Проф. д-р Владимир Рендевски, специјалист неврохирург од Клиничката болница Жан Митрев, одржа воведно предавање на 65. Меѓународен медицински конгрес по невронаука „Mind and Brain“, кој годинава се одржа од 21 до 24 мај во Пула, Хрватска.
Предавањето беше посветено на областа на невроонкологијата, при што проф. Рендевски ги презентираше резултатите од оперативниот третман на тумори на базата на черепот, во пределот на сфеноидалниот гребен. Во рамки на презентацијата беа прикажани предоперативни и постоперативни евалуации на пациентите, како и обработени видеоматеријали од интраоперативна микроскопија, користена при третманот на овие комплексни случаи.
Особено значајно за Клиничката болница Жан Митрев е што на овој престижен конгрес беше презентиран оперативниот тек и постоперативните резултати на пациентка која успешно беше оперирана пред околу три месеци од комплексен тумор на базата на черепот. Оперативниот зафат го изведоа проф. Рендевски и д-р Михаил Таушанов, специјалисти во областа на неврохирургијата.
Несоницата е едно од најчестите нарушувања на спиењето и се карактеризира со тешкотии при заспивање, чести будења во текот на ноќта, рано утринско будење или чувство на ненаспаност и покрај доволното време поминато во кревет.
Повремените проблеми со спиењето се нормален дел од животот, особено во периоди на стрес и зголемени обврски. Меѓутоа, кога несоницата трае подолг период и почнува да влијае врз концентрацијата, работната способност, расположението и секојдневното функционирање, потребно е да се побара стручна помош.
Кои се можните причини за несоница?
Несоницата може да биде последица на различни телесни и психички состојби.
Телесни причини: • хронична болка • заболувања на срцето и белите дробови • нарушувања на тироидната жлезда • шеќерна болест и други ендокрини заболувања • гастроезофагеален рефлукс • невролошки заболувања (како Паркинсонова болест, мултиплекс склероза или последици од мозочен удар) • хормонални промени (како менопауза и сл.) • употреба на одредени лекови, кофеин и други стимуланси
Психички причини: • стрес и преоптовареност со обврски • анксиозност и постојана загриженост • депресија • емоционални кризи и животни промени • трауматски искуства • други психијатриски состојби
Важно е да се знае дека несоницата не е само симптом, туку може да стане и самостоен здравствен проблем кој значително го нарушува квалитетот на животот, психичкото здравје и физичката благосостојба.
Индивидуален пристап во третманот
Бидејќи причините за несоница се различни кај секој човек, потребна е внимателна проценка и индивидуален пристап во третманот. Психијатрискиот преглед овозможува препознавање на факторите кои придонесуваат за нарушувањето на спиењето и изработка на план за лекување прилагоден на потребите на секој пациент.
Доколку подолг период се соочувате со потешкотии при спиењето, не го занемарувајте овој проблем. Квалитетниот сон е основа за добро ментално и физичко здравје.
Закажете психијатриски преглед и добијте стручна проценка, поддршка и индивидуален пристап во третманот на несоницата.
Квалитетниот сон не е луксуз, туку основа за добро ментално и физичко здравје.
Доц. д-р Жан Митрев е еден од десетте најцитирани истражувачи во областа на медицинските науки. Ова признание доаѓа од истражувањето спроведено во рамки на проектот АРБУ – Академско рангирање на балканските универзитети, а за истото му е доделен и сертификат.
На денешната манифестација на доделувањето на сертификатите присутни беа проф. д-р Милка Клинчева и д-р Емил Стојчевски, кој во име на д-р Митрев го прими признанието, односно сертификатот. Според објавената листа на АРБУ за професори и истражувачи во категоријата Medical Sciences, доц. д-р Жан Митрев е рангиран на 8. место во Северна Македонија, во конкуренција на 100 истражувачи рангирани според академскиот придонес.
Покрај ова признание, доц. д-р Жан Митрев припаѓа и во групата од 25 најцитирани истражувачи во Македонија, што претставува значајна потврда за неговиот научно-истражувачки придонес, видливоста на неговата работа и влијанието што го има во медицинската наука.
АРБУ е проект наменет за академската заедница, истражувачите и студентите, со цел да обезбеди релевантни информации и индикатори за академските перформанси на универзитетите и истражувачите во регионот. Платформата опфаќа податоци за земји од Балканот, меѓу кои Северна Македонија, Србија, Косово, Црна Гора, Босна и Херцеговина, Хрватска, Словенија и Албанија, и претставува дополнителен извор на информации за институции кои не се опфатени со највлијателните светски рангирања како QS, Times Higher Education и Shanghai Ranking.
Ова признание е уште една потврда за континуираната посветеност на доц. д-р Жан Митрев кон развојот на медицината, научно-истражувачката дејност и унапредувањето на здравствените практики преку знаење, искуство и меѓународно препознатлив придонес.
Вклучувањето меѓу најцитираните истражувачи претставува важен поттик за понатамошно вложување во науката, истражувањето и публикувањето, како и за промоција на македонските истражувачи во регионален и меѓународен академски контекст.
Овој јуни, во Клиничката болница „Жан Митрев“ ја ставаме превенцијата и навремената дијагностика во преден план. Овозможуваме достапност до нашите врвни специјалисти и најсовремените дијагностички процедури по специјални, јунски цени.
Овогодинешниот Европски конгрес за дебелина 2026 (ECO 2026) се одржа од 12 до 15 мај во Истанбул обединувајќи водечки светски експерти, научници и организации посветени на истражувањето и современиот третман на дебелината.
Горди сме што дел од овој престижен глобален настан беше и д-р Џулиана Михајловска, ендокринолог, чие учество има особено значење за понатамошниот развој и стратегијата на Центарот за третман на дебелина во рамки на Клиниката Жан Митрев.
За време на конгресот беа презентирани најновите светски трендови, меѓународни студии и современи пристапи во менаџирањето на дебелината. Размената на искуства и знаења со експерти од целиот свет претставува значаен поттик за дополнително унапредување на работата на нашиот Центар и обезбедување уште поквалитетна грижа за пациентите.
Остануваме посветени на континуирана едукација, следење на најсовремените медицински практики и имплементација на врвни глобални стандарди, со цел да понудиме сеопфатна, професионална и современа поддршка во справувањето со дебелината како комплексен здравствен предизвик.
Клиника Жан Митрев беше дел од EADV Spring Symposium 2026, кој се одржа во Атина, Грција, еден од најзначајните европски научни настани во областа на дерматологијата.
Во рамки на симпозиумот, д-р Анџелка Илиева презентираше научен труд посветен на меланомот и современите имунотерапевтски пристапи, истражувајќи како одредени генетски промени можат да влијаат врз одговорот на третманот.
Трудот е резултат на соработка помеѓу Генетската лабораторија при Клиника Жан Митрев, Марија Ѓорѓиевска, Џансел Буковец, д-р Горан Кунгуловски, како и д-р Аимилиос Лалас, професор по дерматологија на Aristotle University of Thessaloniki и претседател на International Dermoscopy Society.
Учеството на вакви меѓународни конгреси и симпозиуми претставува важен дел од нашата заложба за континуирана едукација, научен развој и следење на најсовремените медицински достигнувања, со една цел, подобра грижа за пациентите.
На првиот балкански конгрес за педијатриска кардиологија и кардиохирургија во Приштина, Д-р Жан Митрев учествуваше како говорник на посебен панел посветен на третманот на вродени срцеви заболувања, каде што ги презентираше искуството, развојот и резултатите на нашата клиника во областа на кардиоваскуларната хирургија.
Говорејќи за искуството на клиниката во третманот на вродени срцеви заболувања, тој посочи дека досега успешно се третирани околу 1.570 случаи, а клиниката реализира околу 1.000 операции и околу 800 васкуларни процедури годишно.
Во осврт на континуираниот развој на кардиоваскуларниот третман, тој истакна дека од 2007 година клиниката значително напредувала во дијагностиката преку употреба на КТ скен. Тој додаде дека нашиот медицински тим денес е високо специјализиран за дијагностицирање кардиоваскуларни заболувања и користи технологија за 3Д реконструкција на срцето за покомплексни третмани.
На крајот на презентацијата, Д-р Митрев сподели два посебни случаи на бебиња од Косово, кои биле успешно третирани од многу ретки срцеви заболувања, докажувајќи ја не само експертизата, туку и човечкото влијание на оваа професија.
Во Клиника Жан Митрев за првпат е успешно изведена операција со имплантација на реверзна тотална протеза на рамо, напредна хируршка техника која претставува значаен чекор напред во третманот на сложени состојби на рамениот зглоб.
Оваа интервенција е наменета за пациенти кај кои болката и ограничената подвижност на рамото значително го нарушуваат квалитетот на живот, особено во случаи кога традиционалните хируршки методи имаат ограничен ефект. Најчесто станува збор за пациенти со тежок артритис на рамото во комбинација со оштетена или нефункционална ротаторна манжетна, како и кај сложени скршеници на рамениот зглоб кај кои не е можно класично хируршко третирање со остеосинтеза.
Реверзната тотална протеза на рамо се разликува од стандардната анатомска протеза по начинот на поставување на нејзините компоненти. Кај оваа техника се менува природната анатомија на зглобот, при што заоблениот дел од протезата се поставува на страната на лопатката, додека на страната на надлактицата се поставува полиетиленска компонента. Оваа промена во биомеханиката овозможува функцијата на рамото да се преземе од други мускулни групи, што е од особено значење кај пациенти кај кои ротаторната манжетна е сериозно оштетена или недостасува.
Благодарение на овој пристап, пациентите добиваат можност повторно да ги изведуваат основните движења на раката и значително да ја намалат болката, дури и во случаи кога претходно движењето било речиси невозможно.
„Оваа процедура е наменета токму за пациенти кај кои ротаторната манжетна е сериозно оштетена или нефункционална. Со неа овозможуваме значително намалување на болката и враќање на подвижноста, што директно влијае врз квалитетот на живот“, објаснува д-р Ненад Петков, ортопедски хирург специјализиран за хирургија на рамо, кој заедно со својот тим ја изведе интервенцијата.
Операцијата е изведена со користење на современ софтвер за предоперативно планирање и 5D виртуелна навигација, што овозможува детална подготовка и висока прецизност при имплантацијата, со минимален простор за грешка.
По операцијата, пациентите остануваат кратко во болница и се отпуштаат на домашна нега веќе следниот ден. Раната мобилизација е клучен дел од закрепнувањето, па пациентите се охрабруваат да започнат со лесни активности уште во првиот постоперативен период, што овозможува побрзо враќање во секојдневните активности.
Имплантацијата на реверзна протеза на рамо претставува современо и ефикасно решение за третман на комплексни ортопедски состојби и нова можност за пациентите повторно да се движат без болка и со подобар квалитет на живот.
