Пулмологија

Одделот за пулмологија обезбедува дијагностика и третман на заболувања на дишните патишта и белите дробови, со користење на современи дијагностички методи и интегриран пристап.

Фокусот е насочен кон рана дијагноза, контрола на хронични состојби и подобрување на респираторната функција, преку комбиниран пристап кој вклучува медикаментозна терапија, респираторна физиотерапија и интервенционални процедури.

Во одделот се дијагностицираат и третираат:

Хронична опструктивна белодробна болест (ХОББ)

прогресивно стеснување на дишните патишта со намален проток на воздух и отежнато дишење.
Хронична кашлица

симптом кој трае подолго од 8 недели и често е поврзан со белодробни или алергиски состојби.
Алергиски респираторни заболувања

реакции на инхалаторни алергени со воспаление на дишните патишта.
Инфекции на белите дробови

бактериски, вирусни или хронични воспалителни процеси.
Опструкции на дишните патишта

предизвикани од секрет, туѓо тело или туморски промени.

Во одделот се применуваат современи функционални, радиолошки и ендоскопски методи за проценка на белодробната функција и откривање на заболувањата на дишните патишта и белите дробови.

Спирометрија

Функционален тест со кој се мерат волуменот и протокот на воздух во белите дробови. Се користи за дијагностика и следење на ХОББ, астма, хронична кашлица и други опструктивни или рестриктивни заболувања.

Тестови за дифузиски капацитет (DLCO)

Проценка на способноста на белите дробови за размена на кислород и јаглерод диоксид. Овој тест е важен кај пациенти со хронични белодробни заболувања, белодробна фиброза, емфизем и интерстицијални заболувања.

Рентген на бели дробови

Основна радиолошка метода за откривање на инфекции, воспаленија, течност, тумори, хронични промени и други структурни нарушувања на белите дробови.

Компјутерска томографија (КТ)

Високо резолуциска визуелизација на белодробното ткиво, бронхиите и дишните патишта. КТ е особено важна кај хронична кашлица, суспектни тумори, белодробна емболија, интерстицијални заболувања и проценка пред бронхоскопија.

Бронходилататорни тестови

Проценка на реакцијата на дишните патишта по примена на лекови. Со тестот се утврдува дали постои обратлива опструкција, што е важно за диференцијација помеѓу астма и ХОББ.

Кожни алерголошки тестови

Идентификација на специфични алергени кои можат да предизвикаат алергиски ринит, астма или други респираторни симптоми.

Бронхоскопија

Директен преглед на трахеобронхијалното стебло со современ Olympus бронхоскоп. Овозможува визуелизација на дишните патишта, земање примероци, биопсија, бронхоалвеоларен лаваж и откривање на воспаленија, инфекции, тумори или туѓи тела.

Виртуелна бронхоскопија

Неинвазивна 3Д реконструкција на трахеобронхијалното стебло добиена преку КТ. Овозможува детална проценка на дишните патишта кај пациенти со стеснувања, тумори или сомнеж за опструкција, без потреба од инвазивна процедура.

Овие дијагностички методи овозможуваат рано откривање на заболувањата, проценка на нивната тежина и прецизно планирање на третманот.

Во одделот се применува комбиниран пристап кој вклучува медикаментозна терапија, респираторна физиотерапија и интервентни процедури.

Респираторна физиотерапија

клучен дел од третманот кај пациенти со ХОББ, хроничен бронхит, белодробни инфекции и постоперативни состојби. Вклучува техники за подобрување на вентилацијата, полесно исфрлање на секретот и подобрување на дишењето.
Инхалаторна терапија

апликација на бронходилататори, кортикостероиди и други лекови директно во дишните патишта, со брз и локален ефект.
Интравенозна терапија

примена на бронходилататори, мукосекретолитици, деконгестиви, антибиотици и друга терапија кај пациенти со потешки инфекции, егзацербација на ХОББ или акутни состојби.
Фармаколошка терапија

индивидуално прилагоден третман според дијагнозата, кој може да вклучува антибиотици, антиалергиска терапија, кортикостероиди, имунотерапија и лекови за контрола на хроничните симптоми.
Интервентна бронхоскопија

процедура која се користи не само за дијагностика, туку и за третман на крварења, стеснувања, опструкции, колапс на белите дробови или присуство на туѓо тело.
Поставување на стент во дишни патишта

кај пациенти со изразено стеснување или компресија на бронхиите, се поставува стент со цел одржување на проодноста и олеснување на дишењето.
Отстранување на секрет или туѓо тело

преку бронхоскопија може да се отстрани секрет, згрутчена крв, туѓо тело или туморска маса која предизвикува опструкција.
Долгорочно следење на хронични заболувања

редовни контроли и прилагодување на терапијата кај пациенти со ХОББ, астма, хронична кашлица и други долготрајни состојби.

Комбинираниот пристап е особено важен кај хронични белодробни заболувања, каде респираторната физиотерапија значително го подобрува ефектот на медикаментозниот третман и квалитетот на живот.

Одделот располага со современа технологија за функционална дијагностика, бронхоскопски процедури и респираторна поддршка.

Спирометри

современи апарати за прецизно мерење на белодробната функција и следење на ефектот од терапијата.
Системи за дифузиски тестови

овозможуваат точна проценка на гасната размена и рано откривање на оштетување на белодробното ткиво.
Современи бронхоскопи (Olympus)

високорезолуциски системи за дијагностичка и интервентна бронхоскопија, со можност за земање биопсија, отстранување на секрет и поставување стент.
КТ дијагностика со 3Д реконструкција

детална анализа на белите дробови и трахеобронхијалното стебло, со можност за виртуелна бронхоскопија.
Апарати за инхалаторна терапија

системи за контролирана и ефикасна апликација на лекови директно во дишните патишта.
Мониторинг и анестезиолошка поддршка

бронхоскопските процедури се изведуваат со краткотрајна анестезија и континуирано следење на пациентот за максимална безбедност и комфор.