на екипи од повеќе европски земји. Овој настан ќе ја позиционира Македонија не само како спортски центар, туку и како гостопримлива дестинација за спорт, дружење и позитивна енергија.

Tимот на Клиника Жан Митрев останува посветен на мисијата да ја промовира културата на здрав и активен начин на живот, истовремено носејќи нов спорт на македонската сцена и претставувајќи ја државата во најдобро светло на европските и светски натпревари.

Екипата на Клиника Жан Митрев продолжува активно и достојно да ја промовира Македонија и здравиот начин на живот преку учество на меѓународни турнири во Шутбал – Walking Football, спорт кој бележи сè поголема експанзија ширум светот.
По успешниот настап на меѓународниот турнир на островот Вис во Хрватска, каде тимот се натпреваруваше со екипи од Хрватска, Австрија и Унгарија, екипата на Клиника Жан Митрев ќе учествува на уште еден голем турнир. Овојпат, тимот ќе настапи на меѓународниот турнир во Walking Football што ќе се одржи во Будимпешта на 11, 12 и 13 јули 2025 година.
На турнирот во Будимпешта ќе учествуваат осум екипи од шест земји: Унгарија, Австрија, Англија, Израел, Италија и Македонија. Натпреварувањата ќе се одвиваат во две возрасни категории – екипи над 50 години и екипи над 60 години. Екипата на Клиника Жан Митрев ќе се натпреварува во категоријата над 50 години, каде ќе игра во група со екипите од Унгарија, Англија и Италија. Предвидени се три натпревари со секој противник во групата, како и дополнителни елиминациски дуели.
Walking Football е повеќе од спорт – тој претставува нова можност за луѓето од сите возрасти да останат физички активни, да се дружат и да се грижат за своето здравје. Според правилата на овој спорт, трчањето е забрането, се игра со одење, а акцентот е ставен на рекреација, тимска игра и социјализација. Ова го прави идеален избор за повозрасни лица, пациенти во рехабилитација, хронично болни, дијабетичари, хендикепирани лица, како и за сите кои сакаат да водат активен и здрав животен стил.
Клиника Жан Митрев како основоположник на Walking Football во Македонија ја продолжува својата мисија за ширење на овој спорт и најавува организација на голем меѓународен турнир во нашата земја во блиска иднина. Со ова, Клиниката има јасна визија да создаде движење кое ќе го негува спортот, здравјето и активниот животен стил, без разлика на возраста, со цел Walking Football да стане достапен за пошироката јавност и да се поттикне изградба на заедница која живее здраво и активно.