Гинекомастијата претставува состојба на абнормално зголемување на дојките кај машките индивидуи. Се јавува како резултат на дисбалансот меѓу машките и женските хормони. При изразена гинекомастија, дијаметарот на дојките е поголем од 4cm и чувствителноста е зголемена. Зголемувањето на жлезденото ткиво треба да се разликува од натрупување на масно ткиво. Гинекомастијата е нормално да се појави кај новороденчињата, во пубертетот и кај постарите лица.
Патолошката гинекомастија може да настане заради недостаток или намалено количество на андрогените хормони (машките полови хормони), независно која е причината за намалувањето, што укажува на нарушен сооднос меѓу естрогените и андрогените хормони. Кај речиси две третини од момчињата и половина од хоспитализираните возрасни мажи со симптоми на гинекомастија се јавува бенигна жлездена маса која може да се осети при допир. Доколку постои неодамнешна активација на болеста, нејзино брзо напредување и при зголемена чувствителност, особено кај лицата со помала телесна тежина, се препорачуваат подетални ендокринолошки иследувања.
Доколку навреме се дијагностицира и контролира причината која предизвикува гинекомастија, симптоматското зголемување на дојките кај пациентот обично се повлекува за неколку месеци. Сепак, доколку се работи за подолготрајна форма на болеста, се препорачува хируршка интервенција како најефикасна терапија. Најкарактеристични фактори кои укажуваат на потребата од хируршка интервенција се сериозни психолошки или естетски проблеми, продолжено зголемување на дојките и зголемена чувствителност. Кај речиси половина од пациентите со болна гинекомастија не може да се изведе хируршка интервенција и се препорачува терапија со антиестрогени лекови како најефикасни во намалување на симтомите и големината на дојките.
Оваа состојба е позната уште под неколку стручни термини како пилонидална циста или сакрококцигеална фистула, но всушност се работи за појавата широко позната како враснато влакно.
Пилонидалниот синус претставува хронична инфективна состојба која се карактеризира со формирање на циста или абсцес во предел на глутеалната или интерглутеалната регија.
Дознајте повеќе за методата од видеото со д-р Живорад Коцевски, спец. по пластична реконструктивна и естетска хирургија
Стравот на родителите поврзан со непрозборувањето на децата често пати знае да иницира недоумици. Децата кои доцнат во развојот на говорот најчесто претставуваат дијагностичка дилема и за клиничарите. Ова се однесува особено на тоа кога и колку рано, да се отпочне со дополнителни испитувања/тестирања. И дали можеби пак да треба да се почека до 3 година од животот на детето, за да се види дали ќе има спонтано разрешување на состојбата, што е инаку често се случува кај децата до 3 годишна возраст.
Педијатрите предлагаат дефинирани критериуми според кои треба да се водиме во инвестигирање на состојбата на развоен проблем на говорот. Првичната педијатриска проценка подразбира категоризирање на формата и степенот на доцнење на говорот.
Примарната форма на доцнење во говорот подразбира нарушување и на експресивниот и на рецептивниот говор. Додека пак, секундарната форма се манифестира како дел од губиток на слух, интелектуално засегање, аутистичен спектар, физички попречен говор или селективен мутизам.
Дополнително, педијатриската проценка подразбира дефинирање на обликот и тежината на јазичниот и говорен дефицит, при што истите се групираат во три степени: блага форма, средна форма и тешка форма. Поопсежната, длабока проценка подразбира откривање на комплексни невролошки состојби, метаболни болести, инфекции, интоксикации, но и изолирани нарушувања како аномалии на уво, нос и грло, сензоневрална глувост, или психијатриски состојби како аутизам, АДХД и первазивни нарушување проследени со когнитивен дефицит.
Основа за добра дијагноза е темелно земената анамнеза за медицинската историја на детето и податоците за фамилијарни заболувања. Потоа следи невролошка проценка, морфолошка проценка и проценка на уво, нос и грло. Втората група на иследувања опфаќаат специјално дизајнирани тестови за невроразвојна проценка, психијатриска проценка, проследени со аудиометрија, електроенцефалографија и магнетна резонанца.
Во лесната форма на доцнење во говорот влегуваат деца над 1 година кои сеуште немаат говор и деца над 2 години кои започнале со говорот со доцнење од 3-6 месеци. Во оваа група влегуваат и децата кои започнале со лесна форма на пелтечење. Во средната форма спаѓаат деца до 3 години кои зборуваат тешко разбирливо, деца од 1-3 години кои сеуште не зборуваат и деца кои пелтечат подолго време, но немаат инхибиција во говорот. Во тешка форма се вбројуваат деца под 5 години кои имаат неразбирлив говор или немаат говор и тежок облик на пелтечење кое е асоцирано со страв и прави инхибиција на говорот.
По дефинирањето на состојбите се пристапува кон тимска терапија, а тоа подразбира логопедски, психолошки третмани и терапија од невропедијатар. Паралелно се прави редовно следење и евалуација на состојбата преку разни форми на тестирања кои даваат насоки за менување и подобрување на третманските можности.
Г-дин Шон Молој дојде во Скопје во Клиниката Жан Митрев минатата недела со цел да добие замена на двете колена со вештачки. За клиниката дознал истражувајќи на интернет и консултирајќи се со пријатели. Инаку тој е по потекло од Англија и живее во близина на Оксфорд. Сега е ѕидар по професија, а претходно бил рагби играч. Како резултат на истрошеноста на неговите колена поврзано со неговите занимања и остеоартритисот потребна му беше билатерална операција. Нашиот д-р Сашо Младеновски му направи успешна операција по која тој веќе се движи и наскоро ќе се врати дома. Неговото нескриено задоволство и пофални зборови ни значат многу. Погледнете ја неговата видео изјава.
Пластична Реконструктивна и Естетска Хирургија претставува посебна супспецијалност во хирургијата. Естетска хирургија е најубавиот дел од хирургијата кој се занимава со разубавување на надворешниот изглед на човекот. Хирурзите кои работат во оваа супспецијалоност се многу прецизни, трпеливи и пред се естети. Многу луѓе од пошироката популација имаат погрешен став дека естетската хирургија значи многу силикони, преголеми усни и ледени лица. Естетската хирургија е многу повеќе од тоа, пред се естетската хирургија се стреми кон се поприроден и симетричен изглед.
Каков е интересот кај нас и дали жените се најчести пациенти?
Во последните години како во светот така и кај нас естетската хирургија е во подем. Македонската современа жена во последните години разви се повисока свесност за тоа како изгледа. Желбата да се изгледа помладо и поубаво а со тоа и посамоуверено ги подигна границите на она што се бара и очекува од хирурзите. Сеуште жените се почести пациенти, но мора да нагласам дека во последниве години мажите се почесто ги гледаме во нашите ординации.
Рековте дека пациентите имаат високи очекувања од хирурзите, дали постои разидување во желбите на пациентите и она што реално може или би требало да се постигне со естетска хирургија?
Постојаната дилема во естетска хирургија е балансот помеѓу желбите на пациентите од една страна и ставот на хирургот од друга страна. Повеќето од пациентите кога се гледаат во огледало своите недостатоци ги гледаат многу поголеми од она реално, или со други зборови кажано не се доживуваат или перцепираат себеси на ист нашин како што нив ги перцепира околината. Сигурно многу пати сте слушнале за некои личности кои направиле повеќе естетски операции или процедури. Покрај тоа што мора да постои индикација за хируршкиот зафат, хирурзите имаат една голема задача да проценат самостојно или во консултација со психијатар дали пациентот има реални очекувања од саканата хируршка интервенција.
Кои се можностите во естетската хирургија?
Естетската хирургија опфаќа инвазивни и помалку или неинвазивни техники. Неинвазивните или помалку инвазивните техники кои се работат како дел од естетската медицина се апликација на ботокс, апликација на дермални филери, ПРП третмани, биоревитализацја, ласерски третмани, лифтинг на лицето и вратот со конци, трансплантација на коса итн.
Инвазивни техники кои се користат се многубројни, систематски да ги наброиме, блефаропластика (корекција на очните капаци, горни и/или долни), риносептопластика (естетска и функционална корекција на носот), отопластика (корекција на уши), лифтинг на лицето и вратот, лифтинг на веѓи, лифтинг на усни, брахиопластика (корекција на надлактиците), аугментација-зголемување на градите, мастопексија (подигање на градите), редукција на градите, гинекомастија, абдоминопластика (корекција на стомакот), аугментација- зголемување или лифтинг на задникот, липосукција, лифтинг на надколениците, трансфер на масно ткиво итн.
Кои интервенции се најчесто барани во вашата болница?
Најчесто барани естетски интервенции во Клиничката болница Жан Митрев се риносептопластика и абдоминопластика.
Што поточно значи риносептопластика?
Риносептопластика претставува хируршки зафат со кој се врши естетска и функционална корекција на носот. Функционалните проблеми се најчесто проблеми со дишењето, односно проодноста на носните ходници. Естетска индикација може да биде кифоза на носот или познато како грбав нос, долг, широк нос, нос во форма на седло, широк врв на носот, спуштен или подигнат врв на носот, широки ноздрви на носот. Исто така асиметричен, девијиран нос. За да се постигне посакуваниот резултат овој хируршки зафат најчесто опфаќа ремоделирање на коскените и рскавичните елементи на носот. Пристапот е најчесто со отворена риносептопластика која хируршка техника е веќе прифатена на светско ниво како златен стандард.
Што значи да имате функционални проблеми односно потешкотии во дишењето преку носот?
Најчесто се работи за девијација на носната преграда, септумот и оваа состојба може да се реши во истиот хируршки зафат. Тогаш станува збор за риносептопластика.
Што поточно значи абдоминопластика?
Корекција, затегнување на стомакот. Промените на стомакот се неизбежни по породувањето или доколку изгубите повеќе килограми во пократок временски период. Мускулна слабост, стрии, вишок на кожа која го има изгубено еластицитетот, лузна како резултат на царски рез или пак кила на преден абдоминален зид, се дел од промените кои се очекувани во овие две состојби. Овие промени честопати водат кон незадоволство, фрустрации па дури и до депресија. Абдоминалните мускули се ослабени, растегнати или раслоени во текот на бременоста, оваа состојба се нарекува rectus diastasis, и може да биде придружена со кила-хернија. Мини абдоминопластика е помалку екстензивна техника од стандардната абдоминопластика. Се одстранува вишокот на кожа и подкожно масно ткиво а долната третина на абдоминалната мускулатурата се затегнува. Стандардната абдоминопластика се препорачува кога е потребно остранување на поголем вишок на кожа и подкожно масно ткиво и/или постои поголемо попуштање на абдоминалната мускулатура. Доколку имате кила на папокот или на било кое место на предниот абдоминален ѕид истата може да биде решена во истиот оперативен зафат. Циркуларна абдоминопластика е најинвазивната форма каде резот продолжува циркуларно и позади со што се постигнува подобро затегнување на слабините и подигање на задникот.
Дали абдоминопластиката се комбинира со липосукција?
Липосукцијата е често применувана во естетската хирургија. Липосукцијата претставува моделирање на поткожното масно ткиво на некои делови од телото. Липосукција не е начин на слабеење. Многу жени и мажи неможат да го изгубат масното ткиво складирано на колковите, бутовите, задникот, стомакот итн. Во тие случаи со липосукција се третираат само тие одредени, специфични депозити на масно ткиво.
Колку често пациентите се одлучуваат за неинвазивни техники и кои се најбарани?
Пациентите мнгу често се одлучуваат за неинвазивни техники. Botox е прочистен неуротоксичен протеин кој го произведува бактеријата Colostrum Botulinum. Овој протеин делува на неуротрансмитерот на ниво на неуромускулната синапса предизвикувајќи мускулна парализа. Долго време се користел во медицината во тераписки цели. Денеска најчесто се користи во естетската медицина за израмнување на борите на лицето кои се јавуваат со текот на годините поради константното користење на лицевата мускулатура.
Дермални филери
Со стареењето кожата ја губи хијалуронската киселина, колагенот и подкожното масно ткиво. Хијалуронската киселина е природна супстанца која има улога во балансот на водата во меѓуклеточниот простор во кожата, односно хидрирањето на кожата. Дермалните филери се користат за пополнување, израмнување на бори, исто така за обликување, подигање или добивање на волумен на лицето или усните. Постојат многу хируршки и нехируршки техники, важен е индивидуалниот пристап и проценката на пациентот на кој му е потребно. Но сакам да нагласам дека не е во мода она што младите го гледаат и пратат на социјалните мрежи. Природниот и негуваниот изглед секогаш е во мода.
Отворање на Центарот за офталмологија во Клиниката „Жан Митрев“
Д-р Чипуровски, во клиничката болница „Жан Митрев“ и официјално почна со работа Центарот за офталмологија во соработка со Промедика Офталмологија, уште една алка во сеопфатниот здравствен центар, кој отсега па натаму овозможува врвна и напредна грижа за очите. Што е она што го издвојува овој Центар од останатите во земјава?
Д-р Чипуровски: Центарот за офталмологија, кој е резултат на соработката помеѓу „Жан Митрев“ клиниката и Промедика Офталмологија, се издвојува како водечки центар во земјата бидејќи располага со најновата и најнапредната технологија за дијагностицирање и третман на очните проблеми во Македонија. Соработката меѓу две од најголемите и најискусните болници во земјата овозможува уникатен спој на долгогодишно искуство, знаење и експертиза, што резултира со пружање на напредна грижа за пациентите кои имаат потреба од офталмолошки услуги.
Каква технологија и апаратура се користи за дијагностика и третман на офталмолошките проблеми во „Жан Митрев“?
Д-р Чипуровски: Центарот користи најмодерна и најсофистицирана технологија за дијагностика и третман на офталмолошките проблеми, која вклучува апарати за високо прецизни дијагностички испитувања како ОЦТ, видно поле, ехо/АБ скен, тонометар за мерење очен притисок и рефракто-кератометар.
Кои видови прегледи и услуги се достапни во новиот офталмолошки центар?
Д-р Чипуровски: Во новиот офталмолошки центар во соработка со Промедика Офталмологија, пациентите може да направат офталмолошки преглед, субспецијалистички прегледи, ретинолошки преглед кој е идеален за пациентите со дијабет или ретинолошки заболувања, преглед за катаракта, преглед за глауком, преглед за окулопластика како и детски прегледи.
Кои се најчестите офталмолошки проблеми кај пациентите?
Д-р Чипуровски:Најчестите офталмолошки проблеми кај нашите пациенти вклучуваат рефрактивни грешки (како што се кратковидост, далекувидост и астигматизам), катаракта, глауком, макуларна дегенерација, заболувања на ретината и задниот сегмент на окото, како и различни видови на очни инфекции и алергии. Нашиот офталмолошки центар нуди дијагноза и третман за сите овие состојби со најсовремена технологија.
Посебно внимание посветувате на децата. Што опфаќа офталмолошкиот преглед кај деца и на што треба да внимаваат родителите кога станува збор за видот на децата?
Д-р Чипуровски:Во нашиот центар, посветуваме посебно внимание и грижа на здравјето на очите кај децата, бидејќи навремената дијагноза на било какви очни проблеми е од клучно значење за нивниот правилен развој и учење. Секое дете заслужува јасен вид, и затоа нашата цел е да се осигураме дека сите деца добиваат најдобра можна грижа и дека евентуалните проблеми со видот се откриваат и третираат што е можно порано. Офталмолошкиот преглед кај децата во нашиот центар вклучува темелна проценка на видната острина, проверка на очниот притисок, преглед на очното дно и детекција на можни рефрактивни грешки или други абнормалности. Нашиот тим работи внимателно и нежно за да го направи прегледот пријатен и безболен за секое дете. Симптоми на кои родителите треба да внимаваат се: често трепкање, триење на очите, тешкотии во читањето или фокусирањето, двојна слика или нагло губење на интерес за активности кои бараат визуелна концентрација. Секој од овие знаци може да укажува на можен проблем со видот и е причина за консултација со офталмолог. Препорачливо е секое дете првиот офталмолошки преглед да го направи до неговата 3-та година. Ние сме тука да им помогнеме на родителите да нивните дечиња гледаат чисто со помагала или без.
Кои услови треба да ги исполнуваат кандидатите за ласерска корекција на диоптрија?
Д-р Чипуровски: Со ласерската корекција на диоптрија, ја отстрануваме диоптријата кај пациентите за да им се овозможи јасен вид без очила или леќи. Кандидатите за ласерска корекција на диоптрија треба да имаат диоптрија од ‒10 до +6 и ±6 астигматизам (цилиндер), да се на возраст од 18-40 години и да имаат стабилна диоптрија најмалку една година. Дополнително за да се одреди дали пациент е кандидат за интервенцијата, извршуваме детален преглед на кој правиме повеќе детални испитувања и го анализираме секој дел од окото на пациентот.
Што претставува кератоконусот, кога најчесто се јавува и како се третира?
Д-р Чипуровски: Кератоконусот е дегенеративно заболување на рожницата кое доведува до нејзино истенчување и деформација, што резултира со замаглен вид и можност за прогресивна загуба на видната острина. Најчесто се јавува кај млади лица, а неговиот третман може да вклучува носење на специјални контактни леќи или пак интервенција која се нарекува крослинкинг.
Дијагностиката и третманот на катарактата, глаукомот и ретинолошките заболувања се само дел од услугите. Кои се останатите офталмолошки заболувања кои ги третирате во Центарот, а за кои пациентите може да побараат стручна помош?
Д-р Чипуровски: Покрај катарактата, глаукомот и ретинолошките заболувања, во нашиот центар дијагностицираме и третираме и други очни состојби, како што се: рефрактивни грешки, инфекции на очните капаци, трауматски повреди на очите итн. Нашите пациенти можат да добијат комплетна дијагноза и соодветен третман за сите овие состојби.
Учениците од 4 година од NOVA International School Skopje заедно со своите професорки по психологија Ивана Пемпер и Викторија Димитровска ги посетија нашите оддели за радиологија и неврологија. Тие имаа прилика да се запознаат одблиску со технологиите на снимање на мозокот како што се магнетната резонанса (МР), компјутерската томографија и ЕЕГ дијагностика кои се користат со цел да се утврди фунционирањето на овој орган.
Им благодариме на заинтересираноста и љубопитноста на учениците и секако на професорките, нашата главна Светлана Ончева, сестра Сузана Костовска и нашиот радиолошки техничар Михајло Маноилов кои ја спроведоа оваа посета.
Срцевите заболувања се водечка причина за смрт кај мажите и жените. Преземете чекори уште денес за да го намалите ризикот од развој на срцеви заболувања.
За да спречите срцеви заболувања, треба да ги применувате секојдневно следниве чекори:
Јадете здраво
Бидете физички активни
Одржувајте нормална телесна тежина
Откажете се од пушењето и избегнувајте пасивно пушење.
Контролирајте го холестеролот и крвниот притисок
Доколку пиете алкохол, правете го тоа умерено
Избегнувајте стресни моменти
Дали /кога сме изложени на ризик од срцеви заболувања?
Секој од нас е изложен на ризик од развој на срцеви заболувања, но ризикот е поголем доколку:
Имате висок холестерол или висок крвен притисок
Сте пушач
Имате прекумерна тежина или сте обезни
Немате доволно физичка активност
Не се храните здраво
Вашата возраст и семејната историја исто така влијаат на ризикот од развој на срцеви заболувања. Вие сте повеќе изложени на ризик доколку:
Сте жена над 55 години
Сте маж над 45 години
Еден од вашите родители имал срцеви заболувања пред да наполни 55 години Добрата вест е што можете да направите многу работи за да ја спречите појавата на срцеви заболувања.
Што се срцеви заболувања?
Кога се зборува за срцеви заболувања, обично се мисли на коронарна артериска болест. Ова е најчестиот тип на срцеви заболувања.
При коронарна срцева болест, коронарните артерии (крвните садови кои носат крв до срцето) стануваат потесни или се затнуваат. Ова се случува бидејќи холестеролот и масните материи (наречен „плаки-наслаги“) се акумулираат во артериите.
Многу причини водат до таложење на наслаги внатре во вашите артерии, вклучувајќи:
Висок холестерол во крвта
Висок крвен притисок
Тутун
Висок шеќер во крвта поради дијабетес
Кога плаката ја блокира артеријата, тоа го отежнува протокот на крв во срцето. Блокирана артерија може да предизвика болка во градите или срцев удар.
Проверете го навреме вашето срце. Закажете го вашиот термин на 02 3091 484
