Септември – месец на свесност за Алцхајмерова деменција

септември 15, 2025

Нормално, со возраста и стареењето настапува промена и намалување функцијата на органите, меѓу кои и на мозокот. Така, помеѓу нормалната заборавеност и појавата на деменција има голема разлика. Најчеста форма на деменција е Алцхајмеровата болест. Тоа претставува комплексно невродегенеративно заболување кое влијае врз процесите на запамтување, расудувањето, однесувањето, емоциите и способноста за секојдневно квалитетно функционирање.

Кога започнуваат промените на психички план кај лицата со Алцхајмерова деменција, семејствата често се првите кои забележуваат дека нешто не е како порано. Навремената препознавање и дијагноза се клучни за секој човек како би се овозможило подобрување на квалитетот на нивниот живот и планирање на грижата.

Симптоми кои семејствата најчесто ги забележуваат во секојдневниот живот:

– Чести заборавање на неодамнешни случувања: На пример, заборавање каде оставил очила или клучеви, или повторување на истото прашање неколку пати.
– Потешкотии во планирање и организирање: Потешкотии при готвење според рецепти, плаќање сметки или следење на задолженија.
– Губење или оставање предмети на несоодветни места: На пример, ставање паричник во фрижидер или чевли во кујнскиот фиока.
– Нарушување во ориентација за време и простор: Пациентот може да не знае кој ден е, да се изгуби на познат пат или да не препознае добро познато место. Подоцна може да не ги препознава своите блиски или да не е во можност да ги именува.
– Промени во личноста и расположението: Анксиозност, раздразливост, повлекување од друштво, несигурност или тага без очигледна причина.
– Проблеми со говор и јазик: Тешкотии во наоѓање на вистински зборови, намалување на фонд на зборови, мешање зборови или повторување.
– Намалена способност за донесување одлуки и решавање проблеми: Тешкотии при избор на облека, управување со финансии или донесување секојдневни одлуки.

Зошто е важно раното препознавање?

• Отпочнување на медицински третман на состојбата,
• Планирање на грижа и безбедност во домот,
• Прилагодување на дневните активности и рутини,
• Поддршка за семејството и подобрување на квалитетот на животот на пациентот.

Доколку се соочувате вие или ваш член од семејството со повремена или постојана збрканост, заборавеност, потешкотија во секојдневното функционирање, може да закажете психијатриски преглед со м-р д-р Марија Костадиновска, психијатар, по што ќе се даде насока за натамошен, индивидуален третман на состојбата.