Месец: м.г

На годинешниот настан Профемина 2025, кој традиционално ги обединува највлијателните жени, здравствени професионалци и експерти од различни области, своето значајно учество го имаше и тимот на Клиника „Жан Митрев“.

Под мотото „Тивките болести на жената: Што пропуштаме додека се грижиме за сите други“, врвни специјалисти од клиниката споделија свои професионални искуства, најнови сознанија и препораки за превенција, рано откривање и правилен третман на најчестите здравствени состојби кај жените.

Во панел-дискусијата учествуваа:

– Доц. д-р Оливер Бушљетиќ, кардиолог
– Доц. д-р Ирена Андонова, гинеколог
– Д-р Џулиана Михајловска, ендокринолог
– Д-р Лилјана Брајевиќ, тораковаскуларен хирург

Модератор на панелот беше ТВ водителката Сања Савевска, која умешно ја водеше дискусијата и поттикна размена на искуства и практични совети што се од голема корист за секоја жена.

Во своите излагања, докторите се осврнаа на различни аспекти од женското здравје.

Доц. д-р Ирена Андонова зборуваше за врската помеѓу гинеколошките состојби и кардиоваскуларното здравје, истакнувајќи дека хормоналните нарушувања често претставуваат ризик-фактор за срцеви заболувања.

Д-р Џулиана Михајловска се фокусираше на ендокринолошките предизвици – хормоналниот дисбаланс, дијабетесот и заболувањата на штитната жлезда, со нагласок на важноста од редовни превентивни контроли.

Д-р Лилјана Брајевиќ ја истакна потребата од рана дијагностика и подигнување на свеста за промените кај дојките, апелирајќи до жените да не ги игнорираат предупредувачките симптоми.

Доц. д-р Оливер Бушљетиќ укажа на растечкиот тренд на кардиоваскуларни болести кај жени во пременопаузален и постменопаузален период, нагласувајќи дека „срцевите заболувања не се исклучиво машки проблем“.

Со своето учество, докторите од Клиника „Жан Митрев“ уште еднаш ја потврдија посветеноста на клиниката кон континуирана едукација, промоција на здравите навики и подигнување на јавната свест за превенцијата како клучен фактор за добро здравје.

Настапот на Профемина 2025 беше одлична можност за споделување знаење, искуство и инспирација — во духот на визијата на Клиника „Жан Митрев“: здравјето на жената е темел на здравото општество.

Во рамки на настанот, се претстави и нашата сестринска компанија Фила Фарм, ексклузивен застапник на премиум брендот Ортомол – германски медицински суплементи познати по својот научно потврден состав и висок квалитет. Посетителите имаа можност да се информираат за широката палета на Ортомол витамини наменети за различни потреби, меѓу кои женското здравје, енергијата, имунитетот и менталната рамнотежа.

Европската федерација на асоцијации на сестри за интензивна нега (EfCCNa) е непрофитна организација основана во 1999 година, која обединува 35 национални асоцијации од 26 европски држави, со над 30.000 членови.

Нејзината мисија е да ја унапреди соработката меѓу медицинските сестри во Европа, со цел подобра грижа за критично болните пациенти и нивните семејства, како и развој на заедничка европска клиничка пракса, едукација и научни истражувања.

👩‍⚕️ Од 2014 година, сестра Жанета Богоевска Митева е претставник на Здружението на медицински сестри за интензивна нега од Македонија во EfCCNa, а во последните 3 години активно членува во Управниот одбор и во ESNO – европската организација за сестри специјалисти.

Овој викенд (10–12 октомври) во Лондон се одржа есенскиот состанок на федерацијата, на кој, меѓу другото, се одржа и избор за нов претседател и член на одборот со конгресни одговорности.

✨ Со голема чест и задоволство објавуваме дека сестра Жанета Митева беше избрана за нов претседател на EfCCNa! ✨

„Посебна чест и задоволство ми беше што бев номинирана и избрана за претседател. Голема благодарност до сите претставници во EfCCNa, моите колеги од ЖМЦ, моето семејство, а особено до д-р Жан Митрев, кој сите овие години беше моја безрезервна поддршка,“

– изјави сестра Жанета Б. Митева.

💙 Сестра Жанета е дел од клиниката ЖМЦ цели 24 години, со огромно искуство во интензивна нега и анестезија – уште од самите почетоци на клиниката.

Во текот на својата кариера активно учествува во внатрешната и континуираната едукација на медицинскиот персонал, секогаш со посветеност и професионалност.

👏 Честитки, Жанета! Со гордост ја претставуваш Македонија и нашата клиника на европско ниво! 🇲🇰❤️

Центарот за мајка и бебе во Клиника Жан Митрев одбележува една година успешна работа исполнета со радост, посветеност и стотици среќни моменти. Во текот на првата година од функционирањето, овој современ центар за породилна и неонатолошка грижа помогна да се родат 167 бебиња и создаде 167 нови семејства. 

Во изминатите дванаесет месеци низ Центарот поминаа бројни емотивни приказни – од најмалото бебе родено со тежина од само 1270 грама, до најголемото бебе спонтано родено со 4630 грама. Секоја од нив е доказ дека знаењето, искуството и технологијата кога ќе се обединат, создаваат најубавото нешто – нов живот. 

„Создадовме породилен центар каде мајката и бебето се во фокусот – со безбедност, удобност и топлина што секое семејство ја заслужува. Нашата визија е секое породување да биде убаво искуство, ослободено од страв и неизвесност, а исполнето со доверба, професионализам и грижа. Во оваа една година докажавме дека и во Македонија може да се развива акушерство според највисоките светски стандарди – со врвна медицинска технологија, тим од искусни специјалисти и пристап кој ги спојува науката и хуманоста“, изјави медицинскиот директор д-р Емил Стоицовски.

Центарот за мајка и бебе е изграден на површина од над 800 метри квадратни и опремен со најсовремена медицинска технологија. Располага со две родилни сали, операциона сала, соби за будење, неонатолошка и гинеколошка ординација, како и комфорни апартмански соби кои овозможуваат приватност и удобност во постпородилниот период. Областите во кои делува Центарот ги опфаќаат сите три тримесечја од бременоста, спроведување на дијагностички испитувања, ХСГ лабораторија, генетски испитувања како амниоцинтеза, хорионбиопсија, ултразвучни и неинвазивни пренатални тестови.Тимот кој се состои од гинеколози акушери, неонатолози, анестезиолози, акушерки и медицински сестри, овозможува целосна грижа пред, за време и по породувањето, достапна 24 часа дневно.

Одделот за неонатална интензивна нега (NICU), кој работи во склоп на Центарот обезбедува третман и згрижување на предвремено родени и ризични новороденчиња. Еден од најзначајните моменти во изминатата година беше породувањето на тројка бебиња, родени во 31-та гестациска недела. Овој редок природен случај ја потврди високата стручност и подготвеност на медицинскиот тим, но и ја симболизира хуманоста и посветеноста кон секое новороденче.

Центарот нуди целосен спектар на услуги за мајката и бебето – следење на бременоста, дијагностички и генетски испитувања, неинвазивни пренатални тестови, постпартална нега и советување. Особено внимание се посветува на индивидуалниот пристап, при што гинекологот кој ја водел бременоста е присутен и при самото породување, овозможувајќи доверба и континуитет во најважниот момент.

Со само една година работа, Центарот за мајка и бебе се позиционира како водечки породилен и неонатолошки центар во земјата, кој секојдневно докажува дека успехот се мери во најубавата мерна единица – нов живот.

Клиника Жан Митрев продолжува со својата посветеност кон поддршката на младите таленти и македонската култура и уметност. Во рамките на оваа своја мисија, клиниката беше мецена на младото музичко дуо Јанев и Лазарова, кои го претставија нашето музичко богатство на големата сцена во Њујорк.

Во преполната сала на престижниот музички центар „The DiMenna Center for Classical Music“ во срцето на Менхетн, беа одржани концертите на победниците од International Youth Music Competitions (IYMC) – глобална манифестација која ги собира најталентираните млади музичари од целиот свет.

На сцената настапи дуото Јанев и Лазарова – Златица Лазарова и Јулијана Јанев, ученички во ДМУЦ „Сергеј Михајлов“ – Штип, кои со виртуозна изведба на „Рапсодија бр. 2“ од Франц Лист ја воодушевија публиката и добија долготраен аплауз.

„Голем предизвик е да се настапи на ваков свечен концерт меѓу најдобрите инструменталисти од целиот свет. За мене ова беше остварување на сонот и огромен поттик за понатаму. Му благодарам на доктор Жан Митрев за поддршката што ми овозможи да го реализирам ова патување за кое сонував со години. Ќе продолжам со уште поголем ентузијазам, знаејќи дека постојат луѓе и институции кои искрено ја ценат уметноста,“ – изјави младата пијанистка Златица Лазарова, споделувајќи ги впечатоците од настапот во Њујорк.

Со вакви иницијативи, Клиника Жан Митрев уште еднаш го потврдува својот статус како општествено одговорна организација, која верува дека вложувањето во младите уметници претставува инвестиција во иднината на нашето општество.

Во периодот од 03.10 до 05.10.2025 година се одржа четвртиот по ред годишен сестрински конгрес, на кој присуствуваа бројни стручни лица од сите здравствени установи од државата и регионот.

Оваа година на конгресот имаше повеќе од 300 учесници – медицински сестри, техничари, доктори и фармацевти. Програмата опфати предавања, презентации и панел-дискусии посветени на современите предизвици и трендови во сестринството, создавајќи можност за размена на искуства и нови знаења.

Голема чест и гордост за нас како клиника беше активното учество во неколку сегменти, најпрво како спонзор на Здружението „ЗА НАС“, преку учество во организацијата на настанот, и со тим од сестри кои со своите презентации придонесоа за унапредување на професионалните знаења и промоција на нашата установа.

Исто така во соработка со Фила Фарм и нашиот бренд Ортомол, го претставивме тимскиот дух и посветеноста кои секојдневно ги негуваме во нашата клиника.

Настаните од ваков тип се потсетник дека сестринството е професија со срце – професија која обединува, мотивира и инспирира, истовремено промовирајќи ги вредностите на заедништво, едукација и хуманост.
За време на овој 4-ти Конгрес на Здружението на медицински сестри, акушерки и техничари на Македонија се одржа и Регионалната ESNO Конференција.

По инспиративните воведни обраќања од претставниците на ESNO, IFNA и Здружението на медицински сестри, акушерки и техничари на Македонија, следеше динамична панел дискусија на тема „Сестринство во транзиција: Регулација, Специјализација и Системско влијание“, модерирана од претседателот на ESNO – д-р Адријано Фригановиќ.

Размената на експертиза, визија и професионални искуства уште еднаш ја истакна важноста на напредните сестрински улоги и меѓународната соработка во унапредувањето на здравствените системи.